see ya...

veu zgschnaeu esches verbigange, mini woche en cairns. deheime. i ha min rocksack weder echli ufgroeschtet, di erschte sache heigscheckt ond eifach echli usgruit. sbarnse haend sech uh veu zit gnoh ond mer send onder anderem a de lagune gsi ond haend es bbq gmacht, emene resort go znachtaesse ond em usgang gsi beses fasch weder heu worde esch.

sbeschte esch aber definitiv saesse, d'duschi ond de aussi-akzaent gsi.

am morge hani jewils dchend ed schueu brocht ond ha si am nomi weder abghout, i kenne jez ganz veu noeii luet, aues mamis ond papis ond grosseutere :o)

ich hasses hoet aune tschuess zsaege ond e flueger nach singapur zstige...

PNG - expect the unexpected

zroggzcho nach cairns esch natuerli de hammer gsi. die wo mech kenne woesse genau, ass das mini zwoeiti heimat esch... swedersehe met sbarnse esch de hammer gsi, obwou si scho chli mued gsi send vom velle bsuech wo si oeber wiehnachte gha haend. mer send go tepanyaki aesse, woni doch sooooo gaern ha. dnati ond de patric haends zwar gar ned loschtig gfonde, es hett vellech echli veu fesch gha ;o) die beide haend es wili gnueg vo experimaent...

scho gli haemer de muesse tschuess saege, de haenni het sin flog nach perth en agreff gno ond dnati ond dmichelle send witer nach sydney gfloge. de raeschte vo oeis, de marko, de patric ond ich send foer vier taeg ofs tauchboot ed coral sea. da esch definitiv de hammer gsi. zom erschte mou hani die ultrageftige meeresschlange gseh, ond die cheibe send so noeigierig, ass si sogar om dtaucher omeschwemme. scho chli speziell... sbeschte esch aber definitiv s'codhole gsi, wo mer riiiiiisigi cods gfuetteret haend. spersonau het gseit, mer soeue oeisi fenger verstecke, die cheibe gsaend ebe ned eso guet ond verwaechsle gaern ehres aesse demet.. womer amene obe vor lizzard island gankeret haend esch en hei of bsuech cho. aer het oeis eso guet gfonde, ass aer sech sogar vo mer het schtreichle loh vom boot us. aber kei angscht, i glaube es esch ned woerkli en gfoehrleche gsi. grossi zaeh hetter aber trotzdem gha. silveschter haemer au ofem boot verbrocht, auerdengs ned witer spektakulaer, stauche macht eeeextrem mued... zroggcho semmer de meteme nederflog-flogzueg, diraekt oeber sreef, da esch uh cool gsi.

naer esches gar noeme lang gange ond ich ha mi vo aune muesse verabschede, saeubverstaendli ned ohni traene, es esch forchbar gsi. ned zletscht woeus erscht morge am saechsi gsi esch... da esch vermuetli au die zit gsi woni langsam echli naervoes worde be. ich ha grad emou min flog nach port moresby buechet ond soesch nuet... am floghafe het mer oeper es taxi bsteut wo ned cho esch, aber de fahrer vom holiday inn het sech mer erbarmet ond mech ene onderkonft gfahre.of de fahrt esch mer sofort ufgfaue, assi enere totau andere waeut acho be. die goend det ned metem hond go laufe, sondern met de soei... tereti strosse gets ned woerkli ond en rechtigi stadt esches definitiv au ned. me es paar hoetli ond veu, veu draeck. mis hostel esch es hostel vo de chele gsi ond entspraechend send det luet gsi. es paar jongi amerikanerinne haend mi met ofene spaziergang ed stadt gno, aber definitiv nuet wo mer muesst erlaebt ha. i ha mi ned emou getraut, mini kamera metzneh... alli haend oeis agstieret. sehr speziell esch debi, ass die betelnut chaetsche wo ergendwie ufputschend woerkt. dezue naend si es pouver ond es stoeckli vonere pflanze, asses einigermasse gnuessbar esch, aber das ganze henderlot es fuerrots muu. gseht echli zombimaessig us.

