welcome home

natuerli beni meteme breite smile e flogi rechtig auschtralie gschtege. es het sech weder emou eso agfuehlt wi heifluege. sidney esch auerdengs ernuechternd gsi, erschreckenderwis send die of dem chline floghafe so schlaecht organisiert asses mech 2 stond koschtet het besi zo dem floghafe uscho be... guet, naer beni met au mim gepaeck rechtig zog trottlet ond ha mi dor die schranke gkwaetscht, ha baud angscht gha asi det noeme usechome. das ganze esch denne witergange rechtig faehre. ned loschtig. ossert foer aui andere wo zuegluegt haend, grmpf...

zom gloeck het mi de jonathan en manley abghout. i ha en fairlight gwohnt, meteme wonderschoene usbleck ofe hafe, rechtig fraech. am obe haemer amigs lorry keats gfuetteret, die send uh farbig ond moeche e heidemeis. en wehmuetstropfe esch auerdengs gsi, ass swaetter gar ned metgspeut het ond grad am erschte obe en storm cho esch. ned schoen. ond de ander wehmuetstropfe esch gsi, asi ned woerkli vom flaeck cho be. mini kollege send zwar uuh lieb gsi ond haend aues gmacht, aber dgabriele redt eifach veeeu zveu... os hoefflechkeit chamer sech jo ned eifach losrise ond wonis de gaege di eis znacht todmued aendli gschafft ha (met jetlag ond ere freinacht em flueger...) es zemmer zcho esch doch gabriele scho weder e de toere gstande ond het witer gschwaetzt.... am morge esch si defoer ned zom bett us cho ond bes mer de aendli los send esch bereits nachem mettag gsi.

sydney saeuber het mi noem ganz eso idroecklech donkt wi bem erschte mou. vellech hani au eifach de stadtkoller gha, hong-kong het doch au scho einiges dezue bitreit. woni de minere froendin in nelson bay agluete ha hani erfahre, asi mi em datum vertoh ha ond bereits scho en tag fruecher hetti soeue detsi. peeeinlech... ond ich ha doch so druf planget, vo manley waegzcho. na ja, strafe muss sein.

so beni am noechschte tag e bus ghocket ond of nelson bay gfaetzt, wo mi dmarika abghout het. de ron, ere partner, het met de dirty dozens (sim goufclub) es speziells turnier ofeme enseli gha ond het sech erscht zom znachtchoche agmaeudet. so semmer e garte ghocket, haend wi tronke ond bikkies gaesse, meeega fein. nacheme wili het de mou stelifon gluete ond de ron het gmeint, es waerdi chli spoeter, si stecke metem boot ofere sandbank fescht ond muend warte bes dflueg echli astigt :o)))) esch jo sooooo loschtig gsi.

e dem club esch au de bsetzer vo prodive ond de ron het mer am noechschte tag grad ganz chorzfreschtig en tauchgang organisiert. em stroemende raege het mi de ron usglade am tauchplatz ond het gseit, ich soeui aluete weni fertig sigi. guet. e dem momaent woni uftaucht be esch mer e senn cho, assi waegem raege aues em auto gloh ha, mis tuechli, mis portmone ond em ron sini telifonnommere... e mim triefend nasse tauchazog beni de mou zom divemaster ond hanen gfrogt, oeb aer mech woer zrog zom shop neh, ond oeb aer aech grad nones tuechli zom drufhocke hegi. em shop beni de zo dere frou ond ha si gfrogt, oeb si em ron sini nommere heigi. ron who? esch eri antwort gsi... de nochname hani saeubverstaendli ned gwoesst, geschweige denne vo de adraesse... aber die naetti frou het das met es paar omstaend foer mech usfendig gmacht ond ich ha de heiwaeg doch weder gfonde. naer semmer zwoesche de einzelne raegeschauer verschednigi straend goge abklappere. nelson bay esch de hammer, do besch eneret choerzischter zit amene andere strand, egal wi maengisch assd wotsch waechsle. ond es wemmlet do vo deufin. ond wallabies. ond koalas. es esch eifach en traum. i ha sogar mini eigeti wohnig gha ond be soooo verwoehnt worde, asi am liebschte grad blobe waer.

