en trip e dschongu

wi bereits agkoendet hani en dschongutrip buechet. was foeren glorrichi idee... nachdem ass mer (de davide, de mark ond dmadelaine ond ich) oeis am maert no met de raeschtleche notwaendigkeite ideckt haend esches metem minivan en rechtig pedang losgange, vo wo us mer metem scheff witer haend muesse. dfahrt dethe esch weder emou de heui wahnsenn gsi. steuet euch da so vor, ass de fahrer jederzit aues oeberhout vo es spuerli langsamer esch. of de gaegefahrbahn moeche si glichzitig aber genau sglichlige. herrlech... am liebschte hetti e schloftablette gno wo mi k.o. ghaue hetti... chum semmer en penang acho (gott sei dank, mer haends oeberlaebt) send mer aui di loschtige minibuesli es aug gstoche, vo hende bes vore tunet, mega luti musig, loschtig agmolet ond sech saeuber dreiendi faeuge, i be fasch ab de fuess gheit, so loschtig. die minibussli send en art oeffentlechs verchersmettu. en bifahrer, hueret oeberau of de stross luet ah, ond foer wenig gaeud chamer metfahre. sehr praktisch.

nachdem asi mer em shoppingcenter no es wonderbar megagiga onwahrschinlech feins kokosbroetli (en art brot meteme kokosmagroenlidach) gkauft ha ond oepe drue immodium gaesse ha esches de ofs scheff gange. puuuh, da esch en schoene kutter gsi, ond ich ha ned raecht gwoesst, wi mer di ganz nacht seue met dem kahn oebere ozean fahre... zom gloeck haemer en kabine gha, weu di meischte (ond das send veu gsi) send chruez ond kwer am bode glaege, gar nuet bekwems. mer haends oeis di erschte paar stonde of deck gmuetlech gmacht. de davide het bereits set es paar taeg dorchfau gha ond esch di ganz zit ofs wc groent. de mark het sis schloss a oeisi kabinetoer gmacht ond de schloessu em davide geh, weuer es bett het weue. es esch ke haubi minute gange ond aer esch of deck erschene ond het gmaeudet, asser de schloessu ofem wc (es plumpsklo diraekt es meer) verlore het. whoohoo. asoeschte esch dnacht ruhig verlofe. i ha zemmli lang gmeint, as mer a de koeschte entlang fahre, besi de ufklaert worde be, as da fescherboot send wo tentefesch fesche. die haend risigi schinwaerfer a bord, weu die tentefesch be voumond ad oberflechi choeme zom sech paare, ond met de schinwaerfer imitieres de voumond. sehr spannend.

be sonneufgang semmer of de ensle siberut acho. ned veu voneme hafe, ned veu vonere stadt oder aehnlech, eifach en ort wos oeis usegloh haend. so haemer oeisi rockseck gsattlet (mer haend einiges en bukittinggi gloh, esch aber emmer no gnue gsi) ond send losmarschiert. auerdengs ned auzuwit, bes mer eneme huesli am meer wos nach seegras gstonke het bananepancakes oebercho haend. mer haend am vorobe no es poulet ond toschtbrot gkauft, wo mer det verspese haend, wo zwoei urwaudmaennli met veune tatoos of bsuech cho send ond met oeis haend weue teile. sehr loschtig gsi, die haend sogar no de chnoche abschlaecket, so gaern haendses gha ;o)

verschwetzt ond verchroeglet wini gsi be hani mi de en rechtig duschi ufgmacht. schockiere tuet mi jo scho lang nuet meh, aber i mue oei glich verzeue, wi da det usgseh het. ause, da send haub zerfauni betonmure gsi, en doere wo meteme vorhang zuegmacht werd ond drenene es risigs loch metere meeeega kloake. denne hets en tonne met ergendweuchem filtermaterial. mer schoepft ause wasser os de kloake, foeuts ed tonne ond onde use chont froeschs (herrlech bruns wasser wimers gaern haend) use womer sech demet cha waesche. herrlech. aber was het mer foeren wahl wemmer bereits set 24 stond onderwaegs esch?!

