aendli weder echli strand

weder emou beni ofem boot ofem waeg zonere ensle verscheffet worde. befor mer abgfahre send esch es boot inecho, ond aui haend totau dorchnaesst usgseh... wi verheissigsvou... zom zmorge hani em boot potnoodles ond e sack vou froecht gha. wi wemmer ned scho gnue gepaeck hette...

di erschte zwoei taeg haemer vorem faehrnseh e oeisere onderkonft verbrocht, weus haut graegnet het. aber mega gsi, de ganz tag dvd luege, bier trenke ond moskitogrem istriche! dmoskitos en koh samet send oeberdimensionau riiiisig!! so oepis hani no nie gseh... dstrosse send meeega schlammig gsi, mer haend chum choene laufe. entspraechend fahre e hufe meteme squad ome anstatt metem toeffli. scho no cool.

am drette tag haemer de aendli aendli a strand choene, es esch herrlech gsi! loschtig esch, asses uh veu hoend het do, maengisch buddle si sogar es loch e sand ond legge dri. ond aui send uh froendlech ond choeme met bes ed onderkonft wenn si defoer es chraebi oeberchoeme. de strand esch wonderschoen, schliessli esches jo au eneme nationaupark. dgezite send auerdengs raecht starch, ond ab ond zue esch en grosse seestaern agschwemmt worde. wi schoen esches aber gsi, aendli weder emou am strand zlegge, zlaese oder de rusch vom letschte obe uszschlofe... ond 7/11 esch jo vellech sooo noech gsi! beuigs bier, potnoodles ond glace, yum!

am spoetere nomittag send mega cooli reschtoraendli zom vorschin cho. wonderbari seafood buffet ond choessi am bode met choessilehni ond nedere tesch. mer esch ase foermlech am strand glaege ond het znacht gaesse ond het dfuershow gnosse. ab ond zue haemer oeis au en shisha goennt, es esch di perfekti athmosphaere gsi! nachem aesse semer ab ond zue go pool spele (ase ned i, nor de mark. i ha er zwoeschezit chessuwis gin & tonic tronke...da esch em fau ke wetz ond ned oebertrebe, do gets drinks osem chessu!!). aneme obe haemer en komische tuep troffe, ergend es gmesch meteme aenglische pass, laebt aber en basu. er het en thai em schlepptau gha ond de mark het eneme ruhige momaent gfrogt, oeb do en romanze em gang sigi. er het denn zor antwort oebercho: 'i weiss ned, aber weisch, dthai fraue send sooo andersch vo de weschtleche fraue. wo si woesch gmacht het het si mis zueg ohni zfroge eifach gno ond au gwaesche! da esch ebe scho ned zverachte!'...... i tue mi dodezue ned witer oessere. obwou asi a eim obe es woerkli feins zoerigschnaetzlets oebercho ha semmer nacheme wili zemli glangwilet metem aesse gsi. ned woerkli fein, ned woerkli spezieu ond emmer ond oeberau sglichlige. ond de service esch au entspraechend gsi. en chline uszog aus bischpeu: de mark ond ich haend en cheeseburger bsteut. woner cho esch esch ergendoepis ondefinierbars drenne gsi. aues, aber secherlech kei beef. de mark het os sim es chlises stoeckli abbroche ond mer haends beidi aus ondefinierbar befonde. usgseh hets ergendwie wi tofu. oder e gmuesburger. kei ahnig. de mark het de chaeuner grueft ond gfrogt, was das esch. de chaeuner luegt oeis met grosse auge a ond frogt was mer denn bsteut heige? en cheeseburger. jo, da esch en cheeseburger. i ha de mou agfange a mim omezchaffle, ha schliessli honger gha. de mark het sine omegeh ond gseit, er weui en cheeseburger. guet, de burger esch zrogg ed chochi ond zroggcho esch en burger ohni burger, defoer en schibe meh chaes drenne... das drama het sin lauf gnoh. so frogt de mark, was denn das sigi? - he daenk en cheeseburger! - aber do hets jo gar kei burger denne!? was seu da?? da esch vellech es cheesesandwich, aber secherlech kei burger!! - doch, das esch en cheeseburger! - aehm, i ha de mou schuech gfrogt, was denn mis sig, i ha doch schliessli au en cheeseburger bsteut... aus antwort esch de weder cho, wasi denn bsteut heigi?? ond ploetzli esch mis en cheeseburger met ham fleisch gsi... guet, de burger esch weder zrogg ed chochi metem uftrag, en chickenburger zbrenge. ui, ha mer weder emou fasch ed hose bislet woner zrogg cho esch! em burger esch weder genau das fleisch vom afang gsi, met dem chline betzeli wo gfaeut het womer probiert haend ;o) voellig fruschtriert semmer de e 7/11 go potnoodles aesse... auerdengs ohni foer de abvereckt burger zzahle. aesse esch sehr onbefredigend gsi, so haemer oeis nachere woeche entschlosse, de wonderbari strand vo koh samet zverloh ond witerzzieh.

aune deheimeblobne e wonderbare erscht auguscht (obwou asi ghoert ha, asses scheffet...)!

moechets guet ond haend ech sorg
s'reisefoeddli