reise en laos

mini noechschti deschtination esch phonsavan, es chlises ministettli em norde vo laos. grad nach akonft haemer oeisi potnoodles uspackt ond en snack zo oeis gno. komisch, potnoodles ghoere glaub zo oeisne lieblingsgrecht, sempu, aber effektiv. ond deheime woerde mer vermuetli dnase roempfe. tja, mer werd asprochslos...

of oeisere erkondigstur semer bem uxo center verbicho ond haend inegluegt. uxo send onexplodierti bombe etc. wo tonnewis omelegge. phonsavan lit er meischt bombardierte zone set eh ond jeh. ond sehr veu vo dem zueg lit no ome. trurig esch, ass veu iheimischi das zueg sammle ond verchaufe, die einzig moeglechkeit, ergendwie sini exischtaenz zsechere. natuerli passiere veu omfaeu, ond trekke dor onpfadeti waeg esch secherlech ned empfaehlbar. da haemer au gseh, wo mer zo de plain of jars send. das send verschednigi ort, wo riiiesigi tonchrueg omelegge. ehri haerkonft esch ongwoess. di iheimische saege, es sig vo fruechere chriegszite, ond si sige met lao lao, em iheimische whiskey, gfoeut gsi. na ja, de schwaerscht chrueg esch 3 tonne ond de groescht 3m, esch da ned wahnsennig?! glaege a wonderschoene orte er mette vor natur, vo bombekrater dorchsaet, a beschter ussechtslag. auerdengs doef mer nor of de waegli laufe, die send entmint worde, aues osserhaub esch schwaerschtens abzrote. jo, es wemmlet vo mine ond onexplodierte bombe, wahnsenn ond onvorsteubar. smettagaesse vo dere tur esch loschtig gsi, so esch oeise fuehrer cho ond het gseit: smenu vo hoet esch...nuddusoppe. aente, chue oder gmues. i ha chue bsteut ond es esch osserordentlech ned guet gsi... ond het oepe glich usgseh wi daente... brrr... i cha ned verstoh, wi si do en laos nuddusoppe choene verhonze, ond da esch sowit seinzige gsi, woni do ha choene aesse, seufz... am nomittag haemer doeberraeschte voneme rossische panzer beguetachtet ond meh chrueg bsuecht. en guete usflog.

au s'stettli esch vou met onexplodierte (auerdengs (hoffentli) entschwerfte) bombe. vor de hueser diene si aus dekoration oder aus gartehaeg, zom teil gseht mer si haubiert aus bluemetoepf oder ufgsteut aus aeschebaecher. sehr kreativ. aber sehr, sehr trurig. damerikaner haend do woerkli aues geh, ond koemere sech en draeck oms ufrume. dbure choene ehres land ned bearbeite weus oeberau no bombe het, ond joehrlech staerbe emmer no veu luet, weu si metem pflueg oeberes uxo fahre oder chend demet spele. aber das schint osserhaub vo laos niemer zentressiere.

nachem trip haemer oeis am maert uslade loh ond send of erkondigstur. hui, i ha weder loschtigi sache gseh. so zom bischpeu schwinsohre, en snapping turtle (wo eim gaebig de fenger cha abbisse) oder froesch laebig aneme spiess oder en taeller meteme mix wo usgseht wi froesch osem teich zoge. froesch, larve, chaeber, aues wo mer sech erdaenke cha. osserdem gseht mer oeberau die grusige aal, zo honderte eneme choebu zaemepfercht. uarg. oeises znacht haemer em reschtorant 'the crater' zo oeis gnoh. sehr onagnaehm esch gsi, ass chend naebe oeisem tesch gstande send ond jedere bewegig vo oeis gfougt send. dbedienig het si emmer weder waeggscheckt, aber da het si ned devo abghaute, grad weder zcho sobaud si waeg gsi esch. da esch muehsam gsi. trotz de armuet haemer ned sgfuehl gha, asses dene chend schlaecht goht, sondern ass si eifach scharf of da gsi send, wo mer aus weschtlechi aesse. kei ahnig, aber sehr onerfreulech.

nacheme chorze ufenthaut en phonsavan haemer weder de bus gno nach sam neua. sowit semmer e eim tag cho. dfahrt esch wederom dor di gruene baerge gange, sehr sehr schoen, dor chlini steuzehueslidoerfli ond risfaeuder, urwaud ond aerdrotschgebiet. dkorve send hoorstreubend gsi, ond dfahrer send ned woerkli aengschtlech... mer esch aernschthaft schlaecht gsi. vellech aber au nor, weui weder emou onder dorchfau lide...

sam neua esch ned woerkli sehenswaert. mer haend nor foerd nacht aghaute weu mer e eim tag ned witer cho send. ond es esch guet, nach 8 stond osem bus zstige ond sis taube foedli zbewege... so semmer weder emou ofe maert, emmer e guete zitvertrib, ond haend hoet aus attraktion en rehchopf ond rehhuf gseh. emmer weder faszinierend! nacheme schlommertronk meteme kanadier ond eme brasilianer semmer gli es bett ond haend oeis foer di noechscht busfahrt vorbereitet, wo oeis nach nong kiaw gfuehrt het. die cheibe laoner lose foers laebe gaern musig, laotischi musig, ond das ganze en ohrebetaeubender lutsterchi. mer haend oeis met ohrepfroepfe usgstattet, aber dmusig esch emmer no saulut gsi. es esch en tortur! waehrend eme bislistop haemer gfrogt, wi lang asses no goht bes nong kiaw, oeisi noechscht destination foer de tag. aus antwort haemer di zau 6 oebercho, aber kei ahnig, oeb mer am saechsi achoeme oder oebs no saechs stond goht. guet, mer loehnd oeis oeberrasche. mer send ase am haubi achti acho (nach 10 stond busreis), ca 3.5 stond nachdem ass mer gfrogt haend. do seu eine drus cho...

ondercho semmer eneme haerzige bungalow, met secht oeber de floss. d'rueh esch herlech gsi! nach dere droehnende busfahrt esch mer doch sehr laermempfendlech, ond glaubet mer, da esch ned e frog vom auter!!! die karaoke musig (do cha jede en platte ufneh!) esch wohri fouter! nach dem zwoeite tag reise haemer oeis nachem znacht es privats kino goent. en iheimische bietet sini dvd kollektion ah ond mer cha de rum eneme private 'kino' luege. da esch en schoene, ruhige abschloss foer de tag gsi.

ond oeisi reis zo de noechschte deschtination esch noni verbi gsi. nach zwoei taeg busfahre esches am noechschte morge meteme chline tukerboetli witergange. mer haend am bootablegeplatz ofs boot gwartet ond haend de ian ond d'valerie troffe, zwoei euteri reisendi, seh os frankrich (vermietet ehri wohnig en paris ond laebt devo!!!), ond aer en aenglaender wo en frankrich laebt. naebem kafi wo mer gwartet haend esch spraengstoff abglade worde, chlini chend haend dromome gspeut ond das ganze esch mer echli onghuer gsi. aber do schinbar nuet anders... zaeme semmer de es boetli ghocket ond haend gwartet, ergendwie het niemer gwoesst, wenn genau ass es abfahrt. tja, so lauft da do, mer esch emmer parat foeren oeberraschig, esch da ned schoen?! ;o)

hey, da esches weder gsi! woensche oei en schoene sommer ond bes gli weder!

tschuuuueeeesss

tubing!

ha, mer send en viang vieng acho ond grad em erscht beschte hoteu ondercho. mer ghoere definitiv noeme zo dene, wo zerscht aui hostels abklappere bevor mer onderchoeme. mer werd haut bekwem. vang vieng esch es loschtigs chlises stedtli, wo e jedem reschtorand friends lauft, vo morge frue bes obe spoht. es het au ned woerkli stueu, sondern haubi bette wo mer onderem tesch lit ond faehrnseh luegt. herrlech!