nach dere neue erfahrig semmer zfuess lostrottet, om amene floss (ned nachdem mer bem lokale shop warms bier foerd 'reis' gkauft haend) enes houzkanu zstige. puh, i saege eui, da esch uh gwagglig gsi, ond mer haend oeis ause raecht muesse mueh geh, ass mer ned kenteret send... nachere aklimatierigsphase hani aber mis warme bier ond di wonderschoen omgaebig choene gnuesse. mer send je laenger je meh e dschongu inecho, de floss esch entspraechend brun gsi, aber es het aues passt. vo zit zo zit esch oeis es anders kanu entgaegecho met locals denne, sehr spannend gsi. i ha mi gfuehlt wi e eine vo dene dokusaendige. nach dere zwoeistoendige fahrt semmer em hus vom amman acho, en shaman wo met sinere familie em dschongu wohnt, omgeh vo nuet anderem aus dechte dschongu. es wc hets e kes ond mer mue sech ergendwo em dschongu es plaetzli sueche. ehr choene jez scho saege, asses jo gnue buesch hett, sproblem esch nor, ass aues was ned useghaune waeg esch decht verwachse esch, ond das esch es aernschthafts problem, jedefaus foer mech. gwaesche haemer oeis emene baechli naebem hus. emmerhin besser aus duschi em letschte hus. defoer haemer oeberraschenderwis guets aesse oebercho, de aman het foer oeis gkochet. es paar meter ewaeg vom hus haends es noeis kanu oseme baumstamm gmacht. steuet oeich vor, os eim baumstamm haends drue kanus gmacht! da esch de absoluti wahnsenn. dluet wo do em dschongu wohne haend ganz komischi tatoo. die broenne seh sech ergendwie ed hut, verbonde met farb. d'manne laufe metere hoeftbende ondeme buchtaeschli ome, da esch aues wos ahaend. ond rauche tuends wid boerschtebender. entspraechend haemer au veu zigarette muesse metneh, zom teile ond ganzi paeckli zom verschaenke.

nach einere nacht em mosiktozaeut em vorbau vom aman sim hus beni am morge frueh ofs 'wc', ond grad woni mi em gebuesch 'versteckt' ha, send es paar manne de waeg entlang cho, haend mer aui dhand gschoettlet ond aloita gseit ond send witer zom hus marschiert. puhh, zom gloeck hani mini hose noni abegloh, aber komisch gnueg ass eim dhand gschoettlet werd, wemmer 'ofem wc hocket' ;o)

aus noechschts esch en 4-stoendigi wanderig dor de busch agseit gsi, zo oeisere noechschte onderkonft. ond da esch, wo de horror agfange het... am afang semmer no oeber die baeuke ond baumstamm balanciert, wo oms hus of de schlammwaegli legge, naer esches abgange dor deckschte dschongu, kei waeg, nor schlamm ond gebuesch. zom gloeck esch eine vorusglofe, wo metem buschmaesser de waeg bahnet het. di meischti zit beni wadetuef em schlamm gstande, mini fuess send steckeblobe ond di erschte bluetegu haend ned lang of sech warte loh. das ganze esch no toppet worde, ass mer haend muesse oeber baumstamm balanciere om of die anderi site vo floessli zcho, gar ned loschtig. das ganze natuerli met oeisem ganze gepaeck, ned zvergaesse. es esch en auptraum gsi, soveu saeg ich euch. ond mini trekkingschueh waerde de trip vermuetli au ned oeberlaebe...

ganz verzwiflet ond totau mued semmer em noechschte dschonguhus acho, wo mer aui ergendwo ene egge glaege send ond pause gmacht haend. de amman esch scho dete gsi ond het of oeis metem aesse gwartet. womer en gfrogt haend winer da gmacht heig heter gseit, er sigi daenk metem kanu cho, ond woni gfrogt ha oeb mer di einzige idiote sige, wo dore dschongu trekke hetter nome glachet...

e dem hus hets uh veu saeu gha. wemmer am morge ofs wc esch sends vo wit haer zroenne cho ond mer het choene froh si, wemmer sis gschaeft no het choenne raechtzitig abschluesse, bevor si sech oeber ehres zmorge haergmacht haend... yammm. mer haend eistemmig beschlosse, ass mer kei schwinsfleisch aesse waerde.

