aues raege oder was?!

aendli, aendli weder emou en beach... ko lanta esch mis noechschte ziu gsi. eneme chline hoettli am strand semmer ondercho. ganz schoen romantisch, vorauem weu s'bad im 'naebezemmer' onder freiem hemu gsi esch, bepflanzt met exotische pflanze ond chesbode. de fakt ass mer en groooossi mus em hoettli gha haend esch auerdengs weniger attraktiv gsi.

es esch do aues raecht tuer, ossert em bier, ond da esch eigentli aues was zeut... ond ossertdem hets do oeberau, a jedem egge mendischtens 4, 7eleven's, was slaebe enorm erliechteret. e eim hani sogar schwyzer frey schoggi gfonde, be uh oeberrascht gsi!! ha ned gwoesst, ass de migro au exportiert...

womer met oeisem gmietete toeff oeber densle gfaegt send haemer oeberau die tsunami evakuations-routene beschrebe gseh. schint, ass haet sech do einiges veraenderet. elephante trekkings schine do au sehr beliebt zsi. womer anes paar abondene elephante verbigfahre send haemer beschlosse, banane zchaufe ond zrogg zcho, was mer de au gmacht haend. so hani aui banane e mine haend gha ond be vorene uuuuuuuh grosse elephant gstande, mega muetig. i ha de chli afoh fuettere ond da esch eigentli ganz loschtig gsi, weu de elephant het mini banane met sim roessu ganz, ganz fin oss minere hand gno. de mark esch ned de gschnaeuscht ond het gmeint, i seui chli warte bes aer metem fotiapparat parat esch. aehae. de bloede elifant esch so girig gsi, ass aer mech met sim roessu es gsecht ghaue het, schinbar hets ned schnaeu gnue choene goh... bloede elifant de...

nach dere onschoene erfahrig haemer beneme reschtorant met secht oebers meer ond einige vo de naebeensle aghaute. fredlech oeises bierli trenkend ond dussecht gnuessend hani mini fuess betrachted ond en komischi form of/e mim zeche entdeckt. de mark het ganz scharmant gmeint, das sig en worm. ha, usglachet hanen, ond oeberhaupt, was weiss de scho?! aer het mer agfange vo sim kolleg verzeue, wo erscht grad es foeteli es internet to het, ond de saeb het effektiv en worm gha. ui, oeber aech doch raecht het?! ab e spitau ond go froge. tatsaechlech, i glaubes ned, ehr glaubeds ned, i ha en WORM e mim zeche!!!! enere apitek hani ei tablette oebercho, wonem seu de garus mache. i be gspanne...

nach dem tag haemer oeis metere pizza weue belohne, jedes mou wemer a dere pizzeria verbigloffe send hets eso yummie gschmoeckt. aber steuet oeich vor, wo mer bsteut haend esch oeis gseit worde, ass de mozzarella usgange sigi... wer om hemmus weue bitte esst pizza ohni mozzarella?! da esch jo wou de grond werom ass mer pizza esst, oder?!

nachdem ass mer oeis ergendwo gfuetteret haend semmer zrogg e oeises hoettli, esch doch en lange tag gsi ond scho spoht. vo baeuende hoend semmer empfange worde ond of oeisem baukoenli het es buesi gschlofe. aui hoend, mer rede vo 5, haend sech zuenere gseut ond haend det gschlofe. schinbar haends au di ganz nacht baeuet, i ha aber nuet ghoert, pfuset wine stei.

nacheme spohte zmorge oeberem wasser semmer vom minibussli abghout worde, wo oeis nach krabi brocht het. krabi, ganz schlaechti erennerig, i ha naemli naeben internetkafi e oeisem hostel gwartet ond es het mi gaaaaanz forchbar afoh bisse, zerscht hani jo gmeint, es sige moskitos womi uffraese, woni de aber feschtgsteut ha, asi ganz veu bess a eim ort ha, naemli a beidne ellboege ond am roegge, hani schnaeu gwoesst, ass da muend bedbugs si... i be jo vellech verrockt worde, ond da het weeeeeh toh!!! mini stemmig esch ofem nouponkt gsi...

