Puuuuh, Ferie....

diraekt be mim hostel e de cameron highlands beni enes minibussli igstege wo oeis (zwoei aenglaender, zwoei vo wales ond en schwed) a hafe brocht haend. die fahrt esch sauglatt gsi, es esch naemli ned lang gange haemer "i gseh oepis wo du ned gsesch" gspeut. es esch aber no besser cho, snoechschte speli esch gsi, "i somme (brommle, gronze, nuschle) es lied ond du muesch usefende welles"... ui, i ha mer fasch ed hose bislet... nachem mettagaesse haemer muesse omstige ond ich be metem justin, en aenglaender zhenderscht ghocket ond mer haend gfachsemplet, oeb mer aech die fahr oeberlaebe, de taxichauffeur esch naemli gfahre winen maniac!!! mein gott, mer haend bluet gschwetzt!! trotzdem semmer fasch echli oebermuetig worde (vermuetli pure gaugehumor) ond haend gspoettlet, wi aech oeisi bootsfahrt use ofd perhentians werd, bestemmt scheffets os aune loecher (de hemmu esch scho ganz schwarz gsi) ond vo aune site sproetzt wasser ine. aehae. mer send ase noni ofem boot gsi ond usnahmslos aui send scho schoen dorchnaesst gsi. mini ticket send anandgklaebet. da esch de afang gsi. e oeisere mehbessere nossschale semer ufbroche of hohi see, de waellegang esch mendischtens so hoech gsi wi em feum "the storm" ond mer send foermlech oeber dwaeue inegompet. guet beni zforderscht ghocket... meh hets ase vom baenkli gloepft ond i be meteme risige knall weder glandet, es esch de hit gsi. no besser esch aber gsi, ass dwaeue es boot inecho send ond mer usnahmslos, inklusiv gepaeck, pflotschnass ond duschet gsi send. herrlech.

mer send aber metere wonderschoene ensle belohnt worde. ossert es paar hostels, reschtorands ond eis zwoei notdoerftige laedeli gets eigentli nuet of dere ensle. mou, wonderschoeni straend, krischtauklars wasser ond bier. ned emou e bankomat ond telifon send rar ond tuer, drom haemer oeis scho voraene muesse met gaeud foer di ganz zit idecke. grad am erschte obe semmer aui zaeme ghocket ond haends oeis of de hostelterrasse (wo einsam ond verlasse gsi esch) bekwem gmacht ond haend trenkspeli gmacht. heiter fahne, i hetti eigentli seue woesse ass mer ned met aenglaender trenkt... aber so loschtig, ass ich euch die ombedengt mue lehre ;o) ha mer ase fascht ed hose bislet...

de noechscht morge esch auerdengs ned eso loschtig gsi, ned weui en hangover gha hetti, sondern weu mini froendin vo wales ond ich vo de andere gweckt worde send, ass en liche am strand sigi. zerscht haemer no gmeint, das sig en guete versuech oeis osem bett zbecho, send de aber vom gaegeteil oeberzuegt worde. en anderi froendin vo wales esch fasch droeber gstoerchlet wo si a strand het weue.. i be grad a strand cho, wosen osem wasser zoge haend. nackt, wis ond deck... dpolizei esch de faengs gaege mettag itrudlet... zerscht haemer vermuetet, asses en turescht esch (weuer wiss gsi esch) wo znacht esch go nackt bade, ond dstroemig esch zom teil sehr stark ond dsee emmer no sehr rauh. nach es paar taeg haemer de erfahre, asses en fescher os thailand gsi esch, wo set 3-4 tage em wasser gsi esch. drom escher au so wiss gsi, schinbar verluert mer em wasser dfarb. ond deck weuer vom wasser so ufdonse gsi esch...

en andere obe haemer party er palm tree 2 bar gha, 2 weu si schinbar scho mou abbroent esch. das het oeis au gar ned gwonderet wo mer gseh haend, ass si es riiiiesigs fuer mache am strand ond de wend blost aui fonke diraekt as strohhuesli... mer haend tanzet wi di weude ond en risigi party gha, bes ed morgestonde. mini zemmerkameradin esch auerdengs scho chli fruecher hei ond woni zrog cho be hani met schrecke feschtgsteut, ass si mi usgschlosse het. hmmm, guet, so hani mers grad er haengematte vorem hoettli bekwem gmacht wo si min name rueft ond gottefroh esch, ass ichs be ond niemert andersch oder geschweige denn eini vo denne ratte, wo augaegewaertig send. puuh, da esch grad nomou guet gange.

jo mini ferie send wonderbar gsi, mer send de ganz tag fuul am strand glaege, vo zit zo zit haemer en shake oder en lassi tronke, send go baedele oder oepis feins go aesse, aues da saeubverstaendli nachdem ass mer so oepe bes am mettag gschlofe haend, weu mer jewils bes e aui nacht gfiret haend...

ofem zrogwaeg esch dsee zom gloeck ruig gsi wine meuchchessu ond mer send troche blobe. zrog ofem feschtland semmer de zerscht emou eis go neh. wo mer ufgstande send het oeis en andere gascht gfrogt, wohe ass mer weue, ond wo mer gseit haend mer muese a floghafe heter gseit er fahri oeis metem minivan foer 20 RM. super, da moeche mer doch. es send de no es paar anderi luet uftaucht ond aui saeme semmer metem minivan losdueset. ergendwo aneme strosserand beneme stand hetter de aghaute ond mer haend auderlei sache muesse probiere. zerscht hets ergendweuchi feschkraecker geh (woni nachem erschte bess diskret losworde be), naer hetti ergend oepis ganz komischs muesse aesse woni ned emou wott beschribe ond de hammer esch gsi wo si ergend sones gfaes ufgmacht haend ond oepis aessbars en farb ond form voneme darm usegnoh haend... mmmh, yummm... vorem stand esch ossertdem es tots chlises buesi glaege ond am bode ofeme plastik ergendweuchi feschtschips, oebersaet vo floeige. hendeosse haemer de di chli feschtschips ferma gseh, ond onder freiem hemmu of tesche send die chips glaege zom troechne. drofobe voegu, wo di chips schinbar seeehr fein gfonde haend.