was mer e dem hus ned eso gfaue het esch gsi, asses aune fraue ergendwie elaend gsi esch. ond aues wo mer ed fenger gno haend haends weue, egau wasses gsi esch. sogar mini armbaendeli, wo zom teil nor osere schnur bestoend, haends weue. sehr laeschtig. obwou as mer gschaenkli foer seh metbrocht haend, es esch ned gnue gsi. defoer haemer sgloeck gha, de sagoprozaess zgseh. sago esch en paume, wo zo aesse verarbeitet werd. si mache auderlei drus, aber dverarbeitig esch harti arbet. kes wonder schaffe si nome drue stond am tag. dhetz esch debi au ned zverachte. de husherr vo dem hus esch es haerzigs auts mannli gsi, ond sini obere zaeh haend oseme goudige blaech bestande, wo zigzagfoermig usgschnette gsi esch. dfraue loend sech os kosmetische groend dzaeh drueeggig schliffe, kei scherz ond absolut idroecklech. nach wie vor laebes do no sehr spezielli bruech. so zom bischpeu wenn en frau be de gebort voneme chend sterbt, werds neugeborene laebaendig met sim mami begrabe. mer send woerkli absits vo jeglechem tourismus gsi, enere voellig andere waeut oder versetzt es mettuauter.

am obe het oeis de husherr sini magic tricks zeiget ond mer haend en grossartigi zit gha. es esch so loschtig gsi, mer haend enand ned verstande ond trotzdem glachet wi saeute. erschoepft wimer gsi send haemer zwoei naecht doeffe blibe, bevors witer dore dschongu gange esch. das ganze aber eneme witere brechtli, esch weder lang worde hoet ond ich wott oei jo ned langwile oder ufhaute. es get nor soooooo veu zverzeue ond ich wott nuet osseloh!

hey, gnuesset de fruehlig (em fau aser scho cho esch) ond haend oeich sorg!

e grossi omarmig
vom reisefoeddli

lake toba ond bukittinggi

aneme glorriche tag ond ere glorriche idee semmer a oeisem husteich diraekt agraenzend a lake toba goge fesche. ned ganz erfougrich ond ganz ifersoechtig zom voue nochbersteich oebereluegend semmer de vom nochber iglade worde, zom e sim teich zfesche. aer fuetteret sini fesch regumaessig ond die warte ame scho, wenner zom teich abe chont. i ha vermuetli sehr verzwiflet driglueget, so hetter mer eine vo sine zochtfesch osem chline teichli usegfeschet ond ne mer es netz geh. ganz stouz beni zom mr. moon ond ha gseit, i heig mer mis znacht gfeschet. de fesch hani ganz logischerwis "dinner" tauft ;o) eneme chessu het aer de raeschte vo sim laebe verbrocht waehrend mer de hiesig gwaffi teschtet haend (hi, was foeres erlaebnis, vorauem de kaffi woni oebercho ha, meh satz wi ergendoepis ztrenke...) mi hoorschnett, wi ned andersch erwartet, esch ned ganz da gsi woni mer vorgschteut ha, aber totau ok foer de momaent. cha trotzdem chum warte besi weder zo mim gwaffi deheime cha.

en anderi weniger loschtigi erfahrig esch gsi, ass mer haend weue es welo miete, respektiv gmietet haend. nach ca 5 minute esch em mark sini chetti gresse ond mer send zrog zom vermieter. aer het kes welo meh gha weu aui andere kabott gsi send ond so haemer de trip abgseit. onschoen esch auerdengs gsi, ass oeis de vermieter ned aues gaeud zroggeh het. de mark het luthaus metem gstrette ond dluet send of de stross stohblobe ond ich ha ned raecht gwoesst, wa mache, aber schlossaendli esches jo ned woerkli om veu gaeud gange, aber oms prinzip. trotzdem, de weue esch do gsi ond ich ha mi woerkli chli weue bewege, soveu wini do esse, i mantsche de ganz tag ergendwo oepis, saesse esch so lecker...