metem toeffli semmer dor die wonderschoeni landschaft dueset, risfaeuder ond grueni baerge oeberau. es wonderschoens beud. wemmer de floss oeberkwert haend haemer jewils foerd brogg muesse 'zou' zahle. wenns ned eso veu wasser gha hetti waere mer dor de floss gfahre, da moeches do schinbar. dbrogge send jo ned woerkli brogge, meh es paar houzbraettli oeberem wasser. ond dstrosse passe grad dezue, onterreti draeckwaeg met loecher bes of auschtralie abe. es erlaebnis!

a de sogenannte blue lagoon haemer es poeiseli gmacht. wonderschoen am bach, wo mer sech met seili es wasser schwenge cha. swasser esch normauerwis blau wi de hemmu, aber weus haut e letschter zit echli veu graegnet het esches meh echli brun trueb gsi. aber glich no schoen. schmaetterling haend de gfaue a oeis gfonde ond send oeis ofd schoutere ond ofd haend ghoecklet ond haend dsonne gnosse. de haemer oeis of de waeg zor hoelli gmacht, woni de waeg gseh ha hani zerscht emou muesse lache: es esch en chlaetterpartie gsi, en ufsteg dord feuse met zom teil bambusstange zom sech dra abzstoetze. i ha ase mini mehbessere flip flops agha... die stigig esch erfougrich beklomme worde ond mer haend vorem igang haut gmacht ond gluegt, wer aues usechont. aui send mega draeckig ond vorauem nass gsi, zom teil sends ufgschnette oder ufgschoerft gsi ond haend sech oeber riiiisigi spenne beklagt. abgseh vo oeisem schuewaerch haemmer ned lang muesse oeberlege, es esch klar gsi ass mer da ned bruche. amuesiert haemer oeis aber trotzdem. ofem absteg (wo genau so schwerig wi de ufsteg gsi esch) haemer es oeberdimensionaus waeschpi beobachtet wo en hoeigoemper e sis naescht transporiert het. snaescht es ofem waeg gsi, es loch em draeck, wos naer weder zuegscharret het, nachdem asses sini bueti versorget het. sehr entressant!

ofem roeckwaeg haemer en bierstop gmacht ergendwo am waegrand. ploetzli esch es babyaeffli osem hus cho ond esch om oeisi bei gklaetteret. uuuh haerzig, grad emou 4 woche aut. nachdem asses en rambutan zom aesse oebercho het esches grad weder igschlofe, so astraengend esch das aues gsi. uh suess.

grad denaebe het en frou sideschaus gmacht, meteme risegrosse waebstock. mer haend es wili zuegluegt ond haend de foer nes vermoege igkauft. es schliessli spezieu wemmer grad cha zueluege, wi die gmacht waerde.

chorz bevor mer zrogg es stettli cho send haemer no schnaeu em spitau aghaute, de mark het am handglaenk en komische chreis vo stechli gha, wo uh besse haend, scho set woche, ond dhut het sech afo abloese. de arzt het gmeint, es sigi en hutchranket, aber das esches definitiv ned. hani nor no schnaeu weue afuege, es send ase ned nor d'doektere en thailand...

es esch oebrigens au do gsi, woni suftaktspeu zor euro gseh ha (jawohl, i be hendedri met mine blogs) ond de arm mark het met mer muesse metfaene. aer het sech auerdengs scho chli gfrogt, werom mer 'auschwitz, auschwitz' ond 'she's a nazi' senge... be zerscht fasch echli trurig gsi, asi jez aui die partys deheime verpasse, wo si de aber verlore haend eschs mer grad weder glich gsi ;o)

do zieht mer bevor mer enes hus goht dschue ab, so au em hoteu. ond was passiert?! em mark sini schue send gstohle worde!! sone mescht. ha, mer send aber glich goge tube. da heisst, mer goht es buero go zahle, chont en nommere ofd hand gschrebe oeber ond en risige traktorepneu werd met oepe 20 anderne ofs dach voneme tuk tuk glade. vo det us werd mer flossufwaerts gfahre ond abglade. de foht de spass ah! mer hoepft e si gommireng ond fluesst flossabwaerts, wos of beidne site bar nach bar het on si eim metere lange bambusstange zom wasser usziehnd wemmer wot es bierli choge neh. e de bare chamer sech vo baeum us metere liane es wasser schwenge oder aneme kabu oebers wasser gleite ond sech es wasser plumse loh. da esch vellech fun!! mer haend ase flissig aghaute, i ha e schlammbemolig oebercho metem uftrag so veu wi moeglech zbemole (wasi sehr aernscht gno ha) ond so veu bier gha, ass ich mech todesmuetig voneme baum gstoerzt ha, entlang a eim vo de kabu ab es wasser, da het jo vellech spass gmacht!! am schloss semmer en riesigi troppe gsi, mer het sech emmer ond emmer weder troffe, bes mer am schloss enere risige chetti bes as aendi de floss ab send. super gsi! aber naer hani muesse goge legge...

metem super vip aircon bus (wo grad emou 10 minute glofe esch) esches dord baerge witer nach luang prabang. es witers echli groessers chlises stettli. sehr turestisch, aber kulturell. so semmer a eim tag en taempu goge aluege, em nationaumuseum gsi ond ich be zom sonneondergang ofe stadthoegu ufegloffe ond ha de sonneondergang vom taempu det obe us gluegt. super ussecht, esch wonderschoen gsi. zobe esch jewils en grosse maert ufgsteut worde ond dstross foer de verchehr gschlosse worde. de ueblichi schrott, ned woerkli spektakulaer. ossert de food maert, woni einisch es pouletbroeschtli am staeckli gha ha zom znacht. mhh. aber da esch oepe seinzige gsi zom aesse det, soesch hets huenerchoepf oder bei geh ond jenschti igeweide. yam...

am spoetere obe semmer met em tuk tuk e di hiesig bowlinghalle. ha, da esch jo vellech en lacher gsi! obwou, sehr modaern, ond die beschte popcorn ever. weus echli veu luet gha het haemer en amerikaner ond zwoei iheimischi of oeisi bahn iglade, da esch de brueller gsi. nach jedem schoss esch abgklatschet worde (saeubscht wenn mini chogle de abfloss ab esch...) ond jede het sini fangmeinschaft gha.

metem tuk tuk semmer zom kuang xsi wasserfau, wo super hellblau esch, ond haend en wonderschoene tag osserhaub vom stettli gha. es send mehreri chlini wasserfaeu ond ei grosse gsi, wo mer sogar ufegklaetteret send zom obenabe luege. en superschoeni ussecht! de waeg esch zom teil onder wasser gsi ond mer send vougsproetzt worde, swasser esch vo oeberau haer cho. aber es esch jo warm, so mache mer waege es paar nasse chleider kes drama. mer haend sogar choene schwemme, chli chueu, aber herrlech. naebem wasserfau hets e grosse chefig met baere, ond bes vor 2 woche haends sogar en teger gha, wo aber leider gstorbe esch. metem irlaender ond am aenglaender vo de tour semmer grad nomou goge bowle ond haend weder en superglatte obe gha. es schint auerdengs, ass hetti mis training geschter ned gfrochtet... wod haue am drue zuegange esch haemer leider hei muesse (was vieri worde esch), entspraechend hani fasch de ganz noechscht tag gschlofe.

d'bank esch au no erwaehnenswaert: da esch es chlises ruemli met zwoei schauter hendere houzwand. secherheit kennes do ned woerkli, i glaube die woerde oeber oeis schwizer lache! hani no ganz vergaesse, en ventiane esch sogar de tresor offegstande ed wartehaue use ond ofeme tesch hets stapuwis gaeud gha wo eifach so omeglaege esch. millione oeber millione...

zom letschte znacht haemer oeis e pizza weue goenne. dbedienig het gseit, ass de ofe bereits abgschaute sig. de mark het nomou gfrogt, oebs woerkli ned moeglech sig, ond aer het nei gseit ond esch ine. de escher weder usecho ond het gseit, mer choene jez glich pizza ha ;o)so lauft das do di ganzi zit. aber zo jedere pizza hets es gratis bier geh, da esch vellech super gsi!!! leider haemer da ersch usegfonde, wo mer zaut haend, soesch hette mer secher nomou eini bsteut!