guet, oeise fahrer het oeis de gfrogt, wenn oeise flueger goechi. drufabe het er oeis de informiert, ass mer ofere stadtrondreis send... aber das laengi no laaaang foer oeise flueger. mer haend enand nor aglueget ond nor no glachet. es esch jo onglaublech... drufabe semmer oeber land zonere tabakplantasch gfahre ond haend de fraue zuegluegt, wi si tabakbletter zaemebende. mer haend sogar melone oebercho. ase i fende, da esch es rechtigs schnaeppli gsi foer 20RM. ossertdem seeeehr spannend, weu mer nie gwoesst haend, wo mer aus noechschts haute ;o)

jez beni zrogg en kuala lumpur. geschter semmer am grand prix gsi, da esch jo vellech de hammer gsi!!! hettis jo nie daenkt, gebes ehrli zue. ha emmer weder de chopf gschoettlet weuis saeuber ned ha choene glaube asi woerkli det be. mer haend sogar sehr gueti tickets gha. es esch onvorsteubar wi lut as die cheibe motore send, zom gloeck hani ohrestoepsu e minere handtaesche gfonde (tja, schliessli weiss mer jo nie). i ha sogar gseh, wi die drue ofem podescht ehre schaempis versproetzt haend, fasch wi em faehrnseh. sehr idroecklech gsi...

das waers weder gsi vo treggs o gaexs, tschuess zaeme!

2. Teil Borneo

i be metem duetsche paerli witerzoge, waeg os sarawak oeber dgraenze nach brunei. foer de graenzoebertrett haemer oeis es taxi gmietet, soesch hette mer mehrmous muesse de bus waechsle. ganz guet esch natuerli gsi, ass de taxifahrer da ned zom erschte mou gmacht het ond sech entspraechend met aukohou ideckt het, om dgraenzwaechter demet zbegloecke, ass si eus em gaegezog ned kontrolliere. da esch ase ganz guet gsi. en brunei semmer em stadtcenter usegloh worde ond haend oeises drueerzemmer bezoge. de andreas het das ganze a de reception greglet ond ich glaube de hender de reception het sech gfrogt, was da foeren geile siech esch wo sech met zwoei fraue szemmer teilt ;o)
entspraechend heter de natuerli au no nochegfrogt, oeb aer woerkli met zwoei fraue reisi.

nacheme stadtrondgang haemer es boetli (nossschale met motor) of dheufti abegmaertet ond haend en rondfahrt dors floating village gmacht. meeeega schooooeeen. mer send eifach dor die huesli gheizt ond haend gseh, wie di luet det osse so laebe. sehr spannend.

Am obe semmer zom palascht vom sultan gloffe. sehr, sehr idroecklech das ganze. mer haend natuerli ghofft, en iladig zom tee oeberzcho, haend oeis aber ned getraut zluete ;o) so haemer oeis haut weder ofe waeg zrog ed stadt gmacht. es esch ned lang gange ond es stoeckli vor oeis het e schwarzi limousine aghautet. d'Andrea het no gmeint, jez waerde mer abghout. wo mer of de hoechi vor limousine gsi send esch sfeischter abegloh worde ond zwoei muslimischi fraue haend oeis gfrogt, womer he weue, mer seue doch istige, si fahre oeis. si sige a oeis verbigfahre ond haend aegstra weder gkehrt, zom oeis metzneh. poah, mer send schlechtwaeg sprochlos gsi... vo dem momaent haemer de au no entspraechend lang glaebt. auerdengs haemer oeis ned getraut zsaege, wo ass mer schlofe, so haemer oeis eifach em center uslade loh.

am tag druf esch national day gsi. scho am morge frueh esches losgange ond aui haends sech gsammlet. do brunei jo ned eso gross esch hani de idrock, ass aui iheimische a dere parade metgmacht haend ond aui zueschauer zom palascht (de sultan esch saeubverstaendli awaesend gsi) ghoert haend oder touris gsi send. obwou, soveu wissi hets ned gha... d'Andrea ond ich haend sogar e wenkflagge oebercho ond send ganz stouz gsi druf. aber sbeschte esch definitiv dpraess gsi. einersits semmer interviut worde (ombedengt nohlaese: http://nationalday.org.bn/index.php?option=com_frontpage&Itemid=1&limit=11&limitstart=33 Du musst auf der Seite ziemlich weit nach unten scrollen, bis du zu "A unique experience for tourists" kommst) ond anderersits semmer fotografiert worde wie weud. i ha mi omdreit ond enere kamera diraekt ed lense gluegt (noechufnahm), i ha mi ofe anderi site dreit ond gsehne oepe 5 kameras of mech grechtet, nachem foti 5 tuepe vo de praess wo mi alache. eine esch met sim handy cho ond het gfrogt, oeb aer es foeteli doef mache vo ois, eis elei ond naer escher nomou cho ond mer haend no eis met ehm gmacht. e dere zit haend sech saeubverstaendli no anderi hender ehm versammlet ond die glaegeheit usgnoetzt ond au en shot gmacht. hey, i ha mi gfuehlt wi en superstar... mega loschtig gsi, be ase naer ganz erschoepft gsi...

wo de sultan gange esch semmer e sini loge ond haend wie di hohle fotis vo sim goudige stueu gmacht, ond mer haend oeis saeubverstaendli au ofem rote teppech foetele loh, schliessli semmer jo turis. komisch esch scho gsi, ass si oeis oeberhaupt detufe loh haend, i glaube en europa waer da nie ond nimmer moeglech.

jo, brunei esch definitiv es erlaebnis gsi. es paar saege, es signe zu protzig, esch aber gar ned de fau. es esch definitiv kei ort zom laenger blibe, veu zu munzig. es esch wou veu sueberer aus malaysia, het aber genau so sini aermere gaegende ond teil ort send oeberfoeut met abfau. en brunei esch osserdem kei aukohou erlaubt. dturis doefe weuche zom eigebedarf met ine neh, muend en aber deklariere, soesch gets enormi stroffene, gar ned loschtig.

foer mech totau noei send d'moschee gsi. ond de laerme wo si mache... aber aues sehr idroecklech... dluet send so naett ond heufsbereit gsi, i woer ase jederzit weder goh.

