es land metere trurige vergangeheit

met mim eigete tuk tuk esches de ad lakeside gange. da esch det wo aui backpacker send... ond entspraechend echli grusig ond draeckig... defoer werd mer met wonderschoene sonneondergaeng oeberem see belohnt. au ned schlaecht.

am noechschte tag hani mer es motorbike met fahrer gschnappet (mer mues si ned sueche, mer werd oeppe au 2m akwatschet...) ond ha mi zom S21 fahre loh, sgheime ex-gfaengnis vor khmer rouge. si haend es museum drus gmacht ond steue fotine ond gschechte us, aber au fouterwaerkzueg, mer gseht di chline zaeue vo de stroefling ond dchettene wo ehri fuess feschtgschnaut worde send. es esch forchbar. ond bsonders erschreckend weu das ganze gar noni so lang haer esch, ergendwo om di 30 johr... nuet!! ond wi bereits erwaehnt, dkhmer rouge esch e teil gebiet vo cambodia emmer no aktiv!! i ha oeppe 3.5 stond det verbrocht, ha mer aecht zit gloh ond das ganze of me woerke loh.

nachdem i mer no en doku gkauft ha hani mi zo de killing fields fahre loh, da esch det, wo si aui 'stroefling' (vermuetli aui onschoudig, eifach zguet usbeudet...) hegrechtet haend. mer gseht eigentli ned veu, aber oeberau esch agschrebe, was wo passiert esch. ond oeberau send usghobni massegraeber, chleiderfaetze legge emmer no dete... ossertdem haends es paar chnoche zo de boeim aenegleit... ofem platz stoht en grossi, hoechi pagoda os glas, gfoeut met totechoepf... i ha es paar nochdaenklechi stonde verbrocht a dem tag. zom mi chopf uszloefte beni zom rossische maert. da esch det wo mi mi fahrer stohloh het ond sis gaeud het weue, grmpf... de maert esch sehr turestisch gsi, aber schoen zom luege. gkauft hani so zor abwaechslig nuet...

de noechscht tag beni zom nationaumuseum, wo no meh sache vo angkor wat usgsteut gsi send. ossert de garte ned woerkli spezieu. de palascht esch schoen gsi zom luege, aber sautuer. i ha mer sogar es glace verchlemmt weus 2 dollars gkoschtet hett!!! die haend jo vellech echli eine!!! nacheme chorze spaziergang am flossufer entlang hani mi de met mim erhandlete fahrer ofe heiwaeg gmacht. wi gseit, a fahrer manglets do ned. es esch aecht en plog... ond wenns ned es fahrzueg esch, de sends buecher oder charte oder soescht ergendweuche kram wod waeut ned brucht.

drom hani mer so schnaeu wi moeglech es busticket foer nach sihanoukville gkauft. nacheme gmuetleche zmorge beni vom 'wiveu luet cha mer ene minivan foeue' bus abghout worde ond ad busstation gfahre. det haends mer gseit, de bus sigi vou, i muesi 2.5 stond warte.... schluck! es paar anderi toureschte haend sogar weder muesse usstige ond ehres gepaeck weder uslade... auerdengs haend seh nor 1 stond muese foer de noechscht bus warte (ond send nachhaer gos bilet waechsle?!). i be de nomou a schauter goge froge, oeb ich ned au met dem bus choeni goh ond ha zor antwort oebercho, de sig vou... grmpf. de chont en andere turescht, diraekt vom schauter, ond was hetter?? es busticket foer de ehner bus.... i be jo vellech echli andersch verrockt gsi!!!

wos de ofem waeg de no het afoh raegne raegne esch mi tag komplet gsi. schliessli beni ofem waeg a strand gsi ond es esch better chaut gsi...

woni en sihanoukville acho be esch scho donku gsi. zor belohnig hani defoer es goenschtigs ond superschoens hoteuzemmer oebercho, ganz noech bem strand, da esch super gsi. em raege...

am noechschte tag wos emou echli ufgheuet het beni ofene spaziergang a strand. esch no gmuetli, oder waer no gmuetli, oeberau fraue met choerb, vou met tentefeschspiessli, wo si de diraekt am strand broetle. yummie!! ossertdem hani emene chend en mega froeid gmacht e dem asi ehm mini chips verschaenkt ha. uh haerzig gsi. es het auderlei zuegs zom verchaufe e ehrem chorb ofem chopf gha.

ossertdem hani en toti ratte eneme usfloss gseh, ufdonse vom wasser ond fasch ohni faehli, nor no blotti hut. mhhhh.... echli spoeter hani emene gecko slaebe grettet, wo e de brandig verlore gsi esch. hach, mini guet tat foer de tag ;o)

ond mis vietnamesische visum hani grad au no greglet, wenns do raegnet wotti gar ned zlang blibe. jawohl.

em noechschte tag hani aber nomou en chance geh, esch aber ned veu besser gsi. be ane andere strand ofene spaziergang ond ha aendli, aendli en sanddollar gfonde. es het uh veu kabotti gha, ond scho ufgeh hani ne aendli gfonde!!! soooo guet!!!!

woni es paeuseli gmacht ha ond e sand ghocket be hani ploetzli en donkle flaecke em wasser gseh, ganz noech bem strand. woni noecher hegluegt ha hani entdeckt, ass da jagendi fesch send!! super gsi zom luege, di chlinere fesch send emmer weder e schare zom wasser us gompet. herrlech!! ;o)


sodoseli, fertig foer hoet. ha scho ganz wondi fenger... ond ehr vermuetli broennendi auge ;o) tschuessi zaeme, ond de 4.9. ned vergaesse, gaeu!!

bye bye
s'reisefoeddli