zom gloeck beni am noechschte morge frueh witer of lae gfloge. di wisse waerde am floghafe fasch ned kontrolliert, wasses zwar foer mech sehr eifach gmacht het, aber glich echli mulmig gsi esch. aber aui send sehr heufsbereit gsi. en lae am floghafe hets enart es feischter gha, wo si sgepaeck doregreicht haend, mega loschtig. ond bem usgang esch eine gstande, wo de gepaeckzeddu metem zeddu am gepaeckstoeck vergleche het. ich be mer vorcho wi ergendwo 100 johr zroggversetzt. osserhaub vom floghafe send veu bus gstande wo passagier ed stadt brenge. jede het mech woeue e sim bus ha ond ich be fasch echli oeberroent worde. drom hani mer es paar bewaffneti guards usgsuecht wo mech eneme vergetterete bus zo minere onderkonft brocht haend. weder e onderkonft vo de chele... en empfang gno worde beni vonere duetsche familie, wo det onde aus aerzt schaffe. det hani no gmeint, si sige sehr naet...

am obe hani den min hoettlinochber kenneglehrt, de andrew os noeiseeland. sehr en naette borscht, fasch glich aut win ich ond aer het aus ingenieur es projaekt foer wasser ond strom eneme chline dorf wit abglaege vo jeglecher zivilisation. de noechscht tag haemer zaeme verbrocht ond haend es paar kommissione gmacht. ofem maert hani onder anderem gseh, ass die floghoend aesse.. yak. ich ha eigentli metem scheff witer woeue, ha aber of de bank e kei gaeud oebercho ond be vou e de scheisse gsi. chorzerhand haemmer den beschlosse, as ich met e das chline dorf gohne.

so beni am noechschte tag emene speedboat (e mehbesseri nossschale) ghocket, ganz verchroeglet woeu soveu luet metgfahre send, ond ha die wonderschoeni natur vo papua new guinea gnosse. mer send au a fescher verbigfletzt wo e ehrne traditionelle kanus ofem meer gsi send. wahnsennig spannend, wi gseit, wi vor 100 johr. en finschhafen acho haemmer de es trucktaxi gno ond send hendedroffe oepe 1.5 stond baergufgfahre. oeberau haend oeis luet zuegwonke ond froeid a oeis wisse gha. scho no spezieu. am letschte dorf acho haemer denne zfuess witer muesse, woeu dstross noeme witergange esch. da heisst, mer send ca. 4 - 5 stond dore urwaud glofe, es esch gschleffrig gsi wine more ond oeberau hets aerdroetsch gha, rechtig onheimlech. es esch au ned lang gange ond es esch donku worde, so donku wi enere chue, ond mer send met oeisne sternlampe wacker witerglofe. aendlech en faceu acho (aui send saeubverstaendli scho em bett gsi) semmer e oeisem hoettli (wi zo pfahlbauers zite) vorem fuer am bode ghocket ond haend znacht gaesse. de afang voneme auptraum...

am noechschte tag esch denn darbet losgange ond mer send of erkondigstour dors dorf, wo eifach elei ergendwo em dschongu stoht, ca. 2000m oeberem meeresspiegu. aui chend vom dorf send so osem huesli gsi, ass si hender oeis haerglofe send, gigelet haend ond kueschelet. naer semmer wederom dore dschongu zo de quelle glofe. i be fasch gstorbe, so erschoepft beni gsi. es esch riiiiesig steil ond gschleffrig, maengisch haemer muesse chlaedere ond hebe het mer sech au ned so rechtig choene. aber definitiv sehr es spezieus erlaebnis. wos de agfange het raegne semmer enes hoettli ghocket ond haend fuer gmacht, erschtens zom warm ha ond zwoeitens ass eis vo de chend het choene sin frosch broetle, bevors en gaesse het... bevor mer de zrogg es dorf glofe send. es het ase weder strom no fluessend wasser gha, was foer oeis beduetet het ass mer znacht wenns donku gsi esch haend ed cheuti use muesse ond oeis ondereme baechli waesche. woerkli wohr. ond das ganze hets ned besser gmacht, wo mer einisch en riiiesigi schlange atroffe haend. am noechschte tag beni chrank gsi, en vercheutig vom groebere wo mi foer di noechschte drue taeg flachgleit het. so hani ase au min gebortstag verbrocht, elei em hoettli e mim schlofsack... emmerhin hani es gschaenkli oebercho vom noeiseelaender. en cd vom letschte projekt, woni saeubverstaendli noni ha choene aluege. a dere steu moecht ich mech au foer aui gloeckwoensch ond sms bedanke, wo bestemmt losgscheckt worde send, aber mech nie erreicht haend, woeu mis natel kes betzeli empfang gha het e minere ganze zit en png. a eim morge hets froesche kaffi geh, aegstra foer oeis trochnet ond groeschtet. da esch obercool gsi. augemein, i ha glaub no nie so froeschi sache gaesse. auerdengs hets jede tag meh oder weniger sglichlige geh, zom zmorge, zom zmettag ond zom znacht. i ha foeres wili gnue vo sweet potatoes, banane ond ris. ase ruedi, vo mer us muesch am sonnti nie meh ris choche...