am noechschte morge het denne aendli dsonne erbarme gha ond esch weder foere cho, en voller pracht. frueh am morge send dmarika ond ich ofene baerg ue gklaetteret ond haend vo det us drondomsecht gnosse. onder anderem haemer vo det au weder delfin gseh. toderschoepft semmer de hei ond woeu de ron oeisi zmettagsandwich noni fertig gha het semmer haut no ofene andere hoger gone latte trenke. yam, yam. ofem witerwaeg haemer de ron met de sandwich ufglade ond send a hafe go fesche. da het jo vellech spass gmacht. am afang haemer of de meeressite gfescht, ond chum het de ron sini angle fertig gha hetter mini muesse onder de feuse foerehole, woeu dfluet si drondergspueut het. so han ich sini gnoh bes aer met minere fertig gsi esch ond sini wederom feschtghange esch...

nacheme wili eschs oeis de zbloed worde ond mer haend of dhafesite gwaechslet, wo den au tatsaechlech fesch foer fesch abesse het. de hogge esch nor gsi, ass die kingfisch so gross gsi send, ass si oeis jewils de hoge abbesse haend. grmpf. de ron het de mou sone babyfesch useghout womer weder drigruert haend, ond denne esches gar ned lang gange ond ich hanen kingfisch am hoge gha. de ron het denne de foer mech usezoge, de cheib het ganz schoen chraft gha. aues e auem het das naette tierli 7 kilo gha, ond trotzdem haemer en weder muesse zrogruehre woeu aer zchli gsi esch. aber chraft hetter gha... so semmer nach oeisem grosse erfoug haut e feschlade ond haend de znacht det gkauft. voraene send aber dmarika ond ich no ofenes welotuerli ond haend onderwaegs haut gmacht ond haend e de waeue badet ond glachet ond spass gha, send fasch ersoffe ond haend fasch oeises bikini verlore, aber meeeega cool esches gsi.

leider, leider esches de am noechste tag witer gange. am floghafe send saeubverstaendli dtraene gflosse ond ich hoffe woerkli gaaaanz fescht, ass ich weder a de ort zroggcho cha.

mis abentuer esch en brisbane witergange, woni aendli aendli aendli de patric weder troffe ha. scho chli komisch, nach so langer zit, die borschte het mer chum wedererkennt. nor de obe esch echli betruebt gsi woeu oeisi kollege os de schwitz gmerkt haend, ass si doch scho hoet achoeme ond ned erscht morn, so send natuerli aui plaen es wasser gheit ond mer het en onderkonft muesse organisiere. defoer beni am noechschte tag metem patric e australia zoo, da esch em steve irvin sine. da esch glaub de schoenscht zoo, woni je gseh ha. spersonau esch jewils meteme tier zo de luet ond het froge beantwortet oder konschtoekli zeigt. i ha jo ned schlaecht gstunet, woni oeper gseh ha meteme wombat a de leine gassi goh.

vo brisie us semmer denn en rechtig fraser island. es esch raecht en grommligi stemmig gsi, woeu de patric angscht om sis auto gha het. zueghe, es esch scho raecht speziell dor de sand zfahre, risigi loecher wos ned eifacher moeche ond 2x haemer fascht dnommere abgresse, woeu de onderbode acho esch. kei eifachi zit gsi. znacht haemer zaeutet ond ofem gasgrill kochet. esch rechtig schoen gsi. ab ond zue esch sogar en dingo choge verbiluege ond het gschmoeckt, wasses aech be oeis zaesse get.

