gibbon experience

em chline verschlofne doerfli huay xai acho haemer foerd gibbon experience itschegget. en tour wo wit em vorrus usbuechet esch, ond ned omesoescht! aber aues de reihe no!

am morge frueh haemer oeis aui zoneme briefing em buero troffe ond send de em heck voneme truck e dschongu losgfahre. mer aui haend mega angscht gha ass de floss zhoech esch ond mer metem auto ned dorefahre choene. da hetti beduetet, ass mer 7 stond hette muesse trekke!! dfahrt ofem truck esch wonderschoen gsi, dord landschaft ond ab e dschongu, of draeckstrosse uf ond ab, mer haend muesse dchoepf izieh waege de bewachsig ond einisch haemer sogar muesse ahaute ond en baum ewaeg rume wo ofem waeg glaege esch.

am aendi vo de stross esch es chlises doerfli gsi wo getraenk verchauft het. det haemer dgroppe troffe, wo zrogg cho esch. si haend oeis foeteli zeiget vo de schlange, wo si am morge e ehrem baumhus gfonde haend... das send jo ussechte...

zerscht haemer aber oeisi trekking schue montiert ond send tuefer e dschongu marschiert. ofem waeg send diversi flossdorchkwerige gstande ond ich ha mini trekking schue ab ond ah zoge, secher 6 mou! aber e super abchuelig gsi! weniger loschtig send auerdengs dbluetegu gsi, ond woerkli em fau ned wenig!! buaeh, soooo ekelig!!! de herti trek meischtens baerguf esch zom gloeck meteme wonderbare bad bem wasserfau belohnt worde. mer haend fasch noeme weue usecho, so herrlech esches gsi! aber was denne cho esch esch no veu besser gsi! metsamt oeisem gepaeck haemer oeises gwaendli montiert, de karabiner oms kabu gmacht ond drolle ofs kabu gsetzt ond los esches gange: en tuefusrett setzend er loft, ufghaenkt amene kabu, wit oeber de baumchrone ond wit oeberem tau, metere onglaubleche ussecht of de wasserlauf ond nuet anders aus dschongu, so semmer dor dloft gleitet wi en gibbon. eifach onbeschriblech, dloft blibt eim waeg ond mer glaubt sine auge ned! affegeil! so semmer au zo oeisere onderkonft foerd nacht cho: es baumhus 150m oeberem bode! woooohooo! de arm kanadier zach auerdengs hets ned eso loschtig gfonde, er lidet onder ganz schlemmer hoeheangscht... er het sech ned wit vom baumstam ewaeg bewegt. oeises aesse esch au via zipline es baumhus brocht worde. oeise guide het oeis auerdengs eleige gloh chum semmer acho, ond so semmer ganz elei of oeis gsteut gsi. s'wc esch em 'parterre' gsi, met wonderschoener ussecht oeber dbaumchrone es tau. d'duschi esch au det gsi. aues esch em freie fau a bode abe gheit... scho chli onheimlech. schlemmer esches worde, wos donku worde esch ond mer tonnewis handflechegrossi spenne (ond ich rede nor vom koerper) em dach entdeckt haend!!!! die send jo vellech obergrusig gsi!! obwou ass si wenig entraessi a oeis zeiget haend ond sech ned vo ehrer buetijagd abhaute loh haend. die spenne haend kei netz... ned zrede vo au dene motte wo om oeisi cherze (strom?! secher ned!!) gfloge send ond e de flamme oder em floessige wachs saeubschtmord begange haend. ou jo, ond flaedermues send om oeisi choepf gfloge, de absoluti wahnsenn!! absolut einzigartig esch gsi, ass mer en chaefer entdeckt haend, wo sin panzer abgworfe het weuer gwachse esch ond en noeie brucht het. de einscht schwarzi chaefer esch ganz wis gsi, schoen komisch!

mer haend onder anderem zwoei auschtralier debi gha, mueter ond tochter. ui, dmueter esch jo vellech en schocker gsi! si het oeisi cherze metem heisse teechrueg gschmouze, esch anstatt trekked jogged asd bluetegu ned choene asuge (si hets sogar gschaft, eine a ehrem buchnabu zha...) ond de absoluti hammer esch gsi, ass si benere flossdorchkwerig de lengi no e floss gheit esch ond ehri socke verlore het... ha, ond am letschte tag send au no ehri schue de bach ab! en lacher vo de pinleche sorte...

di zwoeit nacht haemer emene andere baumhus oebernachtet, wo mer nacheme andere 4 stoendige hike erreicht haend. puuuhh... de mark esch zerscht inegfloge ond de guide hets ergendwie verpasst ehm zsaege, asses kei igang het... aehm, er esch vougas e hag gfloge... pruscht, i ha mi schief glachet, stoepfli ofem i esch naemli gsi, ass aer de ganz flog au no gfilmet het! weu mer bereits zor mettagszit acho send ond oeise guide oeis weder verloh het haemer entschede, osem hus usezfluege ond vo de andere site weder inezfluege, so geil! aecht de hammer gsi! wo de armi zach serscht mou em baumhus acho esch ( wo no veu hoecher gsi esch wis andere) heter todesaengscht gha ond gseit wener jez usefluegt schloft er metem guide er chochi, er chiem secherlech noeme zrog! er het de baumstamm fasch omarmet, so angscht heter gha. mer haenden denn oeberzuegt, ass er met oeis seu choge fluege was er den au gmacht het ond met jedem mou het er sech veu besser gfuehlt. ha, er het ase anstatt met de bluetegu met oeis em baumhus gschlofe ;o)

beneme ganz lange flog hani leider leider mis wonderschoene chaepi verlore.. eifach devogfloge, wines voegeli... buuuhuuuuhuuuuuuuuu... aber de flog eschs waert gsi! am drette ond letschte tag haemer muesse zrogg es doerfli hike, straeng wi emmer ond ich ond de mark haend meh ass gnueg vom hike em dschongu!! defoer haemer nomou en uh lange flog gha, meteme haut enere andere baumkrone wo mer skabu gwaechselt haend ond witergfloge send. da esch jo vellech hammergeil gsi! aegsguesi...

weus echli graegnet het esch de ganz retourwaeg met de angscht vo 7 stond zrogglaufe oeberschattet gsi. sobaud ass de floss zveu wasser het cha de truck noeme dorefahre ond aui muend laufe. mer haend aber gloeck gha ond de truck het bereits of oeis gwartet, ich be jo soooo froh gsi!

no am glichlige nomittag haemer vo huay xai us sboot gno ond de floss nach thailand oeberkwert. was foeren erliechterig! ond aendli weder 7/11 oeberau!!! ui, det beni grad zerscht ine, ha mer potnoodles gkauft ond es twix, da esch fasch wi wiehnachte ond oschtere zaeme gsi! s'aesse en laos goent definitiv kei pris... nach mine ichoeif semer metem bus bes nach chiang rai gfahre weus zwit gsi esch bes nach chiang mai no am glichlige tag. en chiang rai semmer grad ber bushautesteu ondercho (de waeg vom grengschte wederstand) ond send no schnaeu dor de maert glofe. hui, aendli weder emou sache wo mer sech sogar choent oeberlegge, oeppis zchaufe! emmer no aues groempu, aber glich... ond he, zom znacht hani e super mega geili hammer pizza gha! nacheme monet en laos esch saesse do wi em hemmu!!

guet, guet, guet, das esches gsi foer hoet! woensche aune es tous weekie (vellech choene der jo broetle?!) ond foer die wo haend: schoeni ferie!!

en decki omarmig
oli