grad am noechschte tag semmer aber via longtailboot witer of railay, eine vo de vellne ferieort vo krabi saeuber. eigentli meh foer die mehbessere tureschte ond ned foer backpacker wi mer. swaetter het gar ned guet usgseh ond ned lang esches gange ond mer send ned nor vom meerwasser wo es boot gsproetzt nass worde, sondern au vom raege. eneme risige gwetterstorm semmer en railay acho, ond de bootsma het gmeint, mer seue schnaeu mache, gli chiems no feschter!! es het aues nuet gnoetzt, bes ofd onderhose semmer verscheffet worde ond nass wi mer gsi send haemer em erschte resort onderschlopf gfonde ond haend em reschti gwartet, beses nach stonde aendli ufghoert het schoette. e dem status semmer be normalem schwitzer raege gsi. trotzdem, mued vom warte haemer oeisi rockseck packt ond haend emene resort onderschlopf gfonde. mer haend oeis echli luxus goennt... es wonderschoens modaerns zemmer, met chueuschrank, faehrnseh, en pool ond zmorge inklusiv, das ganze foer sautueri 21 franke pro zemmer. de ganz ort esch ofd resorttureschte usgrechtet ond somet woerkli tuer, daessensprise send scho sehr noech a oeisne eigete deheime gsi.

schad esch gsi, asses fasch emmer graegnet het. railay esch so wonderschoen, au die wonderbare feuse wo zom wasser us choeme, wi of de beuder wo mer oeberau vo thailand gseht. sehr fotografisch...

a eim vo de chline straendli hets en chlini hoehli gha, dprincess caves, wo ganz en komische shrine gsi esch. aues esch os hoelzerne penise bestande... sehr komisch... i ha mers natuerli ned choene verkneife ond ha uuuuh veu foeteli gmacht. zeigi euch den aui. mer send nochli am strand omeghanget ond haend de chlaederer zuegluegt, wo mer ploetzli vo affe omzenglet gsi send. e riiiisigi affefamilie esch a strand abecho ond het sech vo all dene tureschte met banane ond maischoeube fuettere loh. si haend eim sfraesse os de hand gno, so noech sends cho. esch ganz loschtig gsi, aber i mue ehrlech zuegeh, ass i noeme gross reagiere, weni ergendwo en aff gseh, mer gwoehnt sech haut ergendwie dra. trotzdem, loschtigi tierli.

gaege obe semmer am strand oeber feuse gklaetteret zoneme strand met resorts, wo ohni boot nor waehrend de ebbe zuegaenglech send. mer send auerdengs scho raecht spoht gsi ond ich be chli besorgt gsi, ass mers ned raechtzitig vor de fluet zroggschaffe. mer send woerkli nor chorz blobe, haend es paar chlaetterer zuegluet ond send weder omgkehrt. ond woerkli, dfluet esch schnaeu cho ond ich be klaetteret wi weud e mine saudomme crocs, die send e soenige faeu genau nuet waert. met es paar chratzer ond schnettwonde haemers aber heil ond troche zroggschafft... be schoen erliechteret gsi!!

railay esch woerkli sehr schoen, es het haut emmer graegnet, aber definitiv en schoene, ruhige ferieort. nor veu ztuer.

metem longtailboot semmer drom witer of ao nang, en witere strand do e dere region. chum echli ofem meer osse hets weder es boot ine gsproetzt, aber de mark ond ich send zforderscht vore ghocket, aglaehnet a aui gepaeckstoeck ond mer send aus einzigi troche blobe. besser, mer haend gseh, wi au di japanische tureschte bes ofd onderhose nass worde send ;o)da esch loschtig gsi.

ao nang saeuber esch ned de hit gsi, obwou ass do au sehr veu tureschte gsi send. werom hani auerdengs ned ganz verstande, so attraktiv esches definitiv ned gsi. ossert vellech, asi mer noeii schue gkauft ha ond mini crocs wit fortgruert ha ond es mega cools gfaeuschts billabong chaeppi gfonde ha. de mark het mer das ganze schoen abeghandlet ond ich has nor no muesse zahle. da esch tip top gsi.

was weniger loschtig gsi esch, mer haend en aute fette weschtleche ma setzend ofem baukon vo sim hotelzemmer gseh, naebe ehm stehend en jongi thai frau wo sech haubnackt a ehm grebe het. aeeeh, ke schoeni beuder. ond das enmette vom stettli... en andere aute sack (pardon, aber es esch passend) esch obenohne of sim moped omedueset ond het er waeutgschecht omegfluechet waege de autofahrer. obenohne waer jo vellech grad no gange, aber de cheib het mendischtens 200kg ofd woog brocht... uaarggg!

guet, da send gnueg news gsi foer hoet. hett auerdengs no meh... aber goend jez es wochenaend, hoffe ehr haends au verdienet ;o)

hey, gnuesset oeichi freie taeg ond gaend aues!!