Metem boot semmer vo brunei witer nach sabah, gnau gseit kk (kota kinabalu). Oeis aune het die stadt gar ned gfaue, si het kei charakter ond i be verschrocke ab de velle wisse (na ja, vellech 1 of 50). es esch vorauem en dorchgangsort foer die wo of de baerg mount kinabalu ufewaend, en 4000er wo relativ liecht en 2 taeg erreichbar esch. am beschte esch definitiv gsi, wo mer nachem znacht ene gartebeiz ghocket send ond oeis je es gogi bsteut haend. das auerdengs nor os dem grond weu de andreas dutyfree wi gkauft het ofem waeg os brunei ond mer oeis de haend weue zu gute fuehre. so haemer chorzerhand oeisi gogi ustronke ond rotwi igfoeut. da esch super gsi, weud farb vom wi fasch di glich farb wis gogi gha het. weller de doch echli warm gsi esch haemer eifach chorzerhand nochli is dezuebsteut :o) es esch jo soooo loschtig gsi, mer haend traene glachet. aber i glaube saeubscht wenn sis gmerkt haette, so haette se sech ned getraut oepis zsaege. herrlech esches gsi.

am tag druf beni elei of sapi, e chlini ensle wo zom nationaupark vo kk ghoert. wederom verschrocke ab de velle turis (demmou aber japaner, glaubi) hani mi zerscht ofe ganz einsame walk oeber densle gmacht, mette dore waud. ergendwo esches de onpassierbar worde ond ich ha en chlini rascht gmacht. os intuition hani mi omdreit ond luege amene riiiiiiisige monitor lizzard ed auge. poah, be scho grad echli verschrocke... i hanen de spoeter am strand weder troffe, woner es baedli gnoh het...

am strand hani mi vo de strapaze erhout ond ha es pfuesi gmacht. chum verwachet ond de chopf gloeft hani de idrock gha, i heig de kuschler gseh!! Ond grad drufabe hani gmeint, i heig d'andrea ond de andreas gseh ond be losgspidet om si zwarne. guet, i glaube i ha troeimt... of jede fau esch mini duetschi rettig oeberau aber ned of sapi gsi... so beni weder zrogg ond ha gseh, ass de kuschler schreg hender mer abghocket esch. i ha emmer weder echli glueget zom usefende, oebers woerkli esch, aber do aer e mini rechtig gluegt het hani ned zlang choene luege ond has haut ebe ned usegfonde. vellech hani de kuschler au nome troeimt...

Am obe hani mini duetsche weder er genauglichlige gartebeiz womer am obe voraer wi tronke haend troffe. die haend jo scheon muet. vorauem wo de andreas ufgstande esch ond gseit het, aer muessi oebis go hole... aehae, er esch de wi osem chueeuschrank goge hole... ischaut escher gsi, sooooo fein. Ond weumer ke passendi glaeser gha haend haemer dbox eifach em plastiksack gloh ond haend osem roehrli wi dronke. hach esch da loschtig gsi, wid penner haemer oeis dtuete hin ond haer greicht.

A dem obe hani mi verabschedet vo mine duetsche. min waeg esch am noechschte tag witer nach sandakan gange. de bustrip esch wonderschoen gsi, es esch set langem weder emou ed baerge gange, onder anderem semmer au bem mount kinabalu verbi. sehr schoeni gaegend. ergendwie hani sogar en luxusvariante voneme bus verwoetscht, bem stop het jede meteme busbillett zmettag oebercho. da hani doch no nie erlaebt. mer haend sogar choene waehle, wa mer haend weue. da esch auerdengs emmer es grosses erlaebnis, mer weiss nie so raecht was mer oeberchont. aber guet esches gsi.

Dommerwis haute die langdischtanzbus emmer am stadtrand. so hani haut mis gepaeck bogglet ond be en rechtig city glofe, resp. zor noechschte bushautesteu. no bevori det acho be het en chline minivan ghupet ond gfrogt, oebi weu metfahre. aues e auem hani eis vo dene private taxis verwoetscht, wo jewils fahrt wens vou esch, aber da esch super gsi, het mi grad emou 1 Ringgit gkoschtet, ergendwo om die 30 rappe. weu sandakan zemli guet buechet gsi esch (jedefaus serschte hostel woni he ha weue) ond ich ke naerve meh gha ha zom laenger sueche hani mer haut es einzuzemmer gleischtet. hach, en traum, es eignigs bad, i cha mis zueg oeberau omelegge loh ond niemer stoert sech drab, i cha daircon isteue win ich wott ond wenn ich wott, hei, hani da gnosse. sogar handtuecher hets gha...

Zo spoeterer Stond (oepe am achti...) hani mi de ofd suechi nach znacht gmacht. foendig worde beni be eim vo dene chline kafis, wo si vorosse fesch broetlet haend, so eine hani mer de saeubverstaendli au grad bsteut ond be ine go warte. det ene hani de gmerkt, asi di einzigi frau be ond mech aui astarre... guuuet.... do gets nor eis: mer laechlet einisch naett ed rondi, nemmt sis nateu foere ond tipt wi weud of de taschtatur ome ond woerkt seeeehr beschaeftiget! eine wo inecho esch het thumps up gmacht zo mer, de het da ganz guet gfonde ass ich zo de iheimische manne setze... dbedienig (di einzig frau naebe mer) het so froeid gha, ass si mer zuesaetzlech nones glas wasser brocht het, ofs hus saeubverstaendli :o) je laenger asi aber det enne ghocket be je meh hanis gfuehl gha, asi begleitschotz hei bruche... aber es esch aues guet gange, niemer esch mer gfougt ond ich be secher e mim hotelzemmer acho.

Am noechschte morge hani mer es Kafi usgsuecht zom zmorge. Mis zmorge bestoht jewils osere nudusoppe, sehr lecker. eini vo de servierduesene esch nachdem asi fertig gsi be zo mer cho ond het afo ploeiderle. woni ehre gseit ha, asi os de schwiz be het si mega froeid gha ond gseit, asi di erscht schwizeri e dem kaffi sigi. i mue vellech sage, asi mer jewils die kafis ussueche, wo au di iheimische aesse, ond ned dtureschteabresswesternplaces. si het ossertdem druf bestande, ass si mi zom hiesige tureschteoffice brengt. haerzig. det wederom het mer nachdem i mi foer en tour entschede ha en sehr naetti iheimischi gseit, i seui doch mini tour saeuber vom oeffentleche telifon bueche, si muesi mer soesch oepis verraechne. sehr naett.