d'landschaft esch wonderschoen, oeberau risfaeuder ond wasserboeffu, herrlech iduellisch.... aber es esch definitiv ned oeise tag gsi. so semmer haubverhongeret enes reschtorant ghocket ond haend oeises aesse ond ztrenke bsteut. nachdem assmer oeisi drinks scho haube laer gha haend ond oeis scho mehrmous gwonderet haend, wos aesse aech blibt esch dservierduese metem telifon of mech zuecho ond het gseit, es weui oeper met mer rede. mer haend oeis nor aglueget ond ich ha haut de hoerer gno ond emou glost. kei ahnig wer genau dra gsi esch, aber diejenig het mer gseit, ass mer kei zmettag oeberchoeme ond mer seue doch zom znacht weder cho... kei scherz!!! nei, ned oeise tag...

defoer esch de fesch herrlech gsi, obwou asser de nomitag ned oeberlaebt het e sim chessu. gaesse hanen glich. schliessli escher MIN fang gsi. a eim obe het oeis de davide os rom spaghetti gkochet. en traum... rechtigi (oder emu fasch) spaghetti... osserdem esch de marco os italie weder uftaucht, meteme local em schlepptau wo sglichlige t-shirt win aer agha het, es gschaenkts fuerzuegmaenteli vom marco gha het ond saesse metem teilt het. sehr verdaechtig... oeis heter aber nach wi vor gseit, es sigi sin adoptivson. jawohl. a eim obe hets de davide gloepft ond aer heten of dsite gnoh ond en gfrogt, oeber aer oeis eigentli aui foer dom verchaufe weu. er hett den tatsaechlech zuegeh, ass das sine froend esch. so tragisch asses scho fasch weder loschtig gsi esch. aber scho a de malaysische graenze zo thailand esch mer ufgfaue, wi veu euteri manne eleige reise. vermuetli het da scho sini groend, vellech chli boes a dere steu, aber secher ned ganz fausch.

nachere wonderschoene zit enmette vo risfaeuder ond wasserboeffu ond vorauem jonge hoend oeberau haemer de nachtbus rechtig bukittinggi gno. dstross esch de haupthighway gsi, aues e auem en meischt onterreti stross, oebersaeit vo strosseloecher ond korverich wine passstross, kes wonder het oeis di ca. 60kilometerlangi strecki meh aus 17 stonde gkoschtet... sbeschte send aber die chorze stops onderwaegs gsi, womer schnaeu het choene goge bisle ond es teeli trenke. a eim ort esch s'wc en lange rum gsi, verbonde metem manne wc doren grosse bronne, womer swasser useschoepft zom spuele. denne natuerli plumpsklo, auerdengs hets zwoeschetenne nor es chlises muerli gha, kei toere, kei waend, gar nuet. wohle dem ders noch verklemmen kann... sreschtorand het au aesse gha. das werd e grosse schoesslene onderem verchaufstesch glageret ond s'chaute aesse werd eifach usegschoepft wenn oeper bsteut. aber da esch voellig normau. meischtens stoht saesse de ganz tag hendereme feischterli beses oeper bsteut ond esst. mhhh, so fein...

