luang nam tha, di noechschti deschtination... es chlises stedtli, aber doch raecht turestisch. mer haend wieder emou es scooterli gmietet ond send dord gaegend dueset. of oeisem waeg (en draeckstross) semmer dor risfaueder gfahre (sehr schoen em momaent, es esch naemli pflanzseson ond aui send of de faeuder am schaffe) ond a taempu verbidueset ond bem fasch ustroechnete hafe verbicho. guet, mer send saeubverstaendli ned a de taempu verbidueset, mer haend aghaute ond en kulturrondgang gmacht. mer hange die taempu ehrlechgseit langsam zom haus us, ergendwie emmer weder sglich, aber de mark het gmeint ich heig es manggo a kultur... guet. a de tanksteu semmer voneme bueb bedient worde, schetzigswis 10i oder 11i, mega haerzig gsi. scho chli ongwohnt, wit ond breit esch niemer omegsi, nor aer. ha, mis highlight vom tag esch definitiv gsi, as ich s'stuer oebernoh ha ond de charre dor d'gaegend dirigiert ha. da esch de super gsi, i ha sogar choene schaute! ossert asses ploetzli uh fescht het afoh raegne ond ich ha muesse de gashebu abetroecke, om schadensbegraenzig zmache. mer haends liecht dorchnesst zrog es hostel gschafft... ofem maert hani demmou 1 broetleti ratte ond es chlises schwarzes saeugetier gseh, het echli usgseh wine chlini raubchatz. kei ahnig, wases genau gsi esch. aber i has gfoetelet. i froge emmer ganz naett ;o) jo, de maert esch emmer weder es erlaebnis. e de fleischabteilig stenkts emmer ganz grusig, di ganze igweid lege ar sonne, met floeige oeberseit ond waedlende verchaeufer... uarg. i weiss ned genau, was das aues esch, aber glaubet mer, die aesse woerkli aues, verschwaende nuet! i ha sogar schaedu met gebess gseh... ond es esch definitiv ned nor dekoration...
d'omgaebig do esch guet zom trekke ond mer haend oeises zueg zaemepackt ond send metem minibus es stettli mueng sing tuckerlet. 60 kilometer, 2 stond. es paar mou hani fasch de chopf am dach agschlage, d'strosseloecher waerde do grosszoegig oebersehe. de minibus esch totau oeberfoeut gsi ond mer send enand fasch ofem schoss ghocket. nuet ossergwoehnlechs. was mi echli ufgregt het esch gsi, as en iheimische oeisi laer gogiboechs osem feischter gruert het. die ruehre do aues eifach use. hmmm.
nachem bezog vo oeisere onderkonft haemer es velo gmietet ond send of erkondigstour. beneme pausebierli haemer de ian ond d'valieri weder troffe ond foernes bier am obe abgmacht. sehr naetti luet. witergange esches dors dorf ed risfaeuder (meteme gwagte bislistop fasch mette em dorf...) gstranded aneme teich wo mer abgstege send ond d'teichbewohner studiert haend. ploetzli send oeberau om oeis tuefdonkli gwetterwouke uftaucht ond wo mer zo oeisne velo zroggspurtet send haemer bereits di erschte grosse raegetropfe gspuert. so schnaeu wi mer haend choene semer e di noechscht beiz gfahre (wo es raechts wili ewaeg gsi send) ond send ofenes bier igkehrt. saeget nuet, aber do cha mer nuet anders mache!! ehrlechgseit, da esch sdrette mou gsi womer forem gwetter gfloechtet send, aber de cheibe storm esch nie cho... echli mued vo dere grosse welotur ond vellech es betzeli vo au dem bier semer zrog ed onderkonft ond haend es pfuesi gmacht. woni verwachet be semmer bereits 45 minute zspoht foer oeises date gsi... ups!
d'valerie ond (vorauem) de ian haends locker gnoh, ond nacheme witere bierli semer zaeme es ethnische reschtorand goge znacht aesse. ethnisch hin oder haer, ich ha weder nuddusoppe gha ;o) ofem heiwaeg semmer am oertleche nachtclub verbiglofe ond de mark waer eigentli uh gaern ine. wo de es paar iheimischi e oeisem onderkonftsreschtorand karaoke gmacht haend hanen noeme choene abhaute: mer send aeneghoecklet ond haend es witers bierli (oder zwoei) gnoh. de mark het sogar echli laotisch gsonge. i be sogar eso wit gsi, asi nachem noechschte bier e nachtclub gange waer, aber dommerwis het de cheib am ponkt viertuvor zwoeufi zuegmacht... grmpf...
