en wonderschoeni flossfahrt

e aller hergottsfruechi hani mis hotel verloh ond be voneme minibus abghout worde. si haend 'wi cha mer beschtmoeglechscht en minivan foelle' gspeut... ond ich be di letscht gsi wo igstege esch, wonderbar!

am 'hafe' semmer enes chlises khaenli igstege. sguete esch gsi, as mer au ofem dach het choene hoeckle. swaetter esch bedeckt gsi, ideal! mer send oeper de ton le sap see gfahre, ond es chont emmer drofah, wiveu wasser aser het. es esch eigentli meh wine wasserstross oder en floss gsi, aber wonder, wonderschoeni landschaft. mer send dor doerfli gfahre, wo dhueser of steuze em wasser stoehnd. dluet haend gfeschet ond dfaueder gacheret, ond dchend haend oeis vo oeberau haer zuegwonke. uh schoen gsi. acho en battambang hets usgseh, ass weu sganze boot es glichlige hoteu. ond weder, woni zom gratis shuttlebus cho be escher pompevolle gsi. zom gloeck esch eine vom hotel metem toeffli detgsi ond het mi spontan hendedruf glade. met au mim gepaeck... esch ase no raecht loschtig gsi.

donderkonft esch e chlini hoeli gsi, aber nor foer ei nacht meh aus gnuegend. bem nachtaesse emene strossekaffi beni es gsproech meteme eutere amerikanische paerli cho, wo set 7johr en cambodia laebt. si fuehre es waisehus ond haend mer es paar moeschterli verzeut. sehr bedaenklech. mer luegt nachdem gsproech aui luet ganz andersch ah. ossertdem haend si mer au verzeut, ass dkhmer rouge e teil gebiet vo cambodia emmer no aktiv esch. no meh bedaenklech!! ossertdem hani mi nach proschtitution erkondiget, wo en cambodia verbote esch. ehre schwigersohn, wo au en cambodia laebt, het eneme hoteu e 'charte' oebercho. e frau choschtet soevu ond soevu, es meitli $5 ond e bueb $5. esch da ned forchbar schlemm?? i be zemli schokiert gsi...

bereits am noechschte morge hani mer weder min toefflifahrer gschnappet ond ha mi ad bushautesteu fahre loh. zemli spezieu, di einzig osem weschte, e frau elei, ond ich be agstieret worde vo aune site. ond mi boge ond bubu haends ned besser gmacht. i be dattraktion vom tag gsi! nachem wc stop esch e frau igstege ond esch naebe mech aeneghocket. si het mer s'seckli wos goggi denne gsi esch zor hand us gnoh ond drigkodderet... choddere esch au do gross, ond emmer no zemli grusig, i glaube, do gwoehn ich mech ned dra. ond das natuerli ned nor eimou, sondern oepe au 5 minute, ohni oeberztribe! tja, reise...

hui, mue oeppe ufhole, baud chomi hei!!! am donnschti am 4.9. werdi min obe em pirates en henwil verbrenge, woer mi uh froeie aui vo oeich zgseh!! ase ombedengt reserviere, donnschti de 4.9.!!

liebschti gruess
oli