saeh, i maeude mi jez weder ab e dschongu!

es liebs gruessli
oli

e hauptstadt?!

ui, i be aendli en laos acho! auerdengs erscht nachdem ass mer es relativ langs ireiseverfahre gha haend, inklusive zahle foer visa, oeberzit (nach de 4e 1$) ond ireisegaeud. es het aber glich no glaengt, om e dutyfree shop zgho, was bsonders loschtig gsi esch, weu de esch nach de graenze gsi ond kene het kontrolle gmacht, oeb mer i oder us oder gar ned reist.

mer haend en gueti bar en ventiane gfonde met super aesse, det semer de au regumaessig he. guets aesse esch sooooo veu waert!! aber super esch jo woerkli, ass laos en auti franzoesischi kolonie esch, ond drom gets do ooooeberau baguette. ned ganz eso fein wi deheime, aber doch fasch wi rechtigs brot!! en traum...

am noechschte tag haemer oeis de grad es toeffli gmietet ond send losdueset om die hauptstadt vo laos zerchonde. aber: es get gar ned so veu zerchonde. ventiane esch zwar gross, aber glichzitig doch chli ond onschinbar. zgseh gets ned woerkli veu, emou abgseh voneme grosse stadttor wo os zemaent baue esch... trotzdem, mer haend oeise spass gha. agfange hets demet ass mer ofd bank haend weue ond dra verbigfahre send. ause haemer a de chruezig en u-turn oebers rotliecht gmacht, vor de nase vo de polizei, wo oeis saeubverstaendli grad zroggpfeffe het... die sieche stoend do a JEDERE chruezig, kei scherz!! guet, mer send ause vors polizeschtehuesli ond de polizescht het oeis afoh usfroge ond oeisi 'verdikt' ufgschrebe. ause, mer haend e kei dokumaent foers toeffli gha, kei fahruswes debi, kei pass (de haemer aus depot ber vermietig glo) ond absolut e kei ahnig, wi oeises hoteu heisst. ah jo, ond ossertdem haemer kei kip gha, di laotischi waehrig... guet, so haends oeis gseit, mer muesse d'buess ber lokale polizeistation zahle, mer choene oeises (soebe gmietete) toeffli det abhole. ond ah jo, es sigi jez 4i, dpolizeistation het bereits zue, mer seue doch morn cho... die haend jo wou eine am heum!! guet, vellech naends jo dollars. jep, die raechnig waer 10 US$! ha, 10 US$!!! guet, mer zahle jo schliessli bar, mer probieres doch emou met 5$... aber nuet esch, die schine do sehr korrekt zsi, mer haend ase di ganze 10$ abglade ond send met oeisem toeffli abdueset. dbank esch natuerli, wi choents au andersch si, bes denne au zue gsi. das ganze esch ase sehr loschtig gsi, mer haend no lang glachet ;o)

metem oeffentleche sogenannte bus(li) semmer zom buddha park gfahre. en langsam am verfallende park em gruene met uh veune buddhas, zom teil woerkli zom lache! aber es het au senigi gha, wo mer het choene bestige. es abentuer vo de bsondrige sorte. di loschtigschte sache gseht mer do, zom bischpeu e oeberdimensionaue ma wo anere oeberdimensionaue greue es bei uszehrt.

that luang hani no vergaesse, da esch en wonderschoene taempu er stadt, sehr idroecklech. mer send be sonneondergang gsi ond sliecht esch herrlech gsi, uh schoen. am bode haemer en grosse tote skorpion gfonde, soveu zom wildlife vo laos. zom zvieri hani es chicken on a stick oebercho, da esch ase ganz super gsi. zwoescheneme staeckli chlemmes es haubs huehn ih ond broetles ofem greu! wens fertig broetlet esch nemmt mer das staeckli ond knabberet shuen ab. da esch so fein gsi, asi grad nomou eis gaesse ha. naer eschs mer aber schlaecht gsi...

am drette tag (am zwoeite beni ohni pass er bank gstande) haemers de aendli ofd bank gschafft ond ich ha 700 franke en laotische kip bezoge. wasi oebercho ha het mis haerz hoecher schloh loh! 6 millione!! i ha drue stapu bonde meteme papierzeddeli oebercho, wie eneme krimi met empfuehrigsdrama! aecht! mer haend es plastikseckli defoer oebercho, e mim portmene het da emu secher ke platz gha. da esch so super gsi ass mer zrogg es hoteu send ond es bad em gaeud gno haend. het sech ase herrlech agfuehlt! muender ombedengt au mou mache wenn der 6 millione e 20'000er note zor hand haend!!

osserdem semmer em einzige shoppingcenter vo laos gsi. het mi ned woerkli os de socke gruert, ond trotzdem hani eis zwoei saecheli gfonde zom metneh. em lokale handicraft market haemer fasch en haerzsteustand gha: die verchaufe do ohni met de wempere z'zocke rhino horns!!!!!!!! NEEEEEEIIIIIIIIIIII!!!!!!!!!!!! he, die send em fau aecht gsi, kei zwifu, ond niemer seit oepis... foer 40$ sender debi... *bruehl*

osserhaub vom maert haend goldschmede ehri konschtwaerk diraekt of de stross gmacht. i ha es wili zuegluegt, esch ase aecht entressant gsi. vermuetli schaffe oeisi goudschmede scho set johrzaehnt noeme eso, aber da machst omso spannender. do werd ghaemmeret, gfuehret ond poliert, i be fasch noeme zom stuhne us cho.

bevor mer de bus nach vang vieng gno haend haemer oeis no met sandwich vo de franzoesische baeckerei ideckt, die send so hammermegagigafein gsi! mhhh...

hebet e schoene fuerobe ond bes gli weder, ha no hufe zverzeue!!

drueck
oli

visa run

onglaublech wie die zit lauft, esch ase do ned andersch! of au faeu beni jez bereits e monet en thailand ond mue ofene visa run. das heisst, asi en tagesusflog a di cambodianischi graenze mache mue ond weder zrog of thailand ireise. guet, so haemer en bus (wo aegstra foer visa runs esch) buechet ond send uuuuh frueh am morge uf. ond haend anderthaubstond of de bus gwartet. grmpf.

emmerhin esch de bus bekwem gnue gsi ond mer haend oeises usfloegli nach poipet gnosse. schlofend. em chline stettli a de graenze haemer zmettag gha ond ergendeine vo de tour het oeises tagesvisa foer cambodia organisiert. zaut haemer ergendwo om di 40 dollar, ond en backpacker het oeis ufgklaert, ass mer boes oeber sohr ghaue worde send. wo de mark (he,he) de tuep druf agsproche het het er nor gmeint, das sige handlings choschte, ass aues ribigslos lauft. aehae.

zfuess semmer oeber di thailaendischi graenze es no mans land. oeberau hets baettelndi chend gha, wo eim metteme scherm haend weue schatte geh, ned ome soescht natuerli. eis esch naebe mer haer glofe ond het emmer 'money' gseit, ganz ufdrenglech (ond i ha scho mehrmous nei gseit), bes si mi agfange het am arm zehre. da het mi echli andersch gmacht, aber bevori ha choene reagiere het si eine vo de andere turis apforet ond si esch verschwonde. ned schoen die beuder. em no mans land saeuber send loschtigerwis casino nach casino, uh spezieu. ond es staubigs kommen und gehen met schubcharrene, toeffli ond witus oeberfoeute laschtwaege, wo mendischtens 1000 johr aut send, i hetti stondelang choene zueluege. komischerwis esch au dloft sofort nach de graenze ganz andersch gsi, staubig ond draeckig, es esch wi mer woer en strech zwoesche de beide laender zieh ond aues esch totau andersch of desere site.