egal, mueng sing het oeis ned gnueg inspiriert ond anstatt goge trekke semmer am noechschte morge metem (fascht) erschte minibus zrogg of luang nam tha. no am glichlige tag haemer es toeffli gmietet ond send losdueset, meh aus 120 kilometer haemer a dem tag gmacht! weni nor dra daenke esch mis foeddli weder taub... aber es esch en uh schoeni fahrt gsi ond ich has uh gnosse. be sogar di letschte 20 kilometer heigfahre, de eitli aenglaender brucht secherlech kei sonnegreme ond het sech sini aermli verbroennt ;o) guet, i mue vellech erwaehne, ass de britt haub inder esch ond somet en benidenswaerte tan het. ofem heiwaeg haemer es hoteu gseh met pool ond mer send goge froge, oeb mer de pool doefe benotze (do esch ebe aues echli andersch). ganz stouz het si oeis de pool zeiget, ond mer haend muesse saege: nei danke! buuuh, de pool esch gruen gsi, vou met auge, baaaehh!
zom znacht haemer oeis metem ian troffe. dvalerie esch bereits zrogg en thailand. mer send zom chines goge aesse. kei charte, kei aenglisch. guet, was macht mer do?! mer goht ed chochi ond suecht sech sis aesse saeuber us ;o) jawohl, kei scherz, woerkli passiert! soooo loschtig! de ian esst oebrigens wines ferkel. waehrend em aesse ond waehrend em rede grabt er sini fenger es mu ond schabt aessensraeschte oss sine fausche zaeh... ossertdem schmatzt ond gronzt ond schloerft ond was mer soesch no aues cha mache. grueslig!
osserdem semer nomou ofem maert gsi ond haend demmou ganz veu broetleti ratte gseh. i weiss jo ned, aber a dene sieche esch fasch nuet dra!! ossertdem hani 3 grossi eichhoernli ond en slow loris gseh. vo dem hani auerdengs e kes foeteli doeffe mache... di cheibe, woesse ganz genau ass si die ned doefe jage, moeches aber glich! di frau het mer sehr onfroendlech gseit, asi ned doef foetele... ergerlech.
vo luang nam tha semer de aendli foeren tag goge trekke. eigentlech semmer jo oeber de tschongu ond s'trekke us, aber mer haend oeis vom ian oeberzuege loh. es esch au en sehr schoene usflog gsi, abgseh devo asses sehr gschlefrig, nass ond matschig gsi esch. 4 stond semmer dor de urwaud gstampft. nacheme tuepische lao zmettag ond riesige fraeche schmaetterling wo of oeisi rockseck ond haend ghoecklet send semmer enes grosses akha dorf ond haend metem big manitou lao lao tronke ond iheimischi zigis graucht. bruch do ond ned abzlehne. mer haend sogar es gschaenkli oebercho! da esch de super! oeberau em dorf hets uh veu chend ond oben-ohne beautys gha. aui sehr noeigierig was die wisse e ehrem dorf moeche. zmetzt em dorf esch en chline wasserboeffu zwoesche zwoei pfloeck pfaercht gsi ond es chend esch drofeghocket. de arm cheib esch vermuetli ofem menu gstande...
ganz loschtig esch de flirting platz wos haend. det trefft mer sech am obe zom flirte. ond foerd konsekwaenze haends love nests ;o) munzigi hoettli of phaehl, en miniatuerversion vo de huesli. sooo haerzig. i glaube, i choent mi eleige ned dreie e so eim! dchend send superhaerzig gsi, vo oeberau haer haends non-stop 'sabadee' grueft ond uh froeid gha, wemmer gantwortet haend! es paar foeddliblot omegspronge, aues wos agha haend send gomistefeli gsi ;o)
nachere wohlverdiente duschi haemer oeis met em ian ond eneme schwed wo en ventianne laebt troffe ond zaeme de obe verbrocht. de schwed het bem bootlandeplatz 'gwohnt' ond da esch ca. 7 km osserhaub vom stettli. do hets kei taxis ond am 10i esch absolut tote hose ond fasch aui em bett. ha, kes problem foer de supermaerter: de mark esch zo de toefflivermietig ond het gseit, ass mer bereits 2x es toeffli gmietet haend onds jedes mou meteme haub voue tank zrog brocht haend. nacheme momaentli escher meteme toeffli zrog cho ond het de schwed heigfahre. hi, hi, de esch jo sooooo loschtig! tja, ond do werd onglaublechs ploetzlech wohr...
hey, gnuesset de raeschte vom sonnti ond hebet e gueti ond chorzi noechschti woche!
en decki omarmig
oli
Keine Kommentare:
Kommentar veröffentlichen