Gesagt getan hani mi foeres 3-tages-junglecamp agmaeudet ond ha mi grad ofe waeg gmacht, weui er agschlossne onderkonft ha weue schlofe vom tourbuero. ar bushautesteu haend mi es paar jungs aghaue, oeb si mer choene haeufe. i ha gseit asi de bus suechi ond seh haend da chorzerhand foer mech abklaert. nacheme wili send die cheibe e bus inecho ond haend gaeud weue, si heige honger... ganz spontan send mer mini chroemli e senn cho ond i ha si ehne abote, haend si aber ned weue. chum hani si aber weder ipackt haend si si glich weue... defoer sends de verschwonde.

Mis jungle camp het meteme bsuech en sepilok agfange, e rehabilitationssteu foer orang utans. mer send raechtzitig zor fuetterig det gsi ond haend ganz e hufe affe gseh. ned nor orang utans. esch rechtig schoen gsi zuezluege, da send jo sooo loschtigi tier!

Deno esches witer en rechtig floss, womer omgstege send es boot. ofem waeg es camp haemer grad di erschti safari gmacht. veu voegu haemer gseh ond proboscious monkeys, die send bsonders loschtig, die haend ganz langi nase wo oeber sganze gsecht abehange.

em jungle camp acho ben ich ase de einzig single gsi ond ha es hoettli ganz foer mech elei oebercho. das ganze het meh aneme voguchefig gleche, aues esch verreglet weu die cheibe affe aues chlaue wo omelit. for zwoei johr esch oeperem en grossi kamera klauet worde, ond die cheibe affe haend si vor sine auge demoliert, ond no schlemmer, ganz bewosst haend si de memorystick dursusegno ond met vougnoss met ed baeum gno... ;o) i ha ase emmer met groeschter vorsecht mis chefig verschlosse. am nomittag esch au dcampchochi noem secher gsi ond daffe haend ofem dach gluret bes niemer luegt ond probiert kondaensmeuch oder soeschtigi guddis zstaele. die cheibe send de zo auem aene no raecht agressiv. eine esch ganz noech hender mer ofem glaender dore, do werds eim scho chli andersch...

of de nachtsafari em boot haemer isvoegu gseh, die arme hoschelis send nachtblend ond mer haend bes en haube meter a si aene choene ond si bestuhne. da esch ganz idroecklech gsi. ossertdem semmer vo affe apisst worde, si haend lediglech usdroecklech zverstoh geh was si vo oeisere nachtruhestoerig haute...

of de bootsafari am morge frueh haemer es minikroki gseh. de wasserstand esch em momaent grad echli hoech ond dorem gseht mer fasch keni krokis. leider haemer au delefante ned gseh, sehr schuechi tier, auerdengs hani je laenger je meh de idrock, ass si jede gseh het ossert oeisi groppe... am nomittag semmer ofene tschongutour zfuess. usgroeschtet met gommisteffu semmer losmarschiert ond haend oeis tusigfuessler, chaeber, orang utan naeschter ond verspessni voegu agluegt. loschtig esch gsi, ass mer dor wasser gwattet send wo oeber oeisi steffu iecho esch. seeeehr loschtig... vorauem nachdem ass eine vo oeisere groppe en bluetegu am arm gha het... e minere groppe esch en ami gsi wo ergend voguforscher oder so esch. i be jo ke vogufan, aber de esch rechtig asteckend gsi, het oeis emmer sin faeudstaecher geh ond het einiges meh aus de guide gwoesst. das ganze het so wit gfuehrt, ass mer aui mega gfeschtet haend wo aer DE vogu gseh het, wo ehm set langem gfaeut het. e rise party ofem boot ;o) er nacht haemer de oeisi steffu weder agschnaut ond send nomou e urwaud. demmou haemer spenne gseh so gross wi e maennerhand (tarantullas), skorpione ond froesch e aune variante. sehr spannend gsi. natuerli semmer wederom dors wasser gwattet, en wohri freud nachdem ass oeis de guide di feschende spenne ond en wasserskorpion zeiget het...

zrogg em camp esch de generator om metternacht usgschautet worde ond mer haend jewils ke strom meh gha. i ha met es paar anderne no em ufenthautsberich usghart ond es esch keni 5 minute gange esch e cibit cho. da esch eini vo de chline raubchatze. die choeme cho luege oeb si oepis zaesse fende, gompe maengisch sogar ofd tesch ufe ;o) de cibit esch en meschig zwoesche teger ond zebra, sehr spezieu zeichnet.

sbeschte am ganze camp esch aber definitiv gsi, ass mer ke duschi gha haend ond auisaeme drue tag onduschet e de glichlige chleider verbrocht haend. i ha scho demet graechnet, ass mi de bus nach semporna a de stross stohloht...

aber si haend verbarme met mer gha ond mi metgnoh. ehr glaube gar ned, wi fescht ass ich mech ofene warmi duschi gfroeit ha... en semporna acho beni ganz bestemt en rechtig onderkonft glofe ond be voneme iheimische akwatscht worde, oebi scho en buechig heigi. i mue vellech saege, ass semporna es tauchermekka esch, densle sipadan geut ass eine vo de beschte tauchplaetz of de waeut. schwaer traegend ond echli ufdrenglech esch mer de tuep gar ned guet inecho, vorauem weu er mi ganz bestemmt e sin tauchshop ond sagraenzende hostel het weue locke. i ha de si zaeddu metgno ond be zielstrebig e MIS hostel. aehaeh... es het zwar guet usgseh weus of steuze es meer usebaue esch, aber i ha met schrecke feschtgsteut, asses e ke duschi het, sondern mer sech osem choebu mue waesche... AAAAAaaarrrggggg... es esch aber no schlemmer cho: i ha de zeddu vo dem tuep foeregnoh ond gseh, ass die foere glich pris warmi duschi ond aircon haend. grmpf. en klassische greff ed schissi...

ond mis gloeck het kes aend gno. i chome es internetkafi ond wer gsehni?? de kuschler!!!! mer haend oeis aber gaegesitig grosszoegig ignoriert. auerdengs het mi da dezue animiert, asi no am glichlige tag min flog nach kuala lumpur buechet ha. es esch woerkli ned min tag gsi.