nachdem ass mer offizieu en cambodia igreist send haemer chorzerhand entschlosse, ass mer ei nacht em no mans land verbrenge, e eim vo dene casinos! jep, da esch zwar luxus gsi, aber definitiv sabentuer waert gsi ;o) so haemer oeises wonderbar schoene zemmer (ohni feischter) bezoge ond send scasino go beguetachte. die spele do ganz anderi speli, zom teil met bohne wo mer schetze mue. es esch en grosse topf vou bohne, ond si naend es kaffitassli vou use. denn waerde di bohne e viererhuefeli ufteilt ond dluet muend schetze, wi veu ass oebrigblibe, nachdem ass so veu wi moeglech of vier ufteilt waerde. andersch. pokeret haends au, aber ned da poker wo mer kenne. ond do esch jo vellech gaeud ome gsi!! onglaublech. kei ahnig wo au das gaeud haerchont.

nacheme spaziergang dor di verschedene casinos haemer oeises gloeck amene roulettetesch versuecht. ond woerkli, oeisi baht haend es schoens wili glaengt, ond waehrend em spele haemer gratis bier ond aesse oebercho, so veu wi mer haend weue! da esch ase super gsi, so goenschtig esch sbier definitiv niene!!

womer de oeises gaeud aendli dore gha haend semmer es bett goge faehrnseh luege. ui, win ich de faehrnseh amigs gnuesse! da esch of minere reis en rechtig chline luxus worde. chum esch sliecht us gsi het de mark en stechattake gha ond sliecht esch weder agange. em letschte momaent hani en moerderbedbug gseh ond muetig wini be hanine toeded!!! boah!!! i glaube, i ha em mark slaebe grettet... nach lange diskussione werom de cheib erscht cho esch wo sliecht us gsi esch het de mark didee gha, ass die de faehrnseh ned gaern haend. jawohl. resultat: de faehrnseh esch di ganz nacht glofe...

noechschti deschtination esch khorat gsi, di zwoeit groeschti stadt en thailand. dbusfahrt esch dor en wonderschoeni landschaft, aues esch wonderbar gruen gsi. onderwaegs semmer vo de polizei aghaute worde ond si send dor oeise bus glofe ond haend aui boes agluegt, de sends weder use ond mer send witer gfahre. en khorat saeuber gets ned auzuveu zgseh. es het au fasch keni tureschte ond dluet send sehr, sehr froendlech. was echli schwerig gsi esch, esch aesse zfende wo ned os chaeber oder feschmage en chilisauce bestoht... en useforderig. mer haend de mou met froesche donughts vom maert agfange, en traum.

metem oeffentleche bus haemer zor khmer ruine phanom rung weue. onderwaegs het de bus komischi gruesch gmacht ond ergendwie hets au echli komisch gschmoeckt. mer haend aghaute ond gwartet, bes oepe dheufti vom bus usgstege esch. zom gloeck haemer gfrogt was lauft, weu mer haend au use muese ond oeis ene bereits oeberfoeute bus kwaetsche. de mark esch fasch ofem busfahrer ghocket ond ich be ergendwo abdraengt worde...

a de chruezig semmer de use ond mer hette eigentli en andere bus seue neh. nach potnoodels haemer beschlosse, as mer afoend laufe ond de bus ahaute, wenner chont. mer haend ned weue met em tuk tuk goh, veu ztuer. hi, hi, es esch ned lang gange het es auto met ladeflaechi aghaute ond oeis ufglade ond a di noechscht chruezig metgno. det semmer voneme chline bussli ufglade worde, foer en zahlbare pris. mer send of de rampe gstande ond haend dussecht gnosse, bes de fahrer ergendwo er pampa aghaute het ond ploetzli anstatt 30 baht 300 het weue pro person. de het jo wou eine am heum!!! guet, so semmer usgstege ohni oepis z'zahle ond send witerglofe. ui, es het ase usgseh, as waere mer no raecht wit ewaeg... aber lang esches ned gange ond enere korve hangufwaerts het es superlessigs auto aghaute ond di zwoei manne haned gfrogt, oeb mer zom phanom rung weue. he, airconditioning ond laedersetz, da esch jo vellech hip gsi! ond es esch ned ergendoeper gsi, sondern eine wo es buech oeber gschecht (gaaaehn) gschrebe het met sim lehrer, beidi os bangkok. super gsi!

druine saeuber esch secher sehenswaert ond idroecklech gsi, ganz bestemmt anere super lag metere hammer ussecht. schinbar aber grad emou er groessi vom igangstor en siam reap, was mini idroeck echli gschmaelleret haend. onderwaegs haend oeis iheimischi tureschte gfrogt, oeb si doefe met oeis es foeteli mache, da esch jo weder bsonders loschtig gsi ;o)

gaaaanz zuefeuig semmer glichzitig wi oeises taxi fertig gsi ond di zwoei haend sech ghert gfuehlt, oeis weder met ad chruezig zneh, wo mer de bus zrogg nach khorat gnoh haend ;o)

am noechschte tag haemer oeises gepaeck bereits weder montiert ond send a bahnhof, vo wo mer de zog nach udonthani neh haend weue. auerdengs haemer uh lang muesse of de zog warte, weu ergendwie niemer so raecht gwoesst het, wenn de zog fahrt. esch aber uh spannend gsi, weu ploetzli send of de andere site vor hautesteu grossi laschtwaege met schueumeitli hende ene igfahre ond ploetzli esch de ganz bahnhof gaeu (for schueu uniform) gsi. wid heuschrecke send di meitli oeber dtelifon ond aessstaend haergfaue ond mer send chum zom luege us cho. komischerwis haend di meitli sogar aui di glich frisur! wo sech de ganz tumult echli gleit het haemer witeri laschtwaege gseh ifahre, demmou met de buebe. de mark esch schnaeu no es chauts gogi go chaufe, bevors nuet meh gha het! wahnsenn, das send secher oepe 1000 chend gsi!

de zog esch so vou gsi, assi mini balance chum cha choene hebe. de 7ni zog vo laenzborg nach zoeri esch e draeck degaege, glaubet mer! ond dor die moenschemasse haend sech aessensverchoeifer met ehrne choebu ond choerb droeckt, es esch fasch onertraeglech gsi. de zog het a jedem meschthufe aghaute, aber es send nor no meh luet igstege... i ha angscht gha, ass da foer di ganz fahrt vo 6 stond eso goht, aber zom gloeck sends de woerkli emmer weniger worde ond mer haend aendli es plaetzli zom hocke gfonde.

udonthani saeuber esch nor en zwoeschehaut gsi bevor ventiane ond ned woerkli erwaehnenswaert. oeises hotelzemmer esch bsonders grusig gsi met kakerlake, waeh, ond mer haend es aenglischs pub gfonde met super aesse. de enhaber esch emou en privatdedektiv gsi!!

sodoseli, woensche oeich es schoens weekie (ha gseh ehr haend super waetter!) ond ruehret doch oepis foer mech of de greu!