voellig verchroeglet semmer denn aendli en bukittinggi acho ond totau erschoepft es noechschte reschtorand gstoerchlet. det haemer au grad oeise trip e dschongu buechet, weu de davide eine vo de tourguides kennt het. hoet weissi bereits, of was ich mech det igloh ha... zerscht haemer aber no e toeff gmietet ond haend weue goge d'rafflesia aluege, di groeschti blueme of de waeut. zom gloeck het si grad no blueit. so semmer met oeisem toeff os de stadt use ond oeberland (ond strosseloecher) en rechtig dschongu gfahre. en wonderschoeni landschaft, omgeh vo 3 vulkaen. zom gloeck het oeis d'madeleine, en zoercheri, gseit, wi veu si zaut het, soesch hetti oeis de fuerer schoen oebers ohr ghaue... guet, nachdem assd prisverhandlig dore gsi esch esch aer vorusgfahre ond mer hendedri. i ha gmeint ich gsaech ned raecht woner vom chline stroessli (wo saeuber scho gmeingfoehrlech gsi esch) diraekt ofenes chlises pfaedli gfahre esch, omgeh vo hoechem grass, of einere site en abhang ond of de andere site dschongu... das ganze no baerguf. vo oeich scho mou oeper metem toeff dore dschongu?! i ha gmeint ich oeberlaebe da ned. ond di ganz zit hani no em henderchopf gha, ass mer de glich waeg weder zrogg muend. wos de woerkli noeme gange esch haemer oeises gfaehrt stoh loh ond send zfuess witer. weus scho chli spoeter gsi esch hets oeise fuehrer meeega pressant gha ond esch vorusgspronge, waehrend ich echli meh zit brucht ha weui di ganz zit mini crocs em schlamm verlore ond noeme gfonde ha... das ganze esch ned agnaehmer gsi weu mer dmadeleine gseit het, es heigi bluetegu, i seui ufpasse. trotzdem, de hoerdelauf oeber worzle, feusbroke, dor floess ond dor de dechti dschongu het sech definitiv glohnt. drafflesia esch en uuuhhhmeeeega grossi blueme, ganz rot ond es voellig spannends moschter of de ennesite. i be sehr beidrockt gsi, obwou asi vo de fotene emmer gmeint ha, asses eifach e grossi haesslechi blueme esch. nei, ned wohr.

zrogg er zivilisation hani vor de roeckkehr no schnaeu ofs klo weue, ha mers de aber wederom andersch oeberleit woni ergendwo zwoesche de heuser, omgeh vo betonmure ond eme spuehlbronne, hetti seue e egge bisle. ned emou es plumsklo, gar nuet, nor vier waend ond en bronne...

om oeise schock vo dere gmeingfoehrleche toeffreis abezspuehle semmer ofem retourwaeg beneme kafi aghaute. aues e auem wi oeberau en sued-wescht asie es dach met es paar baenk ond tesch dronder. mer send zoneme polizescht ond eme radiomoterator aeneghocket ond haend (haut so guet wis gange esch) met dene plaeuderlet. i ha vom polizescht sogar doefe es foti mache, woner mini sonnebroelle agha het ;o)

am letsche tag vor oeisem dschongutrip semmer de auisaeme no dore maert glofe ond haend gschaenkli foerd luet em dschongu gkauft. ond snacks, mer weiss jo schliessli nie... buuh, ganz grusig esch gsi, ass e drue chessu naebenenand oepe tusig aal gsi send, froesch zom verchauf. aeeh, da esch jo vellech grusig gsi, ond gstonke hets!! am maert haend aui en rise froeid a oeis gha, aui haend glachet ond es esch rechtig asteckend gsi. es esch schoen, aneme ort zsi wosi no gaern tureschte gsaehnd. klar, veufach probieres eifach, aues os oeis usezhole, wine meuchchue, aber veu send sehr, sehr naett ond heufsbereit. aui waend woesse wohaer ass mer send, was mer aues goend goge aluege ond wi mer heisse. nor mech froges no regumaessig, oebi verhuerotet be, aber da problem hani jo bereits gloest...

saeh, i gebe euch jez weder es poeiseli, aus noechschts fougt mi dschongutrip, moechet oeich parat!!

haerzlechi liebschti beschti gruess os mim traum
s'reisefoeddli

Planaenderig ond huerot

Tja, wis bem reise haut eso goht gets vo zit zo zit planaenderige. so hani chorzerhand entschlosse, Sumatra no metzneh (met de schueche bemerkig asi es noeis turneeshirt bruche...). oeber nacht semmer metem zog vo kuala lumpur nach Penang greist. de schlofwage het os oebe 25 bett bestande ond entspraechend esch sgeschnarch gsi. am morge frueh semmer en butterworth acho, vo wo us mer dfaehre nach penang gnoh haend, es chlises haerzigs stettli met grossem indische ifloss. scho am morge frueh semmer aui die ladyboys ufgfaue, fasch echli beaengschtigend. aber loschtig. en penang saeuber haemer ned eso veu gmacht. es esch sehr heiss gsi ond mer haend gar ned raecht moege. trotzdem haemers gschaft es clanhouse azluege ond ofene hoegu ufezfahre metere super ussecht, vorussgsetzt es foht ned grad afoh raegne wi be oeis...