bes gli
oli

di letschte taeg en sumatra

frue am noechschte morge esches losgange ond es taxi het oeis (ned bevor mer weder ome pris haend muesse strite) a hafe gfahre. es wonderet eim ned, ass aceh so vom tsunami troffe worde esch. di ganz stadt gseht us winen taeller, flach of sehr grosser flaechi. schinbar haend noni aui luet e noeii onderkonft ond sehr veu werd nach wi vor baue. di laere grondstoeck send gspickt met bauschott, nach wi vor zuege vom tsunami. es paar hueser send stohblobe ond mer gseht genau, wi salzigi wasserwall a de mure gnaget het. i froge mi aernschthaft, wo au das gspaendete gaeud he esch... nach wi vor herrscht en art armuet en form vo onderkoenft, of de andere site fahrt mer do extrem tueri, noeii auto ond laebensmettu send exorbitant tuer.

of pulau weh, en vorglagereti ensle, gseht echli andersch us. es send au weder tureschte ome ond aues goht echli ruiger zue ond haer. mer haend oeises hoettli bezoge meteme chline verandaeli (woni einisch aneme obe ofene hoorigi, stachligi raupe gstande be ond gmeint ha, i mues jez vellech staerbe ond mer haend oepe hondert fottine vonere gmacht, ass daerzt woesse, wasses gsi esch) ond haend es paar ruhigi taeg gnosse. tauche esch definitiv shighlight gsi. schoeni intakti reef, feschrichtum ond vorauem esch aues echli groesser gsi, wi mer sechs ursproenglech gwoehnt esch. schoen gsi... asoeschte esch ned veu los gsi. d'beach esch ned woerkli zom legge gsi ond so haemer oeis entschlosse, doch no zo de orang uthans zgo. aber ned bevor i vorem es bett gho no vorem zemmer vonere auschtralieri dstaege abegheit be. es het en lute knau geh ond ich be em draeck glaege, mi roegge, mini arm, mini bei, min buch, aues esch volle draeck gsi... ond glachet hani... dauschtralieri esch oss ehrem zemmer cho ond wo si gseh het, asses mer nuet gmacht het, het si au schallend afoh lache, zom gloeck beni scho ofem wc gsi, soesch hetti mer ed hose bislet ;o) ond das obwou ass of de ensle aues so langsam goht ond mer aui oeisi tagesjoebli (wi woesch abhole oder visa oeberpruefe) vergaesse haend. e dem doerfli hets sogar en sogenannti dorfhaex geh! si esch eigentli en art therapeutin ohni diplom gsi ond het luet met problem massiert. eimou semmer zuege devo worde ond mer haend oeis chromglachet, weu si het ehri schmaerze met veu oeberzuegig voubrocht. aber schinbar hets gnoetzt ;o)

zrogg en banda aceh haemer de nachtbus nach medan gno. nacheme feine aesse em pizzahut haemer be de busstation of oeise bus gwartet. do send tureschte woerkli no oepis bsondrigs ond mer send met veu entraesse behandlet worde. secher ned zletscht waegem bubu, aber mer send wit ond breit di einzige wisse gsi. mer send vo busfahrer omzenglet gsi ond jede wo ned e oeisem bus gfahre esch, esch enttuescht gsi. aui haend oeis zigis abote ond taefeli haemer oebercho, aber definitiv sloschtigschte esch gsi, wo si (aui saeme) ehri nateus voeregnoh haend ond afoh foeteli mache haend ;o) schlossaendli mued vom velle lache ond de ufmerksamkeit semmer froh gsi, wo de bus aendli losgfahre esch. ned zerwaehne ass mer schlaecht gsi esch vo au denne zigis... aber nei saege esch sehr, sehr onhoeflech. gar noem loschtig hets mi donkt, wo mi eine vo de busfahrer ufgweckt het ergendwo am morge am foeifi ond gmeint het, i chiem jez met ehm es raucherabteil eis go rauche. tse, was meint de eigentli?!? scho mou voneme morgemoffu ghoert??? fraechheit so oeppis...

nachere lange, houprige busfahrt semmer en medan acho ond voneme taxifahrer abzockt worde. 15 esch ploetzli zo 50 worde... es esch woerkli sehr, sehr muehsam ond mer werd rechtig mued, aber do mues mer dore. metem noechschte lokaubus semmer nach bukit lawang gfahre, es staedtli em dschongu. di ganz busfahrt esch sehr houprig gsi, weu dstrosse send ned woerkli strosse gsi ond dstrosseloecher send abartig tuef gsi. i ha eigenli weue nohschloffe, esch aber onmoeglech gsi. wo de bus vouer ond vouer worde esch ond mer nachwivor foer schueuchend ofem waeg aghaute haend, send die eifach ofs dach ufegklaetteret ond haend ehri heifahrt vor schueu det obe gmacht. i ha jo ned schlaecht gstunet. wenns haend weue usstige sends waehrend de fahrt obenabe gklaetteret ond haend woesse loh, ass si use waend. i weiss ned, wi seh sech det obe haend choenne hebe, aber toechtig gschoettlet hets det obe bestemmt au! mer esches ehlaender ond ehlaender gange, ond schlossaendlech en bukit lawang acho beni diraekt es hostel go schlofe. dhostelmanagerin het sech miner erbarmet ond mer gratis es schaeli blote ris geh. da esch aues gsi, woni ha choene aesse. buuuhhh, schlaecht.