am 23.12. haemer en airlie beach en saeguyacht boardet ond haend drue taeg ofem wasser verbrocht. na ja, wiehnachte haemer ned woerkli gfiret, trotzdem hets es betzeli dekoration gha, christmas crackers ond soeschtigi guddelis. aber wiehnachtsstemmig haemer ned gha. bem schnorchle haemer meeega veu fesch gseh, onder anderem sogar en maori, die send riiiisig. aber schwemme met dene stinger suits macht haut scho ke spass, mer haend usgseh wi teletubbies.

jez semmer en townsville. eigentlech haemer hoet woeu go d'jongala betauche, es wrack wo of ofnigem meer lit ond as eine vo de beschte tauchplaetz waeutwit geut. leider wendets aber zfescht ond mer hoffe, ass mer vellech morn no choene goh. droecket oeis ganz fescht de dume.

erschwaerend esch jez no dezue cho, ass dnati roeggeproblem het ond set geschter em spitau lit. mer hoffe, ass si hoet cha zrogg es hostel cho ond sech denne schnaeu erhout. de verdacht lit be diskus hernie. ganz wuescht. em spitau het si ganz veu tescht muesse oeber sech loh ergoh ond het wahnsennigi schmaerze gha. erscht met morphium eschsere de chli besser gange. mou luege wi da witergoht...

saeh, weni de humek no ergendwo fende de luege mer spoeter mou no, oeb mer da met dene fotene no choene regle. so schwaer cha doch da ned si, oder??

i woensche oeich aune en guete rotsch es noeie johr, i daenke ganz fescht a oeich ond stosse saeubverstaendli au of oeich ah.

winke winke
oli

hallow missie

saeh, do beni ase, er waeut vo de spuckende, forzende, gorpsende, armschwaenkende, chlini schrettli machende (obwou, da chani mettlerwile erchlaere, do hets eifach so veu luet, ass mer gar kei grossi schrett cha mache, die lehre da gar ned) ond eifach soesch komische luet.

am floghafe hani zerscht emou muesse aenehocke, ergendwie beni totau oeberwaeutiget gsi ond vorauem: i ha de usgang ned gfonde... ergendwie hanis de aber doch gschafft met mim gepaeck woni chum mag traege e mini onderkonft zcho, eis vo veune hochhueser zmetzt e de stadt. mis zemmer, reschpektiv mini chamere esch em 15 stock gsi. chammere woeu ossert mim bett genau no min rocksack platz gha het. ossertdem hets no es chaemmerli gha aus bad. d'duschi esch genau oeberem wc gsi, ond weni de spiegu ha woeue bruche hani mi muesse onnatuerlech verraenke. sehr speziell. was au sehr speziell gsi esch, jede morge am 5.50 het mis telifon gluetet. kei ahnig werom. ond chorz drofabe hets agfange nach kochetem aesse zschmoecke. sehr agnaehm. usecho beni jewils metem lift. wenner oeberlade gsi esch hetter amigs lut ghornet. do chonts ase oefters vor, ass de lift hautet, drue luet vorem lift stoend ond de ma wott istige *tuuuut*. guet, sini frau wo vellech es haubs kilo liechter esch stigt anstattdesse ih *tuuuut*. ok, demfau de grossaetti, vellech 600g liechter *tuuuut*. aber schinbar esches de versuech waert gsi. sehr loschtig. vorem igang zo minere onderkonft send jewils pakischtanis gstande ond haend mi taeglech oepe 6x akwatscht "copie watch, copie handbags, copie watch?" am obe send denn amigs no dzuehaeuter met ehrere war dezuecho, ase ehr gsaehnd, i ha enere sehr guete gaegend gwohnt.

em aflog nach hani bereits festgsteut, ass dgwaesser vor hong kong SEHR vou send. riiisigi tankscheff stoend schlange bes si abglade waerde. dezue gseue sech fescherbootli ond soeschtigi nossschalene. d'stadt saeuber esch ned andersch. i ha jo emmer gmeint ass zoeri scho raecht volle esch, aber ebe, be jo no nie en hk gsi. so veu luet hani no e mim ganze laebe ned gseh. ond kene goht der osem waeg. jez choene der oeich vorsteue, win ich jewils zerklet be. eimol beni no fasch onders auto (besser gseit: onder dautos) cho, woeui vor luter sueche ned raecht glueget han. da faegt do andersch... ond die sieche gaend no gas.

