sgroeschte draeckloch vo thailand

zrog ofs feschtland met de faehre, es paar stond em bus ond met de faehre witer of koh chang. womer sfaehreticket gkauft haend haemer erfahre, asses en thai firtig esch ond dthai foer 4 taeg frei haend. het mi ase grad echli naervoes gmacht, vorauem weu koh chang aus beliebts reiseziu vo de thai geut ond so noech be bangkok esch... gloecklecherwis haemer trotz auem en haerzigi ond vorauem suberi onderkonft ar lonely beach oebercho.

aues esch sehr witlaeufig ond vo strand esch wit ond breit ke spur. dgezite send extrem starch ond fresst aue stand ewaeg. be chli enttuescht gsi vorauem weus aus exklusiv ghandlet werd. emmerhin haemer en mega cooli bar gfonde wo of steuze oeberem wasser esch ond mer setzt of choessi am bode, da esch super gsi!

au die taeg haemer es toeffli gmietet ond send omenand gfaetzt. einisch haemer sogar omd ensle weue, aber dstross hoert ergendwo ploetzli uf ond esch onpassierbar. defoer haemer es super resort gfonde, ond sreschtorand ghoert zo de top 5 waeutwit!! natuerli haemer gfrogt, oeb mer echli doefe omeluege. wonderschoen, aber sehr abglaege. super foeren relaxte urlaub!

zo ebbezite semer echli am strand omeglofe zom oeisi brueni ned ganz zverluere ond haend moschle gsammlet. fasch wi e de ferie ;o)

nachdem ass mer nochli meh gschoepplet haend semer of die ander site gfahre ond haend dgrand lagoona gfonde. weus graegnet het haemer beschlosse, en witere tag zblibe ond das resort zerchondschafte. das het sech meh aus glohnt!! de itrett choschtet 150 baht, das send oepe 5 franke. enbegreffe esch en wonderschoene wasserfau, es velo zom omeduese, es getraenk, en frochtsalat ond es tuechli foer a pool oder strand. wemmer bedaenkt ass si a veune orte 200 baht verlange (iheimischi zahle oepe en foeiftu, er schwitz woere mer waege rassismus verklagt) zom en wasserfau azluege, esch das es super schnaeppli gsi!! dzemmer do send ke normaui zemmer, sondern boot ond aui schwemme emene see. eis defo esch en riiise kahn, sehr spezieu gsi. allerdengs sehr verlasse. aendli haemer au weder emou en rechtige strand gha. sogar de pool esch schwemmend gsi, hei, da esch vellech loschtig gsi. vorauem weus em see riiiiese schroepe vo fesch gha het. drom haemer feschfuetter gkauft ond haend si gfuetteret. da esch jo vellech es erlaebnis gsi!! mer haend de ganz tag det verbrocht, send metem velo a wasserfau, haend meh moschle gsammlet, send am pool (met poolbar!!) omeghanget ond haend glaese ond es pfuesi gmacht. herrlech!

nach dem super tag esches witer of phattaya, sgroeschte draeckloch vo thailand. hey, da esch jo vellech grusig... de bus het oeis ergendwo usegkickt ond tuk tuk fahrer haend sehr ambitioesi prise verlangt, so haemer beschlosse, met au oeisem gepaeck zlaufe... i ha baud angscht gah ass mini schloessubei nohgaend...

phattaya esch sehr, sehr turestisch, auerdengs groeschteteils sextureschte. mer haend oeis da meh wi phuket vorgsteut, aber do semmer voeuig fausch glaege. gaesse haemer bem toerk, da esch super gsi. denaebe esch sone bar stross met hookers gsi, wo mer denoh es bierli gnoh haend ond met eine vo dene fraue gwoerflet haend. hi, hi, so haemer oeis di ganz nacht vertoh ond uh veu spass gha. mer haend au usegfonde, ass sehr veu dubaianer dohaere ed ferie choeme. werom hani aber bes hoet ned usegfonde... ossertdem hani no niene so veu fetti (ond weni schribe fett meini fett...) manne a eim ort gseh. uagh. dbeach esch so grusig gsi, asi ned emou mini schue abzoge ha!!! ond da heisst doch au oeppis.. swasser esch draeckig gsi, am beach send oeberau toti fesch, qualle ond chraebse glaege ond osserdem so veu zerbrochnigs glass ass mer woerkli het muesse luege, wo mer lauft.. nachem kino (batman) semer nomou zom toerk ond nomou ed hookerbar, denn haemer das draeckloch am noechschte tag ohni zroggzluege verloh... zrogg nach bangkok...

das eschs weder gsi vo treggs o gaegs, tschou zaeme

xxx