trotzdem hani mech am noechschte tag osem bett zwonge ond mer send dfuetterig vo de orang uthans goge luege. loschtig esch gsi, ass mer ofem waeg dethe haend muesse enes kanu hocke ond mer send oebere floss zoge worde. es esch aues andere gsi aus usbalanciert, ond ich ha meh aus einisch gmeint, ass mer jez uskippet waerde... ha ase au tatsaechlech es nasses foeddli gha woni usgsegge be. mer send echli spoht gsi foerd fuetterig, aber es het sech sooo glohnt. di agressivi nina (wo mer scho en siberut vonere ghoert haend) het vor 8 woche ehres baby oebercho ond esch so noech gsi, ass mer si hette choene alaenge. i ha aber en gsonde abstand vonere gnoh, nach au dem woni vo ehre ghoert ha. die affe send herrlech zom aluege ond bestuhne. de guide het de nina muesse zeige, ass sine sack jez laer esch ond aer het oeis agfleht, aui oeisi taesche zuezloh ;o)es schint ass waer dnina woerkli radikau ;o) mer send so fasziniert gsi ass mer beschlosse haend, au ad nomittagsfuetterig zgoh. eneme reschtorant ofem waeg haemer oeis en frochtsalat teilt, schinbar de bescht em ganze staedtli. es het zemmli lang duret bess er cho esch, ond mer send fasch oebergheit vor lache. de frochtsalat esch ofere risige platte serviert worde, dekoriert met blueme, gresser ond haube struecher. herrlech esch da gsi. ond so guet esch de bescht frochtsalat ned gsi...

a oeisem letschte tag en sumatra semmer scho frueh ufbroche, es esch emmer no donku gsi. met oeisem ganze gepaeck semmer loszottlet ond haend oeber eini vo dene veune haengebrogge muesse, om ass andere ufer vom floss zcho. mer haend oeis muesse boecke weu dkabu vo de brog send ergendwie obe zaemecho ond de waeg esch ned eso breit gsi, vorauem ned, wemmer metem grosse rocksack dore wott. ploetzli hets en knack geh onder mine fuess ond ich be met eim fuess dord brogg doregheit. starr vor schreck beni stohblobe ond ha noeme gwoesst, wasi seu mache. weu min dorchbroch aber onbemerkt blobe esch esch mer nuet anders oebrig blobe, aus witerzlaufe. mer esch gar ned wou gsi, aber i has oeberlaebt. grad no raechtzitig semmer en medan acho ond haend dfaehre nach malaysia gno. aber ned bevor mer weder dor de zou zrogg send goge potnudels hole ;o) i ha mi gfroeit, weder zrogg nach malaysia zcho, weder es betzeli zivilisation. fasch hettes mi aber ned inegloh weui am malaysische zoeuner gseit ha, oeisi pfihlboege sige speer... esch mer usegroetscht.... zom gloeck hani da met mim charme weder choene usboegle... puhh, da esch knapp gsi...

zrogg en pedang semmer grad am erschte obe voneme gwetter oeberrascht worde ond er stadt steckeblobe. enert choerzischter zit esch dstross vou wasser gsi, aui abfloess blockiert ond aues onder wasser. sehr idroecklech gsi, aber wit ond breit keis reschtorant zom ushocke. nacheme wili womer oeis scho fasch dezue haend choene dorerenge zom nass waerde het oeis en frau en zitig brocht zom oebere chopf hebe. da schint do swechtigschte zsi, so gseht mer en hufe wo sech eifach en plastiksack oebere chopf stoeupe ;o) aber mer haend dankend dzitit gno ond send tapfer losmarschiert. mer haend oeis no es letschts mou met indischem food versorget (znacht ond zmorge) ond send metem minivan rechtig thailaendischi graenze losdueset.