bes jez beni no gaebig eleige onderwaegs. es het au ned sehr veu nicht asiate do. akwatscht worde beni voneme studaent wo het woeue mini fuess foetele (aehae), ere studaentin wo mi bem igang voneme shoppingcenter abgfange het ond mi oeber das shoppingcenter usgfrogt het ond ame ca. 40 jaehrige italiaener wo sgfuehl gha het, i woeui es paar stonde met ehm verbrenge...

am erschte tag hani mi grad of de peak ufegwagt. das esch en wonderschoene ussechtsbaerg oeber hk, ond ich ha sogar gueti secht verwoetscht. hk esch meischtens sehr donschtig. es esch eifach oeberwaeutigend. hk esch ergendwo eifach zmettzt e urwaud baue. sehr faszinierend. ond ich mues saege, assi hk ned eso gruen erwartet haetti. dgaegesaetz send auerdengs ganz krass. vo super modaern bes zo enorm arm fendet mer aues. zom teil haend dluet sogar mondschoetz ah ond ich be scho so wit asi be jedem wo hueschtet sgfuehl ha, asi mi meteme toedleche virus choent astecke.

metere ganz loschtige autertoemleche faehre beni vo kowloon nach hk island cho. ganz schnaeu ond nor foernes paar rappe. todesmuetig beni ene bus gstege ond nach repulse bay gfahre, nie secher oebi de raecht bus ha ond woni eigentlech mue usstige. saeubverstaendli beni jewils di einzig tureschtin gsi ond of de busfahrer hani mi ned woerkli choene verloh. guet, repulse bay. mer seit de schoenschti strand vo hk. ganz loschtig esch jo gsi, wi sech die chinese verhaute. di meischte send am foetele gsi, di andere send kreischend, gigelend ond schlechtwaeg osem huesli gsi. en amerikaner esch (naebe es paar anderne wo au am soennele gsi send) e sine badhoesli am soennele gsi. i ha mi praechtig amuesiert, die chinesische manne haend chum no choene waeg luege, si send so faszinert gsi vo dem ma sine broschthoor. es paar send sogar stoh blobe ond haend en eifach agstieret. zom gloeck heter gschlofe...

em bus zrogg beni de chli igschlofe, aber ned lang, hender mer het en frau so lut gorpset asi verwachet be. sglichlige metem liftboy er onderkonft (de stoht de ganz tag det ond droeckt de leftchnopf), de gorpset eim eifach froeschfroechlech es gsecht ond grenset. en herr em azog forzet mech doch eifach em starbucks ah. ganz geschweige denn vo au denne, wo staendig ergendwo ofd stross spoeize. hoet hani sogar en ma gseh, wo sech eneme reschtorand am tesch rasiert het.

e denne paar taeg en hk hani sehr veu erlaebt. i be onder anderem au of lamma gsi, en ensle vor hk, woni omegwanderet ben, gaaaanz elei. wonderschoen, ond vorauem genau da womer brucht, wemmer so lang enere sone risige stadt esch. au beni be de 10'000 buddhas gsi, obwou ich wette asses no meh send. be chum no zom stuhne us cho, die waerde beschaenkt vo aune site. ond s'schlemmschte, met denne froecht woni oeberau gsuecht ha. es get mc donalds ond starbucks a jedem egge, aber froecht chaufe steut sech as e rise useforderig dar. em oebrige gets do jede lade, jedi marke, nuet faeut. es wohrs schoppingparadies.

loschtig esch jo au gsi, woni musbeielei enes chinesischs mettagsreschtorand be goge aesse. die haend mech aglueget ass chiem ich vom planet mars. met zeige hani de aber da choene bsteue woni ha woeue, obwou ass ich mer das sweet and sour doch echli andersch vorgsteut ha. spoetischtens met mim coci dezue hani mi aber goutet, die trenke doch aui tee...