grad am noechschte tag hani ustschegget ond be metem tauchboot of mabul, en vorglagereti ensle. det hani aues mis gepaeck abglade ond ha 3 bootstauchgaeng gmacht. woooonderschoen. ossertdem hani ofem boot de aenglaender vo kutching weder troffe, er het aus einzige au planet, dnacht en mabul zverbrenge. so semmer nachem tauche zaeme ed strandbar ond naer semmer vor oeisem longhouse (es traditioneus hus, e oeisem fau shostel) ofem staeg glaege ond haend veu verschednigi chraebse, en baby lionfesch ond oepe 8 muraene gseh, zom teil sogar omeschwemmend. es esch eifach hammer gsi... vorem znacht haemer oeis es bier goennt. i ha mi no gfrogt was do ploetzli so nach fesch stenkt wo de mark seit, ass die schinbar de fesch em glichlige chueuschrank wis bier ufbewahre... iiiihhhh, da esch jo vellech uebel gsi. aber loschtig. das ganze esch de no so wit gange, ass mer oeises gmues (ond no es betzeli meh) ned gaesse haend, weu auses nach fesch gstonke het... die noechschte bier haemer de ar strandbar gnoh. es send ned veu luet detgsi ond mer haend met de barduese serie glueget. mer send ganz enttuescht gsi wo si dbar zuegmacht het.

am noechschte tag beni weder vom boot abghout worde ond be nomou goge tauche. semporna ond mabul send oebrigens die erschte ort wod chend baettle. schlemm. i be de meinig, ass si do no emmer aues haend. aber es het sehr veu filipinos...

woni dore maert gloffe be het mis haerz bluetet. am hafe esch e riiiesige manta ray glaege. i be de abe ond ha met de fescher afoh rede. si haend mega froeid gha ond gmeint, si heige gloeck gha. sooooo trurig... i ha no ganz veu anders ondefinierbars gseh, aber offesechtlech riesig, weus e grossi stoecki gschnette gsi esch. buah. of mim waeg dor dstadt (ned em tureschtecenter) hani ganz komischi begaegnige gmacht. es paar luet send brutau onhoefflech ond saege eim es wort (woni daenke heisst soveu wi bitch oder so) chaut ond bestemmt es gsecht. en aute ma het mi agluegt ond ganz langsam gspeuzt, e dechti grussigi masse. naer hetter sech met vougnoss ganz langsam smu abbotzt. zom teil sehr fruschtrierend, aber die positive sache oeberwiege definitiv. i ha sehr gueti gsproech met iheimische gha, di meischte send SEHR heufsbereit ond saeubscht wenn si kei aenglisch choene moeche si aues foer eim. nachere megacoole party met em tauchteam beni es taxi en rechtig airport gstege. soooo schlemm, wiso hani de flog nor scho buechet?? am liebschte waeri no detblobe ond ich ha mer aernschthaft oeberleit, min floeg eifach fluege zloh...

guet, so beni haut en Kuala Lumpur acho, en witeri grossi stadt. i ha mi noei muesse organisiere ond so beni naebem augearzt no bem gwaffi gsi (emmer weder es erlaebnis), of de hauptposcht mini poscht goge abhole ond ha veu zit em internet verbrocht. Ossertdem beni no of de petronas towers gsi ond ha de hop-on hop-off bus gnoh, auerdengs fasch de ganz tag drenne gschlofe. enere bar hani es vermoege usgeh foernes bier ond a minere letschte deschtination, en see met wonderbarem usbleck ofd twintowers ond ere wonderschoene liechtshow inkl. rieserad, hani es taxi muesse zrogneh weu mer de busfahrer gseit het es chiemi secher no en bus ond es esch ase kene meh cho...

gli hani weder os de stadt use muesse ond ha de bus en rechtig cameron highlands gnoh. was foeren fahr, de bus esch foermlech ed korve glaege ond mer send verbidueset a feuswaend ond abfallende strosse, om korve jewils hupend so ganz nachem motto: aues osem waeg, ich be groesser aus du... e de highlands esches rechtig chueu ond die lache mi do aui us weui emmer fruere, schinbar esch da ueblich wemmer os de schwiz chont... i ha ase mini lange hose, socke ond de fasi montiert. aber schooooeen esches do... aues esch gruen ond rondome hets baerge. Geschter hani metere froendin en tur buchet, mer send zaeme ed rose farm, e teeplantage (sooooo schooooen), en bienezocht, ed aerdbeeriplantage (waege dem beni jo eigentli cho) ond ed schmaetterlingsfarm. onderwaegs hani mini kamerataesche metem ersatzakku verlore. eine vo de groppe het si no gseh, si aber eifach legge loh. idiot. aegsguesi. woni zrogg be esch si natuerli niene meh gsi. mini aerdbeerifarm esch entspraechend oeberschattet worde. stonde nach de tour esch de guide zrog es guesthouse cho ond het nach minere froendin gfrogt, weu si ehre coupon noni abgeh het. ossertdem hetter mer mini kamerataesche inkl. akku zroggbrocht, er esch aegstra nomou zrogg ond aegstra nomou es guesthouse cho. sooooo naett, ich hetten choene omarme!!! Di domme haend weder emou wiehnachte gha...

hoet beni met kollege ofene ongfuehrti tour gange. entspraechend haemer oeis es paar mou verlaufe ond haend muese verbettoniertie abhaend abechlaettere (hey nomou, mer haette staerbe choene, esch aber soooo loschtig gsi) ond oeise waeg dor oeberwuchereti dschonguwaeg sueche. esch woerkli guet gsi ond mer send froh gsi, womer dorch reine zuefau weder zrogg es dorf cho send :o)

morn nemi de bus ofd perhentians, vorglagereti ensle a de oschtkoeschte vo malaysia a de graenze zo thailand. i bruche jez drengend ferie, reise esch jo sooooo astraengend...

di liebschte gruess ed schwiz, i hoffe ehr moeget min blog glich laese, au wener echli lang worde esch... i maeude mi of jede fau weder! hebet ech sorg ond haend en gueti zit..

