turbulaenti akonft en cambodia

es schint ass waers gloeck a dem tag ned of minere site gsi. noni mou os bangkok use het de bus e panne gha. ergendoepis met de klimaalag glaub. mer haend gschlagni 2.5 stond of de 'autobahn' er sonne muesse warte, beses aendli witergange esch. ohni klimaalag. es esch en fahrt gsi wi er sauna, onertraeglech heiss!

defoer hani em bus d'ines os spanie troffe ond mer haend oeis so guet vertande, ass mer sofort beschlosse haend, es zemmer zteile. ond zaeme dor dstrapaze vom cambodianische visa goend... dbusgseuschaft bietet en ribigslose visaservice ah, aber weu ich no vo mim visarun presaent gha ha asi 40 anstatt 20 dollars zahlt ha hanis demmou weue saeuber mache. die vor gseuschaft haend oeis nonstop angscht gmacht, ass de bus ned warti ond es genau glich veu choschtet. ond die saucheibe haend oeis bem zmettag ar graenze au ned goh loh, ass mer gnue zit haette. ase, mer send ar graenze acho ond haend ei kampf gha om de rechtig pris. i mue vellech saege, ass i e mim letschte visa en staempu ha, wo mer gnau gseht asses 20$ choschtet. si haend aui behauptet, das sigi wemmers of em konsulat moechi, aber i has jo au for graenze gha!! guet, am 4. schauter esch e grosse buechstabe gschrebe gsi, ass svisa 20$ choschtet. aber die lusbuebe haend gseit, si naeme kei dollar, es sigi 1000 thai baht (was ca 34 dollars send). nach langem naerveufribendem hin ond haer haemer de schlossaendli 25$ zahlt... cheibe korupti sieche, onglaublech!!! ond 5$ esch en cambodia en hufe gaeud! ond wemmer usraechnet, wi veu tureschtebues am tag choeme ond fasch aui di 40 dollars zahle, da esch onglaublech!!!

guet, mer haends ase (nachdem i min pfihlboge fasch vergaesse het ond 500 thai baht zaut ha weui mis visa oeberzoge ha...) of de bus gschaft ond send emene chlinere bus witerdueset. vo duese zwar ke spur, dstrosse send brutau schlaecht, ned terret (weu schinbar en thailaendischi floggseuschaft koruptionsgaeud zahlt as si ehri floeg besser choene verchaufe) ond oebersaeit vo schlagloecher. ond draeckig. vor minute woni en cambodia acho be beni en staub ond draeck baded gsi. kei wonder traege do veu toefflifahrer mondschoetz! oder veu bende en tuepische cambodianische schal oms gsecht.

aendli acho haubwaegs er nacht ond totau erschoepft (mer send ca. 15 stond onderwaegs gsi) haends oeis en siem reap voreme hoteu, faehrn vo jeglecher turestische zivilisation usegloh ond haend oeis omsverrecke weue das hoteu zeige. mer haend bereits abgmacht, ass mer noeime anders he waend, aber dines esch eifach zlieb ond het diskutiert. nacheme wili hani de mou onderdroeckt gseit, ass si vermuetli komission oeberchoeme (was secherlech de fau esch), dommerwis het de das aber ghoert ond i ha mer en standpauki muesse alose vor groebere sorte: das esch ned thailand, du muesch ganz guet ufpasse do en cambodia ond so witer ond so fort... mued wini gsi be hani nome no choene lache, was aues vermuetli no schlemmer gmacht het. wo sech dines aendli het choene trenne esch sgscherr met de tuktuk fahrer losgange. mer send z4te gsi wo es glichlige hoteu haend weue, ond zvierte verhandle esch es fass ohni bode. nach ergendwo 40 minute verhandle semmer de aendli es hoteu gfahre worde (nachdem ass mer no vor polizei aghaute worde send weu mer oeberbelade gsi send, aber da esch jo schliessli ned oeises problem gsi). muess vellech no saege, ass die fahrt gratis gsi esch, em gaegezog mietet mer de fahrer naer foeren tag.