ar graenze haemer dutyfree igkauft ond mer haend anstatt oeises zueg metgnoh ageh, weui busnommere ass mer haend. oepe nach 1.5 kilometer haemer weder muesse usstige, paess zeige ond mer haend (oh wunder, ke plan wi da fonktionert) oeise wis plastiksack met oeisne ichaeuf choene entgaegeneh. mer haend grad emou 2 minute vorhaer igkauft... i be beidrockt gsi. ond ich ha mi risig gfroeit, en thailand zsi. grad scho nach de graenze het aues ganz andersch usgseh. mer send emene chline staedtli namens trang acho. nor en chorze stop for de beach. nach oeisem erschte thaicurry semmer weder ene raegestorm cho, demmou semmer zom gloeck em kaffi feschtghocket ond haend choene bier trenke. da schoettet jo vellech grad echli!! aber di velle toeflifahrer beidrockt da gar ned, die fahre witer wi wenn nuet waer. d'gogi ond sprite ettigette send do en thailaendisch agschrebe. hani jo no nie gseh!! gseht aber super us!

es esch schoen aendli en thailand zsi. i froei mi riesig of de strand ond echli erholig vo sumatra. schint ass het mi indonesie gsondheitlech echli agschlage. zit zom usruebe...

ha ghoert, ass de fruehlig aendli de waeg ed schwiz gfonde het. mag ich euch vo haerze goenne! gnuessets ond machet oeich parat foer de sommer!

en omarmig os thailand
oli

en tag osem tagebuech voneme backpacker

oeises programm esch dor die verspoetig echli e stress ine cho, ond ich ha mech muesse entscheide, oebi wot goge tauche oder orang uthans gseh, beides esch ned drenne glaege, weu mer nor es 30-taegigs visa oebercho haend. foer mech esch dentscheidig eifach gsi, i ha definitiv gnue vom dschongu gha ond ha a strand weue.

so haemer oeisi sache packt ond send a floghafe. met oeis de bubu ond d'pfihlboege, sperrigig sach. hani scho vom bubu verzeut? ase de bubu esch en fescherchorb womer zom fesche es wasser haengt. de mark het de en cambodia gkauft ond schleikt en sethaer met sech ome, was heisst, so ca. die letschte 5 moenet... de bubu esch wonderschoen ond zieht entspraechend ufmerksamkeit of sech. es esch loschtig, egal wo mer send, aui choeme ond zeige of de bubu, naend en ed hand ond dreie ne ome ond choeme noeme zom stuhne us. mer haend jez agfange, en fotikollektion zmache, aui luet wo de bubu bestuhne waerde gfoetelet ;o) am floghafe haemer de bubu zom erschte mou e sinere karriere ned doefe met ed kabine neh, sondern haend en muesse ufghe. mer send beid echli naervoes gsi, i be fasch secher gsi, ass ers ned bes medan schafft...

womer saeuber dord kontrolle send ond vorem gate of oeise flueger gwartet haend haemer honger oebercho, ond de mark het entschlosse, nomou usezgho go potnoodles hole. da esch gar e kes problem gsi, ond woner zrog cho esch haends en sogar doregwonke, nuet met kontrolle. mer haend jo sooo muesse lache, i ha mi koeschtlech amuesiert. ase set eine vo oei en aschlag plane, moechets en sumatra ond verstecket oeichi bombe en pop mee! hi, hi, hiiii.

en medan haemer dfloggseuschaft gwaechslet ond de ganz tag ufenthaut gha. metere rickshaw semmer (nachdem ass mer oeises gepaeck guetglaeubig bem secherheitsschef ond einere vo de information henderloh haend) enes shoppingcenter gfahre. ich liebe die rickshaws, da macht spass!! wenn nor das diskutiere om de pris ned emmer waer.. em shoppingcenter acho haemer oeis weder enere voellig noeie waeut gfonde. vom dschongu es shoppingcenter... aues sehr modaern (met starbucks, pizza hut ond was shaerz soesch no so begehrt), suber ond organisiert.

zrogg am floghafe haemer oeises gepaeck dankend en empfang gnoh ond haends itschegget. nachdem ass die vor secherheit anstatt oeises (oder das vo de anderne) gepaeck agluet haend de bubu bestuhnet haend semmer dord passagierkontrolle, wos oeis gseit haend, ass mer no en abflogstaxe zahle muend. de mark esch ase zrogg ond het das erlediget waehrend ich hender de monitor vom detektor ghocket be ond kontrolle gmacht ha. i ha denne luet gseit, si seue doch emou ehres handgepaeck uftue, komischerwis haend aui nor glachet ond send witer, tse, tse... aernschthaft, e dere zit woni dete ghocket be haend si weder monitor no luet agluegt, aues was si gmacht haend esch met mer schwaetze gsi... ond ehrlechgseit, i be secher ass de detektorboge womer dorelaufe mue ned glofe esch!!! be mer het er naemli voraene emmer pipet, det aber ned...