Der Kuschler

De Flog nach Singapur esch jo bsonders loschtig gsi. Mer haend es paar naetti Turbulaenze gha ond sogar dFlightattendants haend sech muesse aschnaue, so fescht hets gschoettlet. A board send es paar Inder gsi (wo saeubverstaendli saeuber gkochet haend) ond sobauds schnaeu emou ufghoert het schoettle send einigi devo ufgstande ond haend ofs WC oder was weiss ich woeue. dHostesse haend em Chor vo aune Site grueft si soeue weder abhocke ond die haends ergendwie ned gschnauet. Hey, send die nervoes gsi. Guet zuegeh, es hett scho chli andersch gschoettlet.

no voellig ufgloeset ond mued vo mim seelische Chommer beni en Singapur acho. Mini Froendschaft met dere Stadt het bereits e de Metro agfange, woni verpasst ha asi muesst omstige ond haut weder zrog zom Floghafe gfahre be... Defoer haends mi em Hostel bereits erwartet, grad am Rand vom Rotliechtmilieu. Mini Onderkonft esch entspraechend gsi, aber Aues e Auem chani glaub eifach nor froh si, asi mer kes Stondehoteu usgsuecht ha... I ha eneme 10er Schlag gwohnt, voll met Filipinos wo of de Suechi nacheme Job send. Ehres Aenglisch esch nahezu perfekt gsi ond ich be fasch echli nidisch worde. Vorem Hostel hani scho e de erschte haub Stond vo mim Ufenthaut di erschte Ratte ond Kakerlake gseh, sehr ufbauend...

Am noechschte Tag beni de mou losglofe, zerscht dors Rotliechtmilieu ond denne e di turestischi Orchard Road. Mer choent schoppe bes zor Konkorsamaeudig, auerdengs esches ned grad beuig ond ich be soescht scho so oeberlade, asi ned emou dra daenke, no oepis dezuezchaufe. Voellig fruschtriert beni de e noechscht Starbucks ghocket ond ha mini Kollege abgklapperet, wo bereits en Singapur gsi send ond nach Tips gfrogt. Guet, die zwoei sehr naette heufsbereite Haeufer haend mi eistemmig of Sentosa gscheckt, e chlini Strandoase am Rand vor Stadt. So hani mi gaege Obe wie vorgschlage ofe Waeg gmacht ond be enes Gondeli gstege wo mi oebere Hafe zor Ensle gfahre het. Die Idee esch zwar wonderbar gsi, nor foeren Single gar ned zempfaehle. I ha mi enmette vo tusige vo verliebte Paerli weder gfonde ond be fasch echli sentimentau worde. Es esch en wonderbar romantische Platz gsi, perfekt zom chli flaniere, Znachtaesse ond dore Sand zlaufe, om e de noechschte Strandbar none Drink zneh. Ganz elei beni de haut es Cafe del Mar ghocket ond ha de Aukohou of mi woerke loh...

Osertdem beni no em Chinatown gsi, ha mer em Swissotel en Drink goennt zo wonderbarer Ussecht oeber di ganz Stadt ond ha mer es Flogticket nach Borneo bsorget. Ofem Waeg beni vo eim aghaute worde, oebi do wohni oder wi lang asi en Singapur sigi, aer suechi noeii Gsechter foer Waerbekampagne. Loschtig, loschtig... Aber do ich planet ha am noechschte Tag witerzfluege het sech das erlediget.

Soesch esch mer Singapur gar ned guet inecho. Sehr clean, busy ond onpersoenlech. Ha mi gar ned wohl gfuehlt em Land vo de superschnaeue Rolltraeppe wo mer hoellisch mue ufpasse ass mer gfohrefrei uf- ond abstigt.

Aber snoechschte Abentuer het ned lang of sech warte loh. Nach drue Naecht e mim wonderbare Dorm hani mi frueh am Morge (mini Gspoendli, auisaeme Langschloefer, haend mi gliebt nachdem ass de Zulli Mette e de Nacht os Versehe agluetet het (ond ich ha mis Telifon ned abgsteut waegem Wecker) ond min Wecker am Morge am Saechsi ab esch) ofe Waeg gmacht zor Bushautesteu. Metem Bus beni ad Graenze zo Malaysia gfahre, usgstege, dor dPasskontrolle ond weder e Bus ine. Das Selbe Speli nomou am Malaysische Zoll. Vo det us hani mi Rocksack weder bogglet ond be oeberroennt worde vo Taxifahrer. Es Wonder as si eim ned grad es Auto ziend... Metem Taxi beni a Floghafe vo Johor Baru gfahre, weu Floeg vo det us grad emou dHeufti vo de Floeg ab Singapur choschte. Komischerwis hani mi bereits abem Itrett nach Malaysia veu wohler gfuehlt. Es esch eifach weder moenschlecher gsi, froendlecher ond draeckiger ;o)

Ich ha dLuxusvariante demmou vorzoge ond be Malaysian Airlines gfloge. E Traum, ond wo mis Aesse cho esch hani gmeint ich ghei oebere. E Box wo jede Feng-Shui Froend traenendi Auge oeberchont... Mini Sandwichli send emene chlinere haerzige Boexli verpackt gsi, ond sAesse esch rechtig fein gsi...

Am Floghafe vo Kuching hani nach stondelangem Warte beschlosse, ass mi sTaxi ed Stadt fahre soeu. E wonderschoeni noeii Lodge grad a de Wasserfront vo Kuching. Kuching saeuber esch e chlini haerzigi Stadt met Charme. Am Obe esch aecht dHoeu los ond es esch lut, aber loschtig. sEinzige wo mi gstoert het send di iheimische Jogendleche gsi, wo chli laeschtig gsi send. Vorem Hostel haend mi es paar agsproche ond nachdem ass mer das Uebliche wi Haerkonft ond Name gklaert haend het de eint gmeint, aer choeni doch met mer es Bett cho... Ossertdem beni em Hostel mehrmous druf hegwese worde, asi nor snoetigschte Gaeud metneh seu ond das em Hosesack. Aues anderi sig zgfoerlech, ond ich be tatsaechlech metere Britin bekannt gmacht worde, wo ehri Taesche so los worde esch. Em Hostel hani Bekanntschaft gmacht met em Vater vo de Lodgebsetzere. Sini anderi Tochter het e de Schwiz studiert. Er sammlet Moenze ond het uh de Plausch gha, ass ich ehm es paar vo mine Froemdwaehrige inkl. CHF gschaenkt ha. Aus Dank het er mech am noeschte Morge em Hostel abghout ond mer send a Stadtrand gfahre, wo aer mech zom Zmorge iglade het. Typisch foer do Laksa, en Soppe met Nudle, Gmues ond Crevette ond Kokosmeuch. Scharf, sehr scharf... aber yummie. Dezue hani no Roti Canai oebercho, en Art en knoschprigi suessi Omelette, serviert met Currysauce, so lecker, i schlacke mer Hoet no dFenger. Denoh het er mi no woeue ed Pfaefferfabrek fahre zom Pfaeffer chaufe, die haend aber leider zue gha weu Samschti gsi esch. Defoer semmer de zor Bushautesteu mis Ticket foere Nachtbus goge hole.