geschter zobe hani mer en peking aente gleischtet. da het eifach no muesse si. i ha jo scho befoerchtet, asi e ganzi aente vor mech gsetzt bechome, wass sech denn zom gloeck aber aus en errtom erwese het. de choch hoechschtpersoenlech het si vor mim tesch setziert. zo minere grosse erliechterig.

am geschtrige tag hani no de schock vo mim laebe gha. ofem feschmaert hani feschtgsteut, wi die fesch do onde verchaufe: die schnide de fesch laengs e zwoei heuftene, so ass shaerz emmer no schloht. nor so escher no ganz froesch... so zapplet er sogar no. be de groessere fesch schnides de chopf ab, shaerz esch grad henderem chopf. de fesch kiemet ase emmer no ond bewegt sech ofem praesentiertesch... esone naetti feschverchaeufere het mer denn doch tatsaechlech sone chopf vord fuess gruert. gsproetzt hets sowiso vo aune site... wuerg... am ladies market toents denn weder vo aune site: 'hallow missie, copie watch, copie handbag?'

es esch verrockt, i haetti no jenschtens zverzeue, aber enes paar stond goht mi flueger en rechtig heimat: AUSTRALIA. Morn am morge beni bereits en sydney.

aber i be secher ass der met mim mondart es wili beschaeftiget si waerde, drom esches das foer hoet gsi.

en decki omarmig ed schwitz osem weude, weude hong kong
oli

ps. da met de fotene hani noni usegfonde. ich werde mech en sydney om das koemmere.

Jez gohts los!!

Komisch, ergendwie hanis ächt noni realisiert, aber no 2 1/2 x schlofe ond denne, denne flüg ich tatsächlech ab!!! Jedefaus goht am donnschti e auer herrgottsfrüe min flüger...

sadje säge het bereits agfange ond bes jez hani mi no rächt guet chönne haute, vermuetli ebe wöus mer noni bewosst esch. aber fröie tuen ich mech!!!

snöchscht mou wärde der os hong kong vo mer ghöre, mou luege was det för spannendi gschechte of öis warte ;o)

ich dröcke öich nomou ganz fescht
sReiseföddli

die letschte woche vor minere abreis

Säh, d'Wohnig esch abgeh, s'Asyl bezoge, d'Chatze e de Ferie, s'Studio ond de Job gköndt ond jez beni eigentlech parat zom goh.

Es esch es komischs Gfühl so "Heimatlos" zsi ond em Provisorium zläbe. Aber a das werd ich mech wohl oder übel müesse gwöhne, die nöchschte 6 mönet werd os mim 30 Liter Backpack gläbt! Jede Tag gets no ergendwo öpis zorganisiere, sigs di erschti Onderkonft en Hong-Kong, Ombuechige vo mine Flög, de Termin förd Stürerchlärig be de Gmeind verschiebe, d'Omfauversecherig abschlüsse, es Freizögigkeitskonto eröffne, Gäud wächsle ond, ond, ond. Wenni nor nüt vergesse...

Mini Gfühl send echli gmescht. Einersits chanis chum erwarte besses ändli, ändli losgoht, anderersits weni mers gnöier öberlegge esch de Gedanke doch es muhlmigs Gfühl, asi e drü Woche enere riiise Stadt wi Hong-Kong si werde, musbeielei ond "wäutfrömd". Hoffentli werd ich e dere arg öberföute Stadt ned öberrönnt ;o)

Zor Ablänkig gets aber zerscht no Bsuech os Down Under. Die arme Aussies chöme diräkt vo de Trope e öises nätte Novämberwätter. För ehri Akonft het de Wätterbrecht 3 Grad ond Schnee vorusgseit ;o)

Jez geuts aber no es paar Arbetstäg hender mech zbrenge ond denne gohts baud as Adie säge.

Wönsch Euch en schöne Tag ond bhautet öich warm
oli