es paar taeg spoeter beni de ase of de faehre rechtig indonesie gsi. en sehr langi oeberfahrt, aber asi delfin gseh ha het mi doch entschaediget. ofem boot haemer zwoei italiaener kenneglehrt wo oeis es glichlige hoteu gnoh haend. mer send raecht froh gsi drom, weu chum semmer osem visumbuero usecho ond dord passkontrolle send die cheibe bus- ond taxifahrer oeber oeis haergstoerzt wi die weude. jede het oeis weue ed stadt fahre. of de stross esch mer grad ufgfaue, ass jede hornet, jederzit ond oeberau. mer send eneme chline laschtwaegeli hendeneghocket, zaemegchroeglet met oeisem gepaeck ond oepe 5 anderne iheimische. sehr spezieu gsi. am obe haemer oeis aui besoffe, so zor istemmig of sumatra ond weu sbier do so goenschtig esch. e grossi flaescha a 620 ml choschtet knapp 2 franke, ase nuet!!

grad am noechschte morge haemer aui ossert de marco os italie de bus rechtig lake toba gnoh. wow, das esch en erfahrig gsi! em bus zhenderscht hende hets sogar es separats abteil foer raucher gha ;o) asoeschte esch de bus eigentli raecht modaern gsi, ond oeisi fahrt esch dor e wonderschoeni gaegend met veune risfaeuder. onderwaegs haend de mark os aengland ond ich ghuerotet, oss dem ganz eifache grond ass mer oeis choene es zemmer resp. hoettli teile (os prisleche groend) ond vorauem weus ned lang gange esch ond mech dfraue afoh froge haend, oebi scho ghuerote sigi, ond weni nei gseit hetti hettes afoh me verkopple, ond saeb hani de doch ned weue... sehr bekwem gsi eifach "jo, i be verhuerotet" zsaege ;o)

nachere haubstoendige fahrt of de faehre semmer en tuk tuk acho, es stettli oder besser gseit doerfli ofere groooosse ensle em lake toba. meeega schoen, sehr gruen ond wonderbar ruhig. oeises hostel het os dene wonderschoene tuepische indonesische hoettli bestande. dtaecher goend of beidne site jewils e spetz ufe, sehr sehr schoen. foer je 2 schwizerfranke haemer es zwoeistoeckigs hoettli met badzemmer ond heisswasser gha, en traum!! das ganze diraekt am see met eignem feschteich ond omgeh vo garte. das ganze meteme wonderbare verwauter, de mr. moon, wo sech sehr veu mueh geh het oeis travellers slaebe so schoen wi moeglech zmache, wasem au sehr guet glonge esch.

ofeme spaziergang semmer aui die wonderschoene carving (schnetzereie) shops abklapperet. de mark spennt nach dene ond ich ha me astecke loh ond mer foer oeisi (em patric ond mini) noei wohnig es totempole gkauft. meeeega schoen. aber schwaer ond ondhandlech... es esch set hoet ofem waeg rechtig schwitz ;o))) einisch haemer oeis es toeffli gmietet ond send zo ergendweuchne heisse kwellene gfahre, de aber schlossaendli ned go bade weu erschtens send manne ond fraue trennt gsi ond ich be di einzig frau gsi ond zwoeitens esches ned eso ganz suber gsi ond zheiss, so haemer oeis druf geiniget s'eifach loh si zloh. defoer haemer en wonderschoeni fahrt gha, dor risfaeuder, a wasserboeffu verbi ond au dene traditionelle huesli, sehr froendlechi luet ond wenkende chender wo am liebschte dhaend abklatsche bem verbifahre. mer haend sogar es roenne met zwoei meitli ofeme andere toeff gmacht, seeehr loschtig gsi. i glaub mer haend gonne...

so, i mache mou e pause, ha scho weder so veu erlaebt ond ich wott eu jo ned oeberfordere oder langwile met mine brechtli, i maeude me gli met de fortsetzig vo lake toba ond mim verrockte tschongutrip!!

have a nice week end
sreisefoeddli oli