DPrise send en Traum, so hani en Kuching foer sZnacht ond es Bier grad emou knappi Drue Schwizer Franke zaut. Was ossertdem Spezieu esch, of de Stross ghoer ich staendig "hello Miss", was zerscht raecht gwoenigsbedoerftig gsi esch. Em Hostel hani es Gschwoeschtertepaar (si het ehre Brueder bsuecht wo set Monate onderwaegs esch ond aer het grad Dengue hender sech) os UK troffe ond woni met ehne onderwaegs gsi be hani feschtgsteut, ass da ned nor dra lit, asi elei onderwaegs be, sondern ass da ganz normau esch. Guet, haette mer da klaert.

Zobe beni ofe Nachtbus. Ar Bushautesteu beni weder emou ganz komisch aglueget worde. A veune Orte send sech dLuet gar ned gwoehnt, Tureschte aztraeffe (wasi mer auerdengs a de Langdischtanz-Bushautesteu gar ned vorsteue cha) ond mer gseht ehne das foermlech ah. Aber aui laechle mi emmer ganz froendlech ah ond waend woese, wohaer ich be, egal wi schlaecht si aenglisch choene, rede waend si fasch aui. Ond es cha glaub au ned passiere, ass mer de fausch Bus nemmt, weu sech aui drom koemmere. Eine vonere andere Busgseuschaft esch sogar zo mer cho ond het mer sini Charte geh, foer snoechschte Mou :o)

Ganz verchroeglet ond no mette e de Nacht beni en Sibu acho. Chum abghocket esch de Elvis zo mer ghocket (de heisst woerkli so) ond es het sech usegsteut, as aer vo Kapit esch, mis noechschte Reisezieu foerd Nacht. Kei Ahnig woner haer cho esch a dem Morge, aber het gmeint aer choeni mer es Longhouse zeige, de Grond werom i eigentli ha weue de Trip mache. Mer haend zaeme ofs Boot weue. Aer het mi aber scho gli afoh naerve. Er esch de Meinig, e de Schwiz send aui sehr rich. Nach mehrmohligem erwaehne hani ehm voellig entnaervt (es esch ergendwo am Morge am 5i gsi, i be ase es betzeli entschoudiget) erklaert, ass mer genau so richi ond armi Luet hand wi Borneo au. Er het mer aber ned glaubt ond witer esches gange as aer het woeue woesse, wiveu asi verdiene ond was asi foer was zaut ha. Mer haend zaeme de Bus gnoh (woni ehm mue ahraechne, aer het foer mech zaut, die 30 Rappe). De Busfahrer het bereits am Morge am 6i Saeubschtgsproech gfuehrt ond esch echli ofs Gas, het echli Rolle loh ond esch weder ofs Gas. Soooo loschtig. I ha mi koeschtlech amuesiert. De Elvis esch mer of Schrett ond Trett nohglofe ond asi elei ofs WC ha choene graenzt anes Wonder. Nachem WC hani mi metem Taxifahrer onderhaute ond ha os de Augewenku gseh, ass aer mech suecht. Da esch sletschte Mou gsi, wonen gseh ha, er esch komischerwis ned emou ofem Scheff nach Kapit gsi... sehr verdaechtig...

Nacheme vierehaubstoendige Bootstrip Flossufwaerts dore wonderschoeni Urwaud beni en Kapit acho. E chlini Stadt omgeh vo Dschongu, dirakt am Flossufer. Veu haend do ned Aenglisch choene ond ich be fasch die einzigi Tureschtin gsi, aber si send so haerzig ond probiere aues. Woni mer em Cafe (die hiesige Reschtis) oepis ha weue bsteue woni kenne haends grad da noeme gha (ond mer met haend ond fues erchlaert). Guet, so hani si gfrogt, was si choene empfaeue ond die jonge Fraue send kichernd naebe mer gstande ond haend aues ehres Aenglisch zaemekromet ond ich ha mi mou oeberrasche loh, wasi schlossaendlech oeberchome. Aues e auem hani en Chicken-Soup oebercho met Nuddle, sehr lecker. I ha en ganze Nomittag Zit gha en Kapit ond be chli dord Gaegend glofe. Es paar Schueumeitli haend mi of de Stross agsproche ond mi gfrogt wini heisse ond woni haerchiemi. Si haend de gseit, si muese jez ebe ed Schueu. Meega haerzig.

Am noechschte Morge beni grad echli e Stress inecho weui foer mis noechschte Ziu e Beweuigong brucht ha ond em Lonely Planet no de auti Standort vo dem Buero esch. Es het sech de usegsteut, asi en Bus neh mue ond osserhaub vo Kapit zo dem Permit chome. Voellig gstresst beni det acho, es duetsches Paerli (Andrea ond Andreas) esch au no det gsi, ond ich mue saege, ass sech die of dem Amt mega mueh geh haend ond rechtig pressiert haend, ass mer das einzige Scheff nach Belaga am Nueni no schaffe.

Am Hafe semmer no ofe David gstosse, e 59-jaehrige Aenglaender wo mendischtens wi 70gi usgseht. Nachere wonderschoene Scheffahrt dore Dschongu ond oeber Stromschnelle semmer en Belaga acho. De David ond ich haend oeis zaeme es zemmer gnoh, zom echli gaeud spare. Wenns ke Dorm het mueni jewils es einzuzemmer neh, drom esch mer da no so raecht wemmer de pris choene teile, ond ich meine, aer het jo au voellig harmlos usgseh...

En Belaga lauft ned veu, aber mer aui haend dRueh gnosse. Es het fasch e ke Verchehr. Mer haend eine beobachtet wo sini Goeggu zom Grase dosse abonde het, am Obe escher de zrogg cho ond het jede einzeln gwaesche ond e sini Box versorget. Mer vermuete, ass die foer haenekaempf send. wonderschoeni Tierli...