besos
oli

er shoppingmetropole

wow, de VIP bus nach bangkok esch vellech de hammer gsi! es het sogar en hostesse a board gha wo oeis met guddelis ond ztrenke versorget het!!! ond de bus het nor 24 setz gha, da heisst en zwoeierreihe ond en einerreihe. da esch jo vellech komfortabu gsi. mer haend of jede fau ned de idrock gha, ass mer di ganz nacht onderwaegs gsi send, ond en bangkok semmer osem tuefschlof erwachet, chorz bevor mer a de busstation itroffe send. weud di noei busstation osserhaub vom stadtzentrum lit haemer oeis es taxi gsuecht. de mark esch loszoge ond het es taxi gfonde, wo bereits gsi esch, de meter zbruche. aer esch mech de choge hole ond wo me de taxifahrer gseh het, hetter dflocht ergreffe ond esch abgfahre... kei ahnig werom, ganz eso schlemm hani doch au ned usgseh. aber vellech hetter angscht oebercho woner min pfihlboge gseh het... . guet, mer haend en andere taxifahrer gfonde wo de meter ned het weue bruche, aber 100 baht het weue. mer haend gwoesst, ass mer zerscht en grossi tour muend mache, om dstrossesite zwaechsle, bevors de aendli ed stadt goht. am morge am saechsi. es esch au tatsaechlech ned lang gange ond mer send e stau cho, ond de taxifahrer het au ned lang of sech warte loh ond het meh gaeud weue waegem vercher ond em lange waeg zom chehre (woner jo voraene aues ned gwoesst het). mer haend aber taubi ohre gha ond das ganze het denne so gaendet, ass oeis de taxifahrer weder am glichlige ort usegloh het (emu nachdem, ass er zerscht probiert het oeis usezruehre, witer ewaeg vor stadt ass mer gstartet send...). aues e auem haemer de es taxi gfonde, wo oeis met meter foer 80 baht gfahre het.

so zom istig semmer via floss es stadtzentrum, gnauergseit es shoppingcenter paragon. wow, da esch jo vellech super gsi, i wett oeisi 'shoppingcenter' waere eso cool ond modaern ond sehenswaert. hui, ond em ondergschoss hets en riiiiiiesige gourmetlade gha, die haend sogar cervelat verchauft!! ha mi aber ned getraut, eine zchaufe (esch aues sautuer gsi), em fau asis de ned gaern gha hetti. hett aber dorchus eine moege verlide... defoer hani nach laaaaangem RECHTIGS BROT oebercho. da het jo vellech guet to! ond do verchaufes porsches, ferraris ond masserattis em ichaufscenter! scho no spezieu. ha ase en superschoene secondhand porsche gseh woni sofort gno hetti, esch zwar vore echli verchratzet gsi, aber foer 20000$ saege mer ase nuet.

am obe haemer de xander troffe, en amerikaner wo en borneo sin divemaster gmacht het, wo mer det tauchet haend. super cools wedersehenstraeffe! met ehm esch es brittischs paerli gsi, ond seh het ase au en worm e ehrem fuess gha. ond ploetzli escher verschwonde ond e ehrem arm weder foerecho!!!! ui. es het so afoh aberaegne asd stross au das wasser noeme het choene schloecke ond weder emou semmer onder wasser gsi. ohni zluege, i be bes oeber dchnoechu em wasser gwattet, wo mer oeisi bar verloh haend. ond ich ha gar ned weue woesse, was aues om mini fuess gschwomme esch...

em xander sin froend os de staate esch zo oeis gstosse, echli en komische tuep, aber schlossaendli emmer no en amerikaner (ond somet entschoudiget). aui zaeme semmer nach phat pong, srotliechtmilieu aber au en riiiiesig grosse nightmarket met veu guete faeuschige. shoppe esch zvierte ned eso wonderbar gange, drom hani scho agkoendiget, ass mer weder zrogg muend. ha aber doch scho di erschte icheuf gmacht (oss angscht, assi snoechscht mou ned aues mag traege) ond de mark het foer mech gmaertet ond gmaertet. er esch steihert ond get ned uf bevor de vercheufer traene er auge het. nei, oebertribe natuerli. aber er esch woerkli super, ond aendli mou en ma wo gaern shoppet!! halleluja!!! auerdengs send dvercheufer do raecht fraech ond agressiv. mer haend zom bischpeu noeime oepis aglueget, haends denn aber ned weue ond de vercheufer hets ombedengt weue verchaufe ond het oeis gfrogt, wi veu mer zahle. das ganze aber ned normau, er esch oeis nohglofe ond het oeis zrog a stand zehrt. wo mer kei andere uswaeg meh gseh haend ossert en (sehr chlini) zau of sin tascheraechner ztippe, het er oeis meteme 'fuck you' devogscheckt...

nachem shoppe semmer ene bikinibar, wo fraue (oder manne?!) of de bar tanzet haend ond vermuetli zom verchauf gstande send. esch definitiv en spass waert gsi. sbier esch zwar echli tuerer gsi, aber dshow esch ganz ome soescht gsi. ich eleige met drue manne, herrlech ;o) ha naer druf bestande, ass mer dors schwuleviertu laufe, ond mini drue manne haends mer ned choene abschloh. fasch echli erschreckend gsi, woerkli, kei einzigi frau wit ond breit. ossert mer. i ha de weue en wettbewerb starte, weue vo dene druene zerscht a arsch glaengt werd, aber si haend ned weue speue...zrog cho semmer meteme tuk tuk, vom mark usghandlet. de deal esch of 100 baht bestande, auerdengs heter em tuk tuk fahrer ned gseit, ass mer zvierte send ;o) hi, hi, saeubscht aer het muesse lache, woner oeis gseh het ;o) aber er het de deal astandslos ighaute. er het defoer au echli trenkgaeud oebercho. en glatte obe gsi. ofem heiwaeg haemmer en babyelefant gseh. leider choeme ehri fuehrer metene ed stadt ond mer cha fueter chaufe om si zfuettere. i mue jo zo dene sache nuet meh saege. i meine, es esch mette er nacht (wenn ned scho morge), es esch lut ond au die luet goend a das baby aene ond taetschle ond grapsche. wederlech.

zrog em paragon shoppingcenter semmer es riesige noeie aquarium. ha jo scho veu gseh, aber da esch woerkli hammermaessig gsi. zueg woni no nie gseh ha! zom bischpeu riiiiiesigi spennechraebs, meteme dorchmaesser vo 4 meter!! oder meeresaengu, chlini wenzigi (vermuetli) qualle wo woerkli usgsaehnt wi chlini aengeli. mis highlight esch aber definitiv de thunfesch gsi, gfrore eneme is-chlotz. das naette tierli het ergendoepis om di 800kg ofd woog brocht. aber au dhai- ond rochefuetterig esch super gsi. ossertdem esch no en fahrt metem glassbodeboot debi gsi, was au sehr entressant gsi esch. osserdem haends risigi potatocods gha, setem tauche am codhole beni bsonders fan vo dene, ond i ha si no e keim andere aquarium gseh. mer haend stonde em aquarium verbrocht...

es witers highlight foer mech esch de week end market gsi. de esch onglaublech gross, mer verlauft sech, versproche, ond mer fendet aues! ond ich meine aues. i ha sehr veu zit em hustiersektor verbrocht, wo hauptsaechlech jongi hoend ond chatze verchauft waerde. aber mer fendet au aechse, froesch, spenne, krokodil, streifehoernli, scheudchrote, fesch, eichhoerndli, papageie ond hommer. wow, i be chum zom luege us cho. gaege obe semmer ergendwo enes beizli ghocket ond haend es bier bsteut. froehlech tratschend ond diskutierend semmer detghoecklet, bes mer gmerkt haend, ass dwaeut om oeis ome steustoht. om oeis ome send aui ufgstande, aui wo dor de maert glofe send send wi agworzlet stohblobe, nor de mark ond ich haend nuet gmerkt. mer send natuerli sofort ufgschosse ond haend wi aui andere gwartet, bes nationauhoemne doregsi esch. dluet om oeis ome haend muesse schmonzle, weu mers fascht verpasst hette...

of de poscht hani mis post restante abghout ond ha 1 baht muesse zahle. esch da ned loschtig? da esch so veu wi nuet. i meine, 30 baht send 1 franke. osserdem hani natuerli aui mini icheuf muesse verscheffe... ofem heiwaeg hani es gogi gkauft. a veune orte haends nor flaeschli, ond die waends eim ned metgeh. drom gaend si eim seck met is met, wo si sgogi drilaere. gogi osem sack. da esch loschtig! ganz es noeis trenkerlaebnis!! ombedengt usprobiere!!