aui luet send so oepis vo froendlech gsi ond haend riesig de plausch a oeis gha. mer send nie eleige gsi, hoechschtens of de bushtoilet, wo si aegstra foer oeis konstruiert haend. i ha jez ganz strammi oberschaenku.

aegstra foer oeis haend si es sing sing organisiert, da moeche si eigentlech nor a spezielle firtige, aber oeise bsuech esch schliessli au speziell gsi. manne ond buebe e baschtroeckli haend zo megacooler traditioneller musig tanzet ond oeis weukome gheisse. ich ha mech natuerli sehr geehrt gfuehlt.

ich ha nach minere vercheutig noeme met de manne metmoege ond ha mini raeschtleche taeg met de fraue vom dorf verbrocht. i be ed chele gsi go klatsche (ond de andrew het mer naer gseit, aer glaubi aer heig die chaefer onder de hut vo de chele...), be usgroeschtet worde met traditioneller chleidig ondeme buschmaesser ond mer send e garte go sweetpotatoes usgrabe (am steilhang), mer haend zaeme ondereme wasserfau badet ond oeis gwaesche ond ich be zom zmorge enes anders hus iglade worde ond ha gschaenkli oebercho. oepis vom beschte send die gkochete eier gsi, en wohri abwaechslig zo minere diaet.

a eim morge hani es paar verarztet met schnettwonde e de fuess. die laufe do jo aui barfuess ond da esch ned ganz ongfoehrlech. es het noeme woeue ufhoere, aber mettlerwile beni rechtig guet ;o)

es esch au megaspannend wies do met de familie lauft. deutere haend zaeme es hus, ond dchend laebe getrennt nach auter ond gschlaecht zaeme eneme hus. jede luegt zo jedem. gkochet werd a eim ort ond naer a die verschednige familie verteilt. gsteut werd onderwaegs bem laufe, mer klappt eifach dbroscht ufe ond schend cha trenke. somet hette die diskussione vo waege steue e restaurant au es aend. aues lauft ergendwie veu eifacher ond ich ha sgfuehl, ass mer en europa echli schwaer tuend. mer esch do ned eso oebervorsechtig ond loht dchend echli meh saeuber mache. es werd au ned veu bruelet, dchend lache extrem veu ond send zfrede. obwou ass si hongerbuech vo de eisitige ernaehrig haend.

a eim tag beni ad zeremonie foer die tote gange. es werd au gsonge ond gklatschet, de pfarrer seit es paar wort, aber sbeschte vo auem esch definitiv gsi, ass si es soeili gmetzget haend (die send sehr koschtbar ond waerde nor zo seeeehr spezielle zwaeck gschlachtet) ond aui devo oebercho haend. yummie. dfraue haend au nomou en zeremonie aegstra foer oeis gmacht, wo se sech blueme ed hoor gsteckt haend ond foer oeis gsonge ond tanze haend. am schloss haemer nomeh gschaenkli oebercho, je zwoei billums (traditionnelli taesche) ond e rise bond banane. cool.

serscht mou en verlaegeheit grote beni wo de andrew gfrogt het, oeb ich choeni de ladys lehre naeie... sini froendin het schnettmoschter, stoff ond baendeli ond zueg gscheckt ond aer het em aernscht gmeint, ich soeui da oeberneh... es paar tag spoeter esch denn aernscht drus worde ond ich ha met de ladys e de chele es chleid gnaeiet... ok, am schloss het es meitli tatsaechlech es noeis chleid gha, aber i saege oeich ganz em vertraue, be oeis woer niemer demet omelaufe. vellech sogar ned emou det... aber es het spass gmacht met de fraue zaemezschaffe ond ich ha definitiv e gueti zit gha. i be sogar a orte gsi, wo no nie voraene oeper wisses gsi esch.

was mer echli verleidet esch esch gsi, ass sech do set de missionare aues omd beble ond dchele dreit. i ha mi ned emou getraut zsaege, assi noeme e de chele be ond ha muese e notlueg zor heuf neh ond saege, asi maengisch ed chele gohne. woerkli ganz extrem. ossertdem hani oepe tusigmou verzeue muesse, wieveu gschwoeschterti asi han ond oeb si ghuerote send etc. do treit sech ase aues om dchele ond dfamilie.

nach zwoei woche em dorf semmer weder abemarschiert. ofem waeg metem trucktaxi semmer aneme speufaeud gfoeut met luter fraue ond meitli verbigfahre, ond wo si mech gseh haend haend aui ehri haend ed loft gruert, send e mini rechtig gspronge ond haend gjublet ond gjolet, aus waeri en popstar ;o) natuerli hani wi weud zroggwonke ond oeber au vier bagge gstrahlet.

wo oieses boot (demmou skommerzielle ond ned speedboat) losgfahre esch esch no eim e senn cho, ass er doch au no met wot, ond woner agsetzt het zom sprong oeber swasser heten no eine ghebt ond de arm cheib esch es wasser gheit. vellech mueni no saege, ass die vo de baerge ned choene schwemme ond mer haend baud no angscht gha, ass er vertrenkt. aber ergendwie heters de zrog zom pier gschafft ond en andere heten enere hausbraecherische aktion zom wasser us ghoufe. de andrew ond ich haend maengisch nor no choene de chopf schoettle ond ich glaube aer esch froh gsi, hetter ned nor iheimischi om sech ome gha.

waehrend oeisere ganze zit em dorf haend de andrew ond ich vo pizza troeimt ond aendli zrog en lae esch oeise traum wohr worde. mer haend sini gebortstagsparty emene tuere hotel gfiret, sganze team (vo iheimische) esch iglade gsi. loschtig esch jo gsi, ass eine vo de borschte no nie pizza gha het (i glaube kene vo aune), vor honger fascht gstorbe esch ond naer mega hoech gkoeiet het woeuers ned gaern gha het ;o)

de kiwi ond ich send zaeme zrogg of moresby gfloge, vo wo us aer nachaene hei esch. am floghafe haends aui vonand gno. min fetti backpack haends echli gkloepferlet ond mi gfrogt, oebi e bombe dene ha, de haends mi witerloh ;o))) es loschtigs vouk.

em flogzueg of alotau hani de jeff troffe, en expat os australie. aer het mer gseit, ass dfamilie vo sinere frou es hostel of eine vo de ensle het. er het mer au abote, mech met ed stadt zneh. wo aer e mini vorgsehni lodge esch go froge, oeb si platz haend ond die nei gseit haend het sini frou chorzerhand entschlosse, asi zo ehne soeu cho. i ha weder emou wiehnachte gha. defoer beni am noeschte tag am spohte nomittag meteme working boat en rechtig ensle galahi los. es esch de hammer gsi, ich han delfin gseh, en wonderschoene sonneondergang erlaebt, gueti gsproech met iheimische gha ond tusigi vo staerne gseh. mer seit, as die gaegend foer haexerei bekannt esch. ond woni gseh ha, wis wasser fonke sprueht hani gwoesst, asses stemmt. ;o)

of galahi laebt nor ei grossi familie. es munzigs doerfli ond es chlises hostel. i ha sogar min eigete tourguide gha, de michael. aber i glaube definitiv sbeschte esch mis wc gsi, es hoettli wo oebernes broeggli erreichbar oebers meer baue gsi esch. da het jo vellech spass gmacht. jedesmou hani fesch beobachtet ond einmou sogar en tentefesch gseh. de tag dor beni metem michael oeber sreef paddlet e oeisem traditionelle kanu ond mer send vom kanu us go schnorchle, wonderschoen. am morge frueh beni jewils vo de goeggu gweckt worde, die haend rechtigi konversatione gfuehrt oeber densle. die einzige wo min frede echli gstoert haend...

a eim tag hani sdinghy gmietet ond mer send of samarai, sfruechere zentrum vo milne bay befors dauschtralier em WW2 os angscht vorere japanische invasion wo nie cho esch totau zerstoert haend. ossertdem semmer no ofere andere ensle gsi gone chele aluege, wie choents au andersch si. eigentli hani zor manta ray chleaning station woeue go tauche, aber es esch mega schwaer en tank zfende. so hani da leider leider muese vo minere lischte striche.

nach drue naecht beni zrogg ofs feschtland. de usflog esch sis gaeud definitiv waert gsi, so oepis fredlechs hani no nie erlaebt. ond de fakt asi weder strom no warmwasser gha ha (mini duschi esch en chessu met wasser gsi...) esch gar ned stoerend gsi, sondern fasch echli romantisch. saesse esch au besser gsi, i ha sogar saeubergmachte donughts vo oeberem fuer oebercho. ond froesch gfangne tentefesch. ris ond sweet potatoes ghoere zom standart.

zrog en alotau beni e de napatana lodge onderbrocht worde zomene aegstra backpackerpris. i ha en enere froeidesprong gmacht woni mis eigete bad met duschi gseh ha, sogar en chueuschrank ond en toaschter hani gfonde. en traum. of de terrasse hani en malaysier troffe wo grad froesch acho esch. am nomittag hanen met ed stadt gnoh woni ha woeue knabbereie ond zmorge chaufe. er het ombedengt woeue zahle ond nacheme schueche protescht hani dankend agnoh. au sbier heter ombedengt woeue zahle. aer het druf bestande ass ich aues zo mer e chueuschrank neme ond wo mer de gaege de obe sbier foeregnoh haend het aer gmeint ich hocki jez met ehm e mis zemmer ond luege faehrnseh. aer het scho dstueu inegnoh ond ich hanem gseit, aer choeni gaern faehrnsehluege, aber ich hocki veruse. aer esch de zom gloeck au cho... defoer escher de chli onagnaehm worde ond nachdem ass aer mech gfrogt het, wiveu ass ich choeni suffe ond oebis woeui teschte (i sigi secher), decht gfougt vo de konversation hani mi met de usred devo gmacht, asi goech go telifoniere. wasi au gmacht ha, auerdengs nie meh zroggcho be woeui a de bar be go witersuffe ;o)))) det hani uh cooli expats ond iheimischi troffe, ha e megagueti zit gha. \

am noechschte morge hani mi ofe waeg enes luxuxresort gmacht, woni ha woeue go tauche. bem erschte tauchgang haemer ganz komischi kreature gseh, ond haette mer ned en fuehrer debi gha hetti auwae gar nuet gseh. bem zwoeite tauchgang semmer beneme massive alte reef gsi,da esch ohsennig schoen gsi.

de noechschti tag beni zonere andere lodge em urwald. met mim privatfuehrer, de bsetzer, beni ane bach wo die iheimische aal gfuetteret haend. massivi aal, die send decker aus min oberarm gsi. denoh hani es scheff wo em ww2 gsonke esch beschnorchlet, da esch fasch echli dramatisch gsi.

am obe woni ed bar cho be het mi eine gfrogt, wasi ztrenke woeui ond ich ha wiswi bsteut ond be zo ehne aeneghocket. es het sech usegsteut ass da de bigboss vo dere bauferma esch, woni bereits luet devo kenneglehrt ha. di saebe send denn au no cho ond de bigboss het mech zom znacht iglade met ehne ond mer haend die ganz nacht of choeschte vo de ferma gfiret. esch soooo loschtig gsi. nor schad beni am noechschte tag zroggfloge, soesch waeri zom zmorge ond naer zom fesche iglade gsi. aecht gueti tuepe.

was au no raecht speziell gsi esch, es paar highlanders haend sech troffe zom ehri onstemmigkeite zbespraeche. dhighlanders send foer ehri kaempf bekannt ond wenn ehne oepis ned passt de schuesses enand ab. so eifach. eine vo dene staem esch er glichlige lodge onderbrocht gsi win ich. eine vo de landbsetzer het mi sogar zoneme drink iglade, eifach woeui echli froendlech gsi be. aber ab ond zue send die cheibe sogar onderenand ofenand los ond haend gstrette. raecht amuesant gsi ;o) schinbar haends a eim tag sogar en schuesserei gha.

aues e auem beni positiv oeberrascht. dmedie moeche das land eso schlaecht, so schlemm esches gar ned. i ha mi ossert en port moresby di ganz zit secher gfuehlt ond ha dluet aus sehr sehr froendlech ond heufsbereit empfonde. i woer au jederzit weder zroggoh.

zrogg er zivilisation waerde der secher weder echli huefiger vo mer ghoere. i woensche euch e guete start ed woche ond hautet dohre stiff...

bye
oli