i go ed schueu!

nach einere nacht en chiang rai esches metem bus nach chiang mai gange. de 'luxus' do en thailand esch eifach onglaublech vergleche met laos, ond so haemer oeis grad am erschte tag skino goent. mer send oeis scho rechtig gwoehnt, ass mer vorem feum zor nationauhoemne muend ufstoh. mer gwoehnt sech ergendwie a aues, drom choeme au noeme so veu loschtigi stories, be so rechtig abgsotte ;o) erwaehne mueni ombedengt no, asi ofem waeg es kino en taempu agluegt ha. wott mer schliessli noeme ondersteue loh, i gsaechi nuet vo de kultur... ha! naer semmer bem nightmarket verbicho, en ort met uh veu maertstaend ond waegeli met aesse. mer haend aber nor auge foer de burger king gha, schiessli haemer emmer nochli es kulinarisch defizit. ofem heiwaeg semer ene bar gstoerchlet, vou met thai chicks wo of ehri weschtlechi 'chondschaft' gwartet het. hey, mini zaeh haend e dere bar gluechtet, het jo vellech heiss usgseh! ond ich ha glehrt tennis luege ond ha em rogie zuegluegt, winer gonne het. super gsi, be sogar fasch echli stouz gsi ;o)

mis grosse highlight en chiang mai esch de thai massage kors gsi. jep, i be foer 5 taeg eso rechtig ed schueu, met ufstoh am morge ond aues was dezue ghoert. i saege oeich, da esch de vellech kes zockerschlaecke gsi, d'aree, oeisi lehreri, esch sone rechtigi lunischi bitch gsi! i ha si ghasst... ond se vermuetli mech ;o) trotz auem, i has doregstande ond be jez stouzi bsetzeri voneme thai massage diplom ond erwarte oeich aui zoneme plogi-termin sobaud i zrogg er schwitz be!! ha, da esch de emfau kes vergnuege, aber haeufe seus, ond mer haend doch aui oeisi weh-wehli, oder?!

waehrend de mark zom zahnarzt gange esch ond sech sini plombe ersetze loh het (zwoei grossi loecher foer oepe 35 franke...) han ich doerets ond met chili gwoertzts seegrass foer mech entdeckt. ganz en noeii erfahrig. de erscht bess esch jo vellech so grusig gsi, aber de zwoeit ond di raeschtleche send onglaublecherwis oberlecker gsi. werd zit ass da oeper ed schwitz importiert! ofem waeg osem hoteu semer haubwaegs ofenes bier iglade worde (wo mer haend muesse saeuber zahle), mer send di erschte gescht eneme noeie reschti oder kaffi oder so gsi. oeises gaeud werd nie usgeh, sondern ad wand ghaenkt, es seu gloeck brenge! ond veu, veu meh gaeud...

nacheme zwoeite feum em kino (mer haend schliessli echli nohhoubedarf gha) haemer oeis foer de tag es toeffli gmietet ond send a bahnhof oeisi tickets foer de nachtzog nach bangkok goge poschte. vo det us semmer of de hoechi baerg vo chiang mai gfahre, en superschoeni fahrt korverich ufwaerts bes mer bem taempu dai suthup acho send. i glaube da esch bes jez de schoenschti taempu gsi, woni gseh ha. uh gross, met veu glogge ond gloeggli ond riiiesige trommle. uh schoen, ond aues en goud, wi sechs foeren rechtige taempu ghoert.

weu mer nochli zit foerig gha haend semer ofem roeckwaeg e zoo. abgseh vo de moskitos esches absolut lessig gsi. nor schad ass sakwarium met de wahlheie erscht baue werd. da waer jo vellech hammer gsi... vorauem weui si bem tauche oeberau verpasst ha... mer send de fasch echli versumet worde ond so haemer rechtig muesse zrog ed stadt pressiere. mer haend naemli no es 'brittania' weue goge es fruechs znacht aesse. em brittania, es aenglischs hotel ond reschtorand, haemer naemli jede tag zmettag gaesse. super, super fein gsi!! de mark het jede tag jacked potato gha ond ich ha naebe eme super feine wienerschnetzu de bescht salot set ewigkeite gha! hach, wi sehr ich min salot vermesse...

weu mer da ombedengt haend muesse dorezieh metem brittania haemer fasch no de zog verpasst... mer send grad abghocket em zog ond aer esch abgfahre. puh, schoen schwein gha. e oeisem abteil haemer charte gspeut ond bier tronke. het zwar schoen veu gkoschtet, aber defoer esches osem spiswage serviert worde. echli spoeter esch de mark e spiswage gones bier hole ond het weniger zaut. won ich gange be hani de pris zwoeschem servierboy ond am mark zaut... komisch. de mark esch de nomou eis goge hole ond het reklamiert waegem pris. aer het gseit, ass mer es vermoege zaut heige foer oeises erschte bier (oepe 4 franke!!!) d'duese het gmeint: ah de, jo de kenni, da esch es schletzohr! ond hetem differaenz useghe. de het de mark nochedopplet ond gseit: ond mini kollegin wo voraene esch chones bier hole, si het au meh zaut! grommlend het si nomou ed kasse glaengt ondem differaenz au no geh ;o) da hani ombedengt muesse verzeue, de patric liebt die stories, ond so wotti die oeich secherlech ned vorenthaute ;o)

de nachtzog esch sehr agnaehm gsi. nacheme wili choeme dkonduektoere oder so ond chome sbett choge mache. da esch jo vellech service! ond so haemer fasch es rechtigs bett gha. super gsi. i ha so guet gschlofe asi gmeint ha, mer heige oeisi station verpasst woni verwachet be... esch schnaeu echli stressig worde, vorauem weu aui tureschte usgstege send, aber schlossaendli haemer nomou 2,5 stond em zog verbrocht... puh, be schoen erliechteret gsi!

hey ehr liebe, soevu zo minere omereiserei. was lauft dehei?

en liebe gruess os thailand
winke winke
oli