i ha gfonde, ass i no zom schwemmende maert mue, de wo bem james bond au debi gsi esch. mer haend ase en tour gmacht, weus zemmli wit ewaeg gsi esch. womer usgstege send haends oeis gseit, wemmer weue choene mer metem kanuboetli en tour mache, es choschti 150 baht pro person. wow, was foeren abress, aber wemmer scho mou det esch... es esch en riesige tourestische alass gsi, aber glich ofene art loschtig. mer hocket ause e dem kanu ond werd vonere frau paddlet. e anderne kanus haends denn au die war, jede de glich schrott ond neut wod waeut woerkli brucht. es het aber tatsaechlech kanus vou tureschte gha, wo aui de glich daemlech huet gkauft haend. am aend vo dere fahrt het oeisi paddlerin au no sgfuehl gha, si chiem jez trenkgaeud vo oeis oeber. aber nach dere tuere fahrt haemer woerkli kei ohre foer soenigs gha. nach de fahrt haemer nochli zit gha ond send dor de maert gloffe. echli erschoepft semmer de noeime am rand abghocket ond send gli enes gsproech met iheimische verwecklet gsi. euteri manne wo en risigi freud a oeis gha haend. eine het pomelo gschaeut ond mer emmer weder en schnetz zuegha. woner kei meh gha het escher zo de pomelovercheuferi ond het mer pomelo brocht ;o) so haerzig. womer de witer send semmer vo eim agfrogt worde, oeb mer ofs boot weue, ond mer haend zom gloeck choene sage, ass mer scho gsi send. de mark hets aber ned choene lo si ond het glich no gfrogt, wases de choschtet. ond was ich zo ohre oebercho ha het gar ned guet to!! 50 baht pro person!!!!!!! laeck, send mer abzocket worde!!!!! i be schoen verrockt gsi, zom gloeck hani kei trenkgaeud geh!!! het mi ase woerkli gwormet, be ned so schnaeu droeber henwaeg cho...

gaege fuerobe semmer e lumpini park. det schine aui thailaender no zspoertlere nachem schaffe. veu goend goge tschogge oder es het aerobiclehrer wo vortanze ond riiiesigi masse vo luet, wo metdanze. di einte haend de lehrer gar ned gseh, de esch so wit ewaeg gsi!! sehr idroecklech. einigi haend sogar ned emou dezit gha, sech nachem schaffe omzzieh, so haends haut e ehrem azog metem aktekoffer denaebet mettanzet.

nacheme spaziergang dord kao san road semmer zvierte vorem 7elven of biercheschtene ghocket ond haend (saeubverstaendli meteme bier er hand) em tribe of de laebige stross zuegluegt. mer haend en naetti bekanntschaft voneme duetsche (ursproenglech toerge) paerli gmacht, wo foer 3 woche en thailand er ferie esch. si haend oeis rechtig nach informatione usgsuget, fasch haerzig gsi ;o) nach es paar bierli meh semmer ofene baretur, bevor mer de gaege morge aendli es bett cho send. i saege glaub jede obe 'aber hoet blibi ned eso lang' ond jedesmou machts schwups ond es esch weder wiiit nach metternacht...

am letschte tag en bangkok haemer no shoteu gwaechslet, mer haend kei steckdose em zemmer gha ond die cheibe haend doch tatsaechlech gaeud weue, zom akkus lade. da esch mer gaege strech, gets doch ned, so was vo fraech!!! ond mer haend doch einigi naecht det verbrocht, aber si haend taubi ohre gha. oeises noeie hoteu het en pool ofem dach gha, was mer natuerli haend muesse usnoetze. so semmer nach au oeisne komissione e left rechtig pool. de thailaender em lift het oeis gfrogt, wo mer aene weue, ond er het gseit, ass de pool jez zuegoech, er goech jez ufe goge bschluesse!! met lange gsechter semmer glich ufe ond haend no vier laengene aenebrocht, bes aui verschwonde send ond aues ufgrumet gsi esch. de thai het oeis emmer schoen aglaechlet ;o)

met schrecke haemer feschtgsteut, ass mer bereits ei monet en thailand send ond oeises visum ablauft. wi schnaeu doch dzit vergoht...

en liebe gruess vo onderwaegs
oli

phi phi ond khao lak

metem boot beni en kho phi phi acho ond per toeffli met sitewage semmer e oeisi onderkonft brocht worde. es paar strohhoettli diraekt am strand, wonderbar glaege am aendi vom strand ond 10 minute ewaeg vom grosse getuemmel, ideal. obwou, chauti duschi ond en chline venti, defoer es supergrosses moskitonetz womer sganze hoettli dronder hette choene versorge ;o)

aendli aendli esch au dsonne weder foerecho ond mer haend am strand choene relaxe, esch oepe zit worde. steuet oeich vor, mer send am chnoechutuefe wasser glaege ond haend de ganz nomittag em seichwarme wasser verbrocht. ebbe esch herrlech do. au s'stettli saeuber esch haerzig, chli aber haerzig. aber sautuer. mer haend oeis gweigeret, es internet zgoh weus eso veu gkoschtet het. ond i meine, phuket esch jo scho tuer gsi. aber mer haend wonderbari pizza oebercho, em dorchmaesser breiter wi mini schoutere ond s'bier haemer haut em 7eleven gkauft ond haends vor oeisem hoettli am strand tronke. oder mer send vore lade ghocket ond haend ober luet glaeschteret, da esch fasch wi faehrnsehluege gsi. ufgfaue esch vorauem, dass oepe 90% sonnebrand gha haend. ond oeppe jede 6. het omfau gha. kei ahnig a was das glaege esch, aber woerkli, verdaechtig.

mer haend oeis emou erkondiget, wi tuer ass s'tauche esch ond wo oeis de erschti tauchlade gseit het, si goeche am 7.30 haemer gfonde, das sigi veeeeeu zfrueh. ossertdem haemer emou gfrogt, was mer eso gseht, ond zor antwort haemer obercho, hmm, mer gsaehnd blue spotted rays, maengisch blacktip sharks, barracudas ond vellech, vellech e scheudkrot. de mark ond ich haend oeis nor agluegt. es esch schwerig wemmer en borneo taucht esch, sech no foer oepis anders begeischtere zchoene. fasch echli snobisch. guet, mer send trotzdem ene anere tauchlade ond haend usegfonde, ass aui am 7.30 losgoend. onder de bedengig ass mer s'wrack choene tauche haemer oeis igschrebe. s'wrack esch auerdengs set 10 taeg noeme betaucht worde, weu d'secht eso schlaecht esch onds sehr waeuig esch, mer haend d'uswoerkige vom cyclone en myanmar duetlech gspuehrt. si haend oeis gseit, ass am morge entschede werd, oeb mer choene goh oder ned, ase haemer so oder so muesse ufstoh...

guet, so semmer mette er nacht ufgstande ond send ofs tauchboot. loschtigerwis haemer es riesigs tauchboot ganz foer oeis eleige gha, weu dschueler choene s'wrack ned betauche ond anderi taucher hets ned gha oder si haend ned weue zom wrack. of au faeu semmer nach stondelanger fahrt aendli acho ond send abtauchet. ond ned enttuescht worde. s'wrack esch en auti autofaehre wo aus versecherigsbetrug verseuft worde esch. wc's send no donde, dfuehrerkabine, sehr, sehr entressant. es het gwemmlet vo riiiiesige lionfish ond see-egle. em zwoeite teil vo oeisem tauchgang send millione vo fesch omegsi, so veu, ass mer s'wrack saeuber gar noeme gseh haend. aber de hoeheponkt esch definitiv gsi, ass mer barracudas ond tunas gseh haend jage, enmette vo dem riiiiisige feschschwarm. sooo idroecklech, chas do gar ned beschribe, i cha nor soveu saege: es esch HAMMER gsi!!