em flogi esch echli beaengschtigend gsi ass i em setz e flyer gfonde ha met gebaet foer jede glaube. so hets zom bischbeu absaetz gha met 'schoetz mis vermoege' ond 'danke em allah, ohni ehn waere waere mer ned faehig das flogzueg zbestige' oder 'sorg foer guets waetter ond en poenktleche flog, so ass oeis dcrew heil as noegscht ort brenge cha'.

naebeme paerli os duetschland semmer di einzige wisse e dem flog gsi, ond am floghafe vo banda aceh hani die gfrogt, oeb mer oeis seue es taxi ed stadt teile. es het sech usegsteut, ass si scho set 3 johr en aceh send ond zoneme heufsteam nachem tsunami ghoere. si haend no en vertrag foer witeri 2 johr ond es get no en hufe ztue. si het gmeint, mer sige di erschte tureschte, wo si en aceh gsaechi. i auerdengs glaube da ned, weu of pulau weh, womer eigentli he haend weue, hets gnue tureschte... si het eh echli zom oebertribe gneigt ond het aues echli sehr dramatisch dargsteut. si het au gmeint, ass aceh veeeeu zgfoerlech sigi, ond ass mer znacht ned eleige use seui ond so witer ond so fort. os dem grond haends oeis au zoneme tuerere hotel gfahre, weu di beugige schinbar veeeeu zonsecher sige.. ok, schliessli esches jo nor foer ei nacht, ond sguete esch gsi, as si verbarme met oeis arme reisende gha het ond di beide haend die ganze choeschte foers taxi oeberno ;o)

oeises hotel esch de hammer gsi, emu bestemmt nach au dem womer er letschti gseh haend. mer haend sogar e chochi gha, aber de faehrnseh esch ganz secher shighlight gsi! mer haend fasch di ganz (chorz) nacht faehrnseh gluegt ;o) asses er chochi notfaubrei zom amache gha het esch auerdengs scho chli komisch gsi. sogar sland vom spaender esch drofegsi...

jo das escher, de tuepischi tag foeren rocksackturescht. hani ergendoeper choene inspiriere?! nei, mer erlaebt so veu, chlinigkeite ond sache zom de chopfschoettle (was mer ergendwenn au ufget), aber es esch so schoen, die waeut emou met anderne auge zgseh. ond ich werde aues deheime ganz andersch aluege.

en haerzleche gruess a mini treue bloglaeser
s'reisefoeddli

s'lide em dschongu goht witer...

nacheme witere marsch dor de dschongu, wederom e risigi schlammschlacht, balanceaekt oeber chlini wasserlaeuf ond verschwetzte, stenkige stonde semmer em noechschte dschonguhus acho. i be am schloss gsi weuis ned eso metem balanciere ha, oeber ei floss beni sogar ofem baumstamm abghocket ond ofem foedli oeberegroetscht. ned loschtig... de davide esch oeis entgaegegroent ond het froeidestrahlend agkoendt, ass mer AENDLI acho send. ehr glaubet gar ned, was da foeren erliechterig gsi esch, ond sbeschte esch erscht no gsi, ass da hus amene wonderbare floessli gsi esch, fasch en rechtige ort zom bade resp. waesche. vo obe bes onde vou met schlamm esch da e herrlechi oeberraschig gsi.

mer schwetzt woerkli di ganz zit, ond wemmer es "bad" gno het fohts sofort weder ah. di schnett ond schoerfige womer oeis bem trekke zuezoge haend send aui entzoend, es get keis entcho. es esch hardcore pur ond mer send aui chli a oeisi graenze gstosse. sobaud mer osem hus goht het mer schlammigi fuess ond esch weder vo obe bes onde draeckig, inklusiv dgaeng zom "klo"... dezue choeme no di cheibe moskitoes ond ameise, wo so gaern bisse.