oeise fahrer esch am noechschte tag au schoen parat gstande ond het oeis abghout. mer haend de ganz tag e de taempu ruine vo siem reap verbrocht ond send fasch ned zom stune uscho. es esch onglaublech was die vor so langer zit ufbaue haend. dchend om taempu ome send auerdengs echli leschtig gsi, si haend weue buecher, schals, poschtcharte ond ztrenke verchaufe. i be einisch schwach worde ond ha es boechsli gogi gkauft foer 1$, da esch jo vellech WUCHER!!! aber mer laebt ond lehrt... ossertdem beni aneme stand verbiglofe ond dfrau het grueft "do you wanna buy a shirt'. mini ufmerksamkeit het aber eneme baby goute, wo metere haengematte gspeut het. wo dfrau da gseh het het si grueft 'do you wanna buy a baby?' ha fasch mine ohre ned traut... dchend send aber au ned schlaecht. ehres aenglisch esch erstuhnlech guet, obwou asi glaube ass si ned ed schueu goehnd weu ehri eutere si zom verchaufe bruche. ond chend verchaufe eifach besser... bem aesse sends bsonders ufdrenglech gsi, ond en bueb het zo mer gseit 'just buy my postcards and i give you peace and quiet' (chauf eifach mini charte ond ich geb der rueh ond frede). me hets fasch abem stueu gruehrt, i ha so muesse lache! oder es meitli het mer weue en schau verchaufe ond het gmeint 'your mum would really like it, you get 3 for 2 dollars!'.. (dim mami woer er mega gfaue, i geb der 3 foer 2 dollars). i ha de gfrogt, foer wer ass de di andere zwoei sige ond ohni zoeberlege het si gmeint foer mini schwoeschter ond mini oma ;o) ha, smami ond dsis haend sech zfrueh gfroeit, es get ke schau!!! obwou jo spottbeuig (da esch jo erscht de pris vor de verhandlig gsi), aber mer cha jo ned aues chaufe, mer esch jo schliessli metem rocksack onderwaegs! was de ganz trip echli vermieset het esch oeise tuk tuk fahrer gsi, wo so zemli jedi stond noei oeber de pris het weue verhandle. am aend vom tag haemerne zom toeifu gjagt ond oeis voellig erschoepft en noeie gsuecht. het jo schliessli gnue do!!

mer haend au en superguete gfonde ond send am noechschte tag zom sonneufgang zo de taempu, was sfrueche ufstoh woerkli waert gsi esch. mer haend de ufgang bem angkor wat taempu gseh, vermuetli de beruehmtischti vo au de taempu, aber lengscht ned de schoenscht! auerdengs spoetischtens nachem mettag het mer gnue ond zockt nor no met de schoutere 'en andere taempu haut'. was echli schad esch.

so semmer am drette tag met oeisem fahrer a hafe ond haend en sautueri (12$ pro person!!! i meine, oeises hoteuzemmer choschtet 6$ foer beid!) bootsfahrt dores schwemmends dorf gmacht. da esch woerkli sehr, sehr schoen gsi, fasch echli wi em faehnrseh, aber ebe, voellig oeberbezaut!! ofem waeg haemer ossertdem no benere fesch ond krokodilzocht aghaute, da esch no wetzig gsi. ned spektakulaer, aber ergendwie guet. osserdem hets chend gha met chline krokodil oder boas om de haus, wo saeubverstaendli baettlet haend.

mini 4 begleiter haend mi aui verloh, ond ich han en fuule tag izoge, het de ganz tag abegscheffet. osem reschtorand hani sogar no en beaerdigongszog voneme moench gseh, da esch au voellig spezieu gsi. uh veu luet met gschaenkli wo de sarg begleite dors stettli... weder wi em faehrnseh! zobe beni ganz elei ene bar oder zwoei ond ha de livebands zueglost. e einere bar hani muesse de platz waechsle weu e grossi japanergroppe cho esch. ha, defoer hani es gratis bier oebercho!!! i waechsle ase jederzit!!!

am noechschte tag hani mer en fahrer met sim motorbike gmietet ond be zo taempu, wo chli witer entfaehrnt send, bantei srei ond kbal spean. i ha en super tag verwoetscht ond sfahre ofem toeffli het uh veu spass gmacht. au wennd strosse woerkli ned emmer so super send... onderwaegs hani ganz veu bubus gseh ond mer natuerli eine gkauft, das esch mis highlight vom tag gsi!! ha, jez han ich au die ufmerksamkeit!! min bubu...

ossertdem hani em hotel es spanischs paerli agfrogt, oeb si am noechschte tag weue es tuktuk teile. die verrockte cheibe haend vom morge am 6i bes zobe am 6i weue goh! aber i ha au di schoenschte taempu nomou gseh, esch super gsi. de bayon taempu met au de gsechter esch frueh am morge no ganz verlasse gsi ond mer send di einzige wit ond breit gsi. en lange marathon tag aber woerkli waert gsi, nomou zgoh!

i ha weder es problem met minere kreditcharte gha, wo partout ke gaeud het weue usspucke. ond das a mim obe vor de abreis, mis boot buechet aber noni zaut, ganz geschweige denn vom hoteuzemmer... ond nei, i ha mini charte bem shoppe en bangkok ned oeberzoge!! be grad echli es schwetze cho, mue jo passiere weni elei onderwaegs be... dchartegseuschaft esch ned woerkli heufrich gsi, aber i has doch gschafft, 500$ zbezieh... puh, grad nomou guet gange!

hey, haend es schoens week end, lang gohts noeme...

liebi gruess
oli