weniger cool esch gsi, assi naer, chum zrogg ofem boot, seechrank worde be. i ha eis, zwoei bess vo mim zmettag gha ond ha de dankend verzechtet. es esch emmer noni besser gsi, woni mini usroeschtig foer de zwoeit tauchgang agleit ha, ond dommerwis esch mer genau denn, woni aues agha ha, bruuutau schlaecht worde. es het so fescht gwaeuet asi gwoesst ha, weni jez mue erbraeche ghei i oeber bord... ase, do gets nor eis: dloft ahaute ond so schnaeu wi moeglech es wasser. eigentli setts de grad guet waerde, aber ned demmou. onder wasser hani aernschthaft gmeint, i muess e mi regulator chotze (ond s'woesse, ass da goht het ongemein ghoufe!!!), mer esch soooo elaend gsi. de divemaster het mer zuegs zeiget ond ich ha nor daenkt guet, choene mer jez ufhoere?! trotzdem, eis highlight hani doch gha, ond da esch en wonderschoene leopardehai gsi. aer het ofem grond gschlofe ond mer haend jede menge zit gha, ehn vo noechem zbetrachte. es wonderbar schoens tier... eso em verbitauche hani au no gseh, asses wonderschoeni koralle gha het, aber i ha mi leider ned gross choene defoer begeischtere.

zrogg ofem boot esches emmer noni besser gsi ond mer haend beschlosse, ass mer de dretti tauchgang ned atraette. i be soooo trurig haemer de ned choene mache, vorauem weu de prisondersched nor ganz minim gsi esch, aber au weu mer 2 woerkli sehr schoeni tauchgaeng gha haend. ond trotz auem, i wer ned em stand gsi, nomou abztauche...

ossertdem semmer au tag am spitau verbiglofe ond haend entschede, ass mer emou nach mim worm froge. d'aerztin het mer de tatsaechlech oepis verschrebe ond grad metgeh. tablette foeren haubi armee... befori oepis schloecke wotti zerscht woesse wasses esch, so warti besi weder es internet chome...

nach es paar witere taeg am strand ond ere beo-attacke (vogu) gaege mark haemer entschlosse, oeisi rocksaeck weder zpacke ond witers zhie. haender gwoesst, ass die chraebsli am strand moescheli nohroenne, wemmer si ehne ed noechi ruehrt? si treie si de of au site ond tschegge aues us, bevor s'noechschte moescheli chont. da esch jo vellech loschtig gsi, da muender ombedengt emou usprobiere!

metem scheff zrogg nach phuket ond met em bus en rechtig khao lak. i be scho lang noeme ofem wc gsi ond i ha ploetzli uuuuh drengend muesse goh. nachdem ass de mark scho aues vorgschlage het (wi gogiboechsli ufschnide, ene petflaesche bisle oder e sini wasserdechti taesche) ond ich woerkli a nuet anders meh ha choene daenke wi wc's (da esch woerkli schlemm, i ha saemtlechi wc's vo minere reis vor auge gseh...) het de mark foer mech de bus gstoppet ass ich ha choene goge bisle ;o) stop the bus i need to weee weeeee, stop the bus i need to wee weeee, stop the bus i need to weee weee, because my mates at the front can't swimm ;o)))) tja...

khao lak saeuber esch en grossi enttueschig gsi. sganze stettli bestoht osere starch befahrne stross, de strand esch omgeh vo tuere resorts ond de strand saeuber ned woerkli sehenswaert, aber s'schlemmschte esch gsi, ass zobe am 10i aues, ond i meine aues, zue gsi esch. kes internetkaffi, kei bar, gar nuet. ossertdem schints es ferieziu foer duetschi tureschte zsi, wases au ned besser gmacht het. zom gloeck haemer es toeffli gha ond haend echli choene omeduese ond resorts ustschegge. die einzigi 'attraktion' schint en miniaturform vo de james bond ensle zsi. zom gloeck esch oeises hotel vo oeberau noech gsi, min dorchfau het mi arg ploget... i saege nor: imodium het genau nuet gnoetzt. znacht beni secher 4x ufgstande ond be froh gsi, hanis no raechtzitig gschafft. kei ahnig, was mech do foeren chaeber befaue het. ossertdem hani en grusige hueschte verwoetscht ond kaempfe grad echli met minere gsondheit, aber ohchrut vergoht bekanntlech ned!

mettlerwile hani usegfonde, assi di rechtige tablette oebercho ha, au wenn dnaebewoerkige of laebere ned grad motivierend send... aber rotet emou? - de worm esch verschwonde befori oepis gno ha... verdaechtig, verdaechtig, aber ohni worm nehmi ganz secher ke tablette! mou luege was passiert... ond wo de erwin aus noechschts uftaucht...

hey, womer of de bus nach bangkok gwartet haend het de mark es wisses hoor of mim chopf gfonde!!!! i glaubem zwar emmer noni, asses woerkli mis gsi esch, ond wenn, vellech esches jo eifach blond blond gsi...?!

mer waere fasch metem schloessu vo oeisem motorbike e bus gstege, zom gloeck esch mer da no em letschte momaent e senn cho... phuuuu!!

so, be oei gohts jez aendli los, morn stigt di grossi fuessbau party!!! i woensche oei aune veu spass, wo au emmer er oeich betrenket ond au ich droecke de schwitzer es berebetzeli de dume!

have a nice week end
oli

laaadybooooys!!!!

metem bus en phuket town acho haemer ergendwie a strand muesse, was ca. 20 minute per bus esch, auerdengs vom andere aendi vor stadt. so semmer met oeisem ganze gepaeck ofenes mopet ghocket ond haend oeis dethe fahre loh. sehr spezieu gsi, vorauem weui zo auem elaend aene au no es roeckli agha ha... aber definitiv e loschtigi erfahrig. am strand acho het de raege au ned auzulang of sech warte loh. das schine duswerkige vom cyclone en myanmar zsi... aber phuket het definitiv au schlaechtwaetterprogramm. so hets es grosses shoppingcenter met kino, ond e hufe bars womer notdronge schnaeu onderschlopf fendet. wemmer dors staettli lauft ghoert mer oeberau 'masssssaaaaasch' oder 'taxiiii', vo aune site waends eim oepis verchaufe. da cha ganz schoen laeschtig si... di leschtigschte send aber definitiv die, wo eim waend ping pong shows adraeie, die sieche stoend eim staendig em waeg ond haend der ergendsone zeddu onder dnase, nei saege geut genau nuet. uffauend veu fesch werd do abote, ond obwou de fesch ned woerkli goenschtig gsi esch hani ei, zwoeimou gha, esch uuuuh fein gsi. hamer esch natuerli de 3kg lobster gsi, da esch vellech es riiiiesefiech gsi!! aber phuket esch tuer, de puri abress. klar, foer oeis schwizer esches emmer no beuig, wemer foeren tip top suberi onderkonft met chueuschrank, faehrnseh ond klimaalag grad emou oepis oeber 20 franke zaut, aber vergleche metem raeschte vo thailand esches de puri abress. saesse e de reschtis esch ned veu beuiger wi be oeis deheime, bsonders wemer emou zor abwaechslig es raechts stoeck fleisch wot. i werde foer da bes zo minere roeckkehr warte muesse... :o( leider haemer de carrefour erscht am zwoeitletschte tag entdeckt...

weus emmer graegnet het semer es kino. bevor de feum startet loehnds dnationauhymne speue ond aui stoehnd uf, haend ehri arm parallel zom koerper ond lose. mer natuerli au! hani scho vo dene alien vs predictor statue verzeut?! die send jo vellech loschtig. di beschte send groesser wen ich, ond grad enere bar gsaehnd die sehr dekorativ us. gmacht sends os auderlei schrott, woerkli sehr spezieu. aber i cha mer ned woerkli vorsteue, wer so oepis foer deheime chauft...

aneme tag wos einigermasse usgseh het aus chiemts ned grad sofort choge raegne haemer es moped gmietet ond send oebers land dueset. mer haend au di andere straend agluegt ond haend onder anderem aneme ussechtsponkt aghautet, wo eine meeresadler debi gha het ond foer fotine gaeud verlangt het. mer zahle so sache grondsaetzlech ned, weu mer da woerkli ned onderstoetze. aber de ma het mer de groescht meeradler of de arm gsetzt zom luege, wi sech da so afuehlt. wow, da esch jo vellech andersch gsi! i hanen sogar gstreichlet!! di cheibe send riiiiesig!!