em hus hets sehr veu chende gha ond entspraechend esches weder ned lang gange ond i be gfrogt worde, oeb aech ich ghuerote be ond es beibi heig. emmer sglich... defoer haend dchende en risigi froeid a oeis gha ond sobauds vo de schueu zrogcho send haends oies magic zeiget ond met oeis gspeut, rechtig haerzig. de tag dor het oeis de chef vom hus zeiget, wimer es loincloth macht, da esch da zueg, wo dmanne om ehre po ond spfiffli traege. defoer haemer en baum gfaeut ond drende e zwoei teili trennt. da teili wo diraekt onder de rende esch haemer flach gklopfet, wodore s'breiter worde esch ond fasch echli elastisch. nachem waesche haemers de zom troechne ufghaenkt, aber es esch nie sowit cho, ass mers fertig gmacht haend. schad. a eim tag haend dfraue d'madeleine ond mech ofd site gno ond oeis gseit, mer seue oies abzieh. mer haend bananeblaetter om dhoefte bonde oebercho ond es bambusrohr esch drigsteckt worde. osserdem send oeisi hoor met blueme verziert worde ond mer send meteme grosse feschernetz usgroeschtet worde. fishingtime! aui fraue send met de chline chend loszoge ond mer send goge fesche. chlini feschli, suesswasserchraebsli ond suesswassershrimps. die haemer sorgfaeutig e oiesi bambusrohr versorget. ui, mer send seeehr beschaeftiget gsi. ond ass mer be de sach gsi send het bewese, ass die cheibe (wisse) manne oeis verfougt haend ond oeis emene busch ufgluret haend, was es video bewesse het. dmadeleine ond ich send fasch oeberegheit, weu die send so noech gsi, ass si oeis fasch hette choene alaenge. aui haend si gseh, nor mer ned. onglaublech, tse, tse... loschtig esches gsi, mer haend oeis koeschtlech amuesiert, fasch so guet wid jungs ;o)

aneme morge het mi dhusherrin gfrogt, oebi ehri hoor woer met de haend straehle. klar, machi doch. obwou, sehr appetitlech esches jo ned gsi. si het uh dechti langi hoor gha, aui chli verchnoepft ond i ha kes aend gseh. woni gseh ha, ass mini haend ganz schwarz worde send vo ehrne hoor hani langsam gnue gha ond be froh gsi, wo oeise guide gseit het, ass mer losgoend. wuaaahh. am obe esch defoer schoen gsi, assd buebe foer oeis en tanz vorgfuehrt haend. mer send aui benand ghocket, fei no veu ond haend denn beschlosse, ass jede es lied senge mue. nei, nei, kei angscht, i ha ned "schnaegg e sim huesli" gsonge, sondern "det aene am baergli".

aneme obe haends es eichhoernli broetlet, wos gfange haend, i saege, die aesse do aues! onglaublech. zom gloeck haend mer nuet soenigs oebercho, mer haend eis ah gaesse. oeisi reis esch langsam am aend zue gange ond mer send zom letschte hus glofe, zom gloeck noeme so wit. ofem waeg dor de dschongu het de fuehrer wo vorus esch de waeg frei ghaue ond debi es bananeblatt abghaue, wo flaedermues drenne gwonnt haend. i ha zerscht angscht gha, ass si noeme fluege choene, aber wo si de raecht verwachet send sends de devo gfloge. be schoen froh gsi.

oeisi deschtination esch ned so laessig gsi, emou abgseh vom wonderschoene wasserfau, womer haend choene goge bade. dluet em hus send sehr, sehr onfroendlech gsi ond aues wos haend weue, send oeisi zigis gsi. ossertdem esch eine vo de hoend sehr chrank gsi ond de davide het fasch zuestaend oebercho ond sech meteme staecke bewaffnet. i mue zuegeh, es esch grusig gsi. oeise fuehrer het gfrogt, oeb mer oepis degaege heige, wenn aer de hond toeti, ond mer haend oei eistemmig defoer entschede. obwou ass aer gseit het aer tuegen erseuffe wemmer waeg bem wasserfau sige haends en de grad gno ond erschlage. das het mis haerz zom bluete brocht ond i has gar noeme loschtig gfonde. di chatz wo lut miauend fasch e oeises aesse gschloepft esch ond naer ofem tesch oeisi taeuer laer gschlaecket het hets au ned besser gmacht. waeg. zom gloeck semmer nor ei nacht blobe. de wasserfau esch hammer gsi, fasch wi em faehrnseh. nachem bade haemer es paar paumebletter azoend zom ufwaerme (i weiss, da toent loschtig, aber swasser esch chaut gsi), da esch herrlech gsi.

metem boot (en usghoeute baumstamm) semmer zrog zom aman sim hus, womer di letscht nacht verbrocht haend. chum semmer ofem boot gsi hets afoh raegne, ned nor es betzeli, sondern es het gschoettet! so fescht ass mer haend muesse wasser useschoepfe. nacheme wili haemer chorz ghaute ond send met bananeblaetter usgroeschtet worde, wo emmerhin oeisi hoor gschoetzt haend. nachdem ass mer scho voeuig dorchnesst gsi send...