Womer es Bett send haend de David no oeber Gott und die Welt gredt, ond os heiterem Hemmu frogt aer mech, oebi woeui kuschle... do hani doch grad nomou muese nofroge, be mer ned ganz secher gsi, oeb jez mis aenglischverstaendnis verseit. so het er haut nomou gfrogt, oebi kuschle wott... nachdem i ganz bestemmt mini antwort metteilt ha het er nor gmeint, das sigi aues woner frogi. guet, haette mer da klaert. obwou, mini nacht esch laaaang gsi...

am noechschte morge het de Anddreas, oeise malaysische Guide, bereits am Floss of oeis gwartet. Mer send ene meeega schmale Kanu met Motor no witer Flossufwaerts ond send enes Longhouse, di typische traditionelle Hueser vo dene Staem e dere Gaegend. Det haemer scho am Morge frueh es ganz deftig hochprozaentigs Gebraeu oebercho, decht gfougt von oepisem zom Rauche, wo usgseh het wine Joint, aber gschmoeckt het wi wemmer e Garte woer rauche... Ablehne, geut oebrigens ned, das esch sehr onhoefflech, genau so wimer ned met de Fuess of anderi Luet zeiget wemmer am Bode setzt. Denoh semmer ergendwo e dechti Dschongu ond haend dLuet be de Risaernti bsuecht. Da esch jo vellech entressant gsi, die schaffe onder ganz extreme Bedengige ond ich fende, mer sette echli bewosster Ris aesse... ok Ruedi, chasch doch weder Ris choche ;o)

vo det us semmer no enes anders Longhouse. I ha es paar naetti Foeteli vo Fraue met Ohre bes onder dArme doefe mache, mega. dChend send jo au goldig.. aus Abchuelig haemer eigenli woeue go bade beneme Wasserfau. Mer send au dethe ond es het grad weder afoh raegne, ond es esch voraene scho gschleferig gsi. I ha so muesse lache, mer send dore tuefi schlamm gwatet, oeber stei so gschlefrig wi is ond floess so tuef ass mer scho vom dorewatte nass worde send bes zo de Hoefte.Benere Brogg hani gmeint ich gsaechi ned raecht oder de Anddreas moech en Schwerz, da esch en Houzbrogg gsi wo auerdengs meh Latte gfaeut haend auses gha het zom drufstoh. I ha mi foere Waeg ondedore entschede... Ond mer haend das ganz freiwellig gmacht, schlemmer no, mer haend zaut defoer. Wo de Andreas osem Stand de langewaeg ofe Roegge gheit esch haemers de doch noeme so loschtig gfonde, vor auem weu aer froesch am Roegge operiert gsi esch. Ase semmer haut aues weder zrogg ofem glichlige Waeg. Noechschts Ziu zrogg nach Belaga. Ond es het jo vellech afoh raegne... mer send nass gsi wi dNala wo es Aquarium gompet esch. Eisern of oeisem Boetli met gsaenkte Choepf dore Raegewand...

A dem Obe haemer metem Anddreas echli gfiret, da heisst, si Bootfahrer het so froeid a oeis gha, ass aer glaub sin ganze Tagesverdienscht foer Bier usgeh het ond mer send saeubverstaendli iglade gsi. dAndrea ond de Andreas send de ergendwenn mou es Bett ond de Kuschler het nochli doreghaute, obwou aer de erscht gsi esch wo eigentli zrogg het weue. I be aegstra nochli hocke blobe, so bes am Morge oder so... Defoer hetter de scho gschlofe.

Eigenli haemer vo det us met em 4WD witer weue, aber weus eso fescht graegnet het haemer metem boot zrog muesse. Am Aend vom Floss het sech de Kuschler franzoesisch verabschedet, aer het weue sini Kamera flecke ond ergend soesch no oepis erledige, ase sends duetsche Paerli ond ich zemli pauselos omgstege ofe bus nach Niah. Zemli spoht semmer det acho ond haend emmer no oeber Kuschler glachet, haend di weudischte Stories usdaenkt ond oeis Buchmoskukater ghout. Mer haend grad nach oeisere Akonft em Bushautesteureschti e Zitronesaft tronke ond de Andreas het grad ergendoepis verzeut wonen ganz energisch ha muesse onderbraeche ond metteile, as de Kuschler chont. Mer haend jo soooo muese lache, mer send fasch oebergheit, de Kuschler esch gar noeme drus cho. Fakt esch gsi, ass aer aui sini Erledigonge gmacht het ond grad emou 15 Minute nach oeis acho esch... mer woesse ned was mer fausch gmacht haend. Em Foodcourt haends oeis de gseit, ass kes Taxi ond ke Bus meh ed Stadt goht, aber si heige en Onderkonft foer oeis. Mer haend auerdengs no e haub Stond muese warte, vermuetli haend si zerscht no suber gmacht. Guet, mer haend aui eistemmig beschlosse, ass mer no es bier oder zwoei naend, moeglechscht spoht es bett goend ond moeglechscht gli weder ufstoend, ond, of kei fau s'wc oder d'duschi bruche. I ha ned emou min zaeh botzt... Do ich devo usgange be ass die Sach zwoeschem Kuschler ond mer gklaert esch hani nomou mis Zemmer metem teilt. No ganz schloftronke aber bereits wach legi e mim Egge ond *wuerg*, langet doch de oebere... i ha jez no braechreiz. I hanem gseit aer seui sini Fenger be sech bhaute, aber aer het nor glachet...

A dem Tag semmer e Niah National Park, wos wonderschoeni riiiisigi Hoehlene het, vou vo Flaegermues ond Schwaube (oder so) wo det ehri Naeschter baue ond die Iheimische moeche os ehrne verlassene Naeschter Bird-Nest-Soup, en sehr tueri Delikatesse, schinbar. Definitiv en Bsuech waert gsi.

So, da esch gnueg Tegscht foer Hoet, i werde mini Story e de noechschte Tage witerfuehre, so wit choene der die Kuschlerstory emou verarbeite. Mer gohts guet, nor ke Sorge, bes jez esch aues ganz harmlos verloffe ond ich ha mi jederzit choene wehre. Ond ich ha au sehr veu gueti Luet kenneglehrt. Ich gnuesse mini Zit so sehr, asi mer bereits oeberlegge, oebi dVerlaengerig seu\cha igeh... Mou luege was mis Budget meint, ganz geschweige vo minere bessere Heufti... Spaende waerde saeubverstaendli jederzit sehr gaern agnoh onder de Kontonommere... nei, nor spass.

I droecke oeich Deheime aui ganz fescht, haend e gueti Zit ond haend oeich Sorg