benere bar voneme elephantetrekkingplatz haemer foernes bier aghaute ond haend grad sofort en gibbon gseh. soooo suuuueeeesssss!!! ond ploetzli esch naebem schwarze au no en blonde uftaucht. mer haend ganz noech aenechoene. da esch woerkli super gsi, die cheibe send sooo flauschig ond haerzig, mer wett si fasch methei neh. di er bar luege zonene, drom haemer so noech aenechoene. aber si waend ned, ass mer si fuetteret, wasi guet fende. hengaege delifante doef mer fuettere, ond mer haend banane gkauft ond haend die cheibe verwoehnt. ui, die haend schoen froeid gha. de chlinscht het sogar met mer gspeut, wenn ich min arm gschwonge ha het er sine roessu gschwonge, ond denn escher zo mer cho ond het sin roessu verknuddle loh. haerzig.

aneme andere tag, raege wi emmer, haemer metem bus nach phuket town weue ond send e glich bus igstege, wi mer cho send. komischerwis haemer anstatt 50 baht nor 40 zaut, was oepe 1.35 CHF send. aer het oeis gfrogt oeb mer nach phuket town weue ond mer haend jo gseit ond send igstege. ome egge het de bus aghaute ond aer het gseit, das sig aendstation, mer muese jez en andere bus neh foer nach phuket town. guet, de haemer emou gfrogt, oeb de anderi bus bereits zaut sigi ond de fraech cheib het natuerli gseit nei. aber do escher bem mark a de fausche adraesse gsi. de mark het afoh chaere metem ond ich be de mou diskret ofd site gstande weui weiss, ass aer sech geniert naebe mer zverhandle. jo, mer rede vo 1.35, aber da esch no lang kei grond tureschte eifach abzzocke. weni e migros gohne zaui au ned eifach meh, sondern i zahle wasses choschtet. fraeche siech de!! de busfahrer vom andere bus het mi de gfrogt was sproblem sigi ond aer het met sinere stemm zerchlaere geh, ass mer woerkli veu zveu zahlt haend. schlossaendli het de mark so lang gstoermt, ass mer sganze gaeud zrogg oebercho haend.

zobe semer jewils ad partymeile, wo sech bar a bar reiht ond au die ladyboys omd gonscht vo de weschtleche manne buhle. i ha ned gwoesst oebi jez lache oder bruehle seu, of au faeu esches sehr komisch gsi. i be der meinig, asses keni fraue en thailand get, das muend aues ombaueti manne si... aber definitiv, jedi frau benidet si om ehri hoefte, kei diskussion. mer haend natuerli au dtanzshows glueget, esch woerkli wetzig gsi. aber erschreckend wi veu weschtlechi manne metere thai frau omelaufe. gkauft, ganz offesechtlech. am morge send jewils thai fraue oss de hotelzemmer gstroemt, fasch echli grusig. nei, das zitauter esch definitiv noni verbi, ond ich woer kei ma elei of thailand loh!! hesch ghoert paeddu, kei thailandferie foer dech!! de mark het emmer weder gfrogt, 'aber das esch en frau?!', ond ich hanen jewils agluegt ond gseit, ass das aues manne send. ehr het de nor gmeint, asser gli ufhoeri froge...

en anderi nachtbeschaeftigong esch gsi, ass mer oeise faehrnseh em zemmer e voue zoeg usgnoetzt haend. zerscht semmer aber e 7eleven ond haend oeis met bier ond groooosse packige m&m's ideckt, de semmer ab es zemmer ond haend e faehrnsehsession doregeh, bes e aui nacht. hui, e faehrnseh chont ganz en anderi beduetig oeber, wemmer so lang ewaeg esch ond wit ond breit kei faehrnseh het. det haemer au serscht mou dbeuder vo myanmar gseh ond send echli verschrocke, weu myanmar eigentli of oeisem provisorische program gstande esch...

a oeisem letschte tag en phuket semmer aendli zor james bond ensle. oeisi haubtagestour het metem affetaempu agfange. oeis esch gseit worde, ass mer daffe ned seue fuettere, weu si chrankete oebertrage wi touwuet. komischerwis hets aber honderti vo staend gha, wo banane foerd affe verchauft haend. ond es het gwemmlet vo affe!! de taempu saeuber esch enere hoehli gsi, ond en riiiisige leggende buddha esch drenne gsi. da esch woerkli spezieu gsi. aber was oeisi ufmerksamkeit am meischte en asproch gnoh het esch en frau gsi, wo, i weiss ned was si gha het, uuuuh haesslech gsi esch. da esch jez vellech gemein, aber kene vo oeis het je so oepis haesslechs gseh. si het oeber ehres ganze gsecht ergendoepis wi ganz grossi abehaengendi warze gha. iiiihhh, di arm frau!!! meh es monschter as e frau, ond ich oebertribe ned, ehres ganze gsecht esch demet oebersaeit gsi... uuuarrghh... dosse hets es paar hoend gha wo fasch nackt gsi send, weu di arme cheibe ergend en hutchranket haend. wondgkratzet ond nackt, das loht shaerz bluete...

witer esches meteme longtailboat gange ond mer haend beneme schwemmende doerfli zmettag gaesse. de puri abress natuerli, ond de agschlossni maert esch eifach nor schlemm gsi. aui verchaufe sglichlige, was do en witverbreiteti chranket zsi schint, aues nor schrott, ond s'schlemmschte met abstand esch gsi, ass mer fraue met 4 babygibbons gseh haend wo gaeud foer fotine haend weue. es esch eifach schlemm, ass die arme cheibli vo ehrem mami waeg gno waerde ond foer sonig zwaeck messbrucht waerde. bevor mer ergendoeppis haend choenne saege, haemmer sones cheibli e de arme gah, ond die suesse beibis waerfe sech eim grad om de haus. scho suess, aber ned zonderstoetze. mer haend ase keni fotis gmacht.

grad womer zrog es boot haend weue haemer gseh, wi en boese, boese raegestorm of oeis zuechont. mer het die wand rechtig gseh cho, ond mer esch angscht ond bang worde... aber ke pardon, ab es boot. zom gloeck haemer emmerhin en raegeplastik oebercho, wos groebschte abghaute het. wow, das het vellech graegnet, mer haend genau nuet meh gseh. i be fruschtriert gsi, scho weder sone fotogeni landschaft ond mer haend ned eis foti choene mache.... mini lune het sech chli verbesseret, wo de raege genau ufghoert het, wo mer be de james bond ensle acho send. so haemer doch no eis, zwoei foeteli choene mache. de usflog esches definitiv waert gsi, obwou asses nor en feuse em wasser esch, esch dlandschaft doch wonderschoen ond absolut sehenswaert!!

was mi no veu meh fruschtriert het esch gsi, ass i entdeckt ha, ass de worm e mim zeche emmer no laebt ond sech fortbewegt!!! iiiiiihhhhh!!!!!!!!!!! guet, mer send ase ed apithek ond haend gfrogt. er erschte apitek haends kei ahnig gha was da choent si. guet. er noechschte apitek haends mer gseit, die tablete woni dozmou oebercho han en koh lanta si foer woerm em buch gsi... guet, was jetz? si haemer en gel gaege hutusschleg weue verchaufe. mhhh, not so much. er noechschte apitek het de apiteker lang oeberleit ond mer denn en greme gaege lues weue verchaufe. aehae. ganz fruschtriert hani ufgeh ond mim tropearzt es mail gschrebe, auerdengs kei antwort oebercho. schint ass muesti mi demet abfende, asi en blende passagier e mim zeche ha...

hey, gli esch de boesi maenti verbi, esch doch gar ned eso schlemm gsi, oder?!

en decke schmotz ond bes gli
oli