zrog em aman sim hus (scho fasch wi heicho) hani es wonderschoens armband vom aman oebercho, saeuber gmacht diraekt a mis handglaenk. denaebe haend e goeggu toet, aber mer zockt scho gar noeme met de wempere, mer gwoent sech ergendwie dra. em aman sin vater het oeis zeiget, wimer os chili, ingwer, blaetter ond worzle geft macht foer de pfihlboge. i ha mer ase eine gkauft ;o)

juuupiie, aendli esches losgange ond de aman het sini chleider agleit ond mer haend sis hus verloh, om am glichlige obe s'scheff zrogg ofs feschtland zneh. mer haend oeis soooo of en warmi duschi ond suberi chleider gfroeit, sett 9 taeg semmer draeckig, schwetzig ond stenkig gsi, mer haends chum choene erwarte. womer am hafe acho send haends oeis gseit, ass sboot kapott esch ond ned goht. ossertdem het de maschenema vier laebigi ameisebaere gschmogglet ond esch em gfaengnis, so haends au kei maschenema meh gha. ause semmer of de ensle feschtghocket, e dem wonderschoene hus met dem wonderbare waeschrum diraekt am meer, stenkig nach seegras wi emmer... was foeren ernuechterig...

es het nach wi vor graegnet ond of de ensle saeuber chamer genau nuet mache. a eim tag semmer lostrottet rechtig "hauptstadt", saege mer doch "hauptdorf", aber es het afoh raegne ond mer haend emene huesli gstoppet, womer en tee oebercho haend. es het aber ned weue ufhoere ond so esch oeis nuet anders oebrig bloge, aus zrogg zlaufe. saeubverstaendli usgroeschtet met bananeblaetter, mer haend schliessli en hufe glehrt em dschongu ;o) mer cha oebrigens gueti kaempf mache met bananeblaetter, da macht spass! am noeschte tag haemer nomou en versuech gmacht, haend denn aber es auto met ladeflaechi gstoppt ond send hendedruf ghocket. aui luet haend oeis gwonke ond froeid gha, inkl de fahrer ;o) i be henderem fahrerheusli ghocket ond ha de fahrtwend gnosse, bes de mark (de aenglaender) gseit het, "monkey head" ond mech a mim aermu abe zoge het. i ha no daenkt, da esch jez e fraeche siech, aber es het sech de usegsteut, ass aer "mind your head" gseit het ond e schnur oder es kabu oeber dstross gspanne gsi esch, da hetti ase boes es aug choenne goh.... trotzdem, spass hets gmacht ;o)

nach drue lange taeg semmer aendli erloest worde ond es boot vonere andere gseuschaft het oeis met as land gnoh. i be soooo froh gsi. gsondheitlech echli agschlage met dorchfau ond erbraeche set tage hanis chum choene erwarte, di anderthaubtaegigi reis en alauf zneh.

en penang haemer absched gno vom davide, wo di ganz zit en sumatra met oeis omegreist esch ond send met de madeleine ond em mark em minivan zrog nach bukkitingi gfahre. hi, hi, de mark het met sim wasserbaecher woner oebercho het dmadeleine, wo het weue schlofe, dors roehrli agsproetzt ond behauptet, es sigi d'aircondition ;o) mer haend oeis chrom glachet, weu di arm madeleine hets glaubt, hiii, hiiiiii,hiiiiiii ;o)

aendli, aendli zrogg en bukittinggi esch serschte gsi, en heissi duschi ond froeschi chleider, wo bereits of mech gwartet haend. herrlech! weniger herrlech esch denn auerdengs gsi, ass mer haend weue oeisi paeckli ofs poscht brenge ond mer haend muesse pressiere, weus samschti gsi esch. natuerli hets grad denne muesse afoh pisse ond mer send einisch meh voeuig dorchnesst gsi. so fruschtrierend. tropfend semmer of de poscht acho ond die haend oeis weue weiss mache, ass oeisi paeckli zchli sige foer seefracht, si meusses met em flugi schecke. klar. ause haemer agfange, si zbelehre bes si nach jakarta agluetet haend. i be chli pissed gsi weu mer voeuig dorchnaesst e dem poschtbuero gstande send, agfange fruehre haend, e oeisere glonge gstande send ond die cheibe mech gnaervt haend.

hach, i be no voellig emotionau weni a die zit zrogdaenke... mer haend aui glette ond send soooo froh gsi, zrogg ed zivilisation zcho. ehr woesset gar ned was der haend, ass der taeglech en froeschi, warmi duschi choene gnuesse! ond aesse was der waend. ond jede tag suberi chleider haend. ond es broenneli zom zaeh botze. oeberhaupt.

i glaube, i ha de dschongu foeres wili gseh. froeie mi, ergendwo anen strand zlegge ond mi chli zerhole.

winke